တိုင်ပေ၊ မာတ် ၂၅
စပ်ကဵုဗီုပြၚ်ထမံက်ထ္ၜးယၟုထာဲဝါန် ပ္ဍဲလိက်စၟတ်သမ္တီဗဳဇာတံတုဲ ကြဴနူဒှ်ကယျာန်ဓဝါတ်ကဵု ဍုၚ်တၠဌာန် ကေန်မရန်တုဲ ပ္ဍဲသဘၚ်သဳကၠဳဂကောံဗၞိက်ဂၠးကဝ် WTO ဂှ် နဒဒှ်အလန်ပထမကၠာအိုတ် ထာဲဝါန် တိုန်စိုပ်ဟွံသေၚ်ရောၚ် ပ္ဍဲမာတ် ၂၄ ဂှ် ဟီုလဝ်ရ။
နူမာတ် ၂၆ စိုပ် ၂၉ ဂှ် သဘၚ်သဳကၠဳ ကၠောန်ဗ္ဒျ်အာ ပ္ဍဲဍုၚ်ကေန်မရန် စဳဇန်လဝ် သွက်ညးစၞးထာဲဝါန်တံ ဂွံတိုန်စိုပ် ပ္ဍဲလိက်စၟတ်သမ္တီဗဳဇာ ဟိုတ်နူထမံက်ထ္ၜးလဝ် ဍုၚ်ထာဲဝါန်ဂှ် ဒှ်တွဵုရးကြုက်တုဲ လပါ်ထာဲဝါန်တံ ဒစဵုဒစးလဝ် ဗွဲမသကာတ်မြဟ်ရ။
ကြဴနူဂှ် ဍုၚ်ကေန်မရန်ဝွံ သွက်ဂကောံညးစၞးထာဲဝါန်တံဂှ် ကဵုအခေါၚ်ဗၠးဗဳဇာရောၚ် လလောၚ်တြးလဝ်ရ။
ဆဂး ပ္ဍဲလိက်တံဂှ် ညးတံဒှ်ကောန်ဍုၚ်လဵုရောဂှ် ဟွံထမံက်ထ္ၜးလဝ်သၟးဟွံက သီုကဵုယၟုချူလဝ်နကဵုအၚ်္ဂလိက်တံ ပံၚ်လဝ်ဗၠေတ်မံၚ်တုဲ ညးစၞးတံသီုဖအိုတ်ဂှ်လေဝ် ထမံက်ထ္ၜးလဝ် နဒဒှ်မၞိဟ်ဗြဴဖအိုတ်ရောၚ်။ ပြသၞာဏအ်ဂှ် ဍုၚ်ကေန်မရန် မိက်ဂွံသှ်ပုစ္ဆာ နကဵုစိုတ်ဓါတ်ယဵုယဵုလ္ဂူလ္ဂူဟၟဲပုဟ် သာ်ဝွံ ပ္ဍဲလိက်လလောၚ်တြး ဌာနဝန်ဇၞော်ပရေၚ်ဍုၚ်သအာၚ် ထာဲဝါန် ချူထမံက်ထ္ၜးလဝ်ရ။
လ္တူထာဲဝါန် မအုပ်ဓုပ်မံၚ်အဝဵုပိုၚ်ပြဳဇကု နကဵုနဲဒဳမဝ်ကရေဇြဳဂှ် ကြုက်တံပိုင်ပြဳအဝဵုရောၚ်ဟီုမံၚ်တုဲ သွက်ဂွံကလေၚ်စွံသၟဝ်တဲပရေၚ်အုပ်ဓုပ်ညးတံဂှ် ယဝ်နွံပၟိက်မ္ဂး စကာအာဇြဟတ်ပၞာန်ရောၚ် ဟီုလဝ်ရ။
စပ်ကဵုပရေၚ်ဖျေံသ္ဂုတ်သွာတ် ဟွံတိုန်စိုပ်သဘၚ်သဳကၠဳဂကောံဗၞိက်ဂၠးကဝ် WTO ဂှ် ဒှ်အရာကိစ္စဆေၚ်စပ်ကဵု ဂုဏ်စရာဲသိက္ခာကောန်ဂကူဇကုရောၚ် သာ်ဝွံ ဌာနဝန်ဇၞော်ပရေၚ်ဍုၚ်သအာၚ် ထာဲဝါန် ဂးလဝ်ရ။
စပ်ကဵုအရာ တိုန်စိုပ်သဘၚ်သဳကၠဳဏအ်တုဲ ဗော်ဂွံလဝ်အဝဵုထာဲဝါန်တံ စကာမံၚ် နဒဒှ်ပရေၚ်ဍုၚ်ကွာန်ရောၚ် ကြုက်ဟီုရ။
ထာဲဝါန်ဝွံ ကြဴနူကြုက်လုပ်ဂကောံ WTO တုဲ ဟွံလအ် ပ္ဍဲသၞာံ ၂၀၀၂ ဂှ် လုပ်ကၠုၚ်လဝ်တုဲ ယၟုသ္ပစၟတ်သမ္တီလဝ် အပ္ဍဲဂကောံဂှ်တှ်ေ နဒဒှ်တိဍာ်အကံက်ခေါန်တၞဟ်ခြာ ထာဲဝါန်ရောၚ် သ္ပလဝ်စၟတ်သမ္တီရ။
စပ်ကဵုပရေၚ်ထာဲဝါန် ဟွံတိုန်စိုပ်သဘၚ်သဳကၠဳ ဟီုဂးမံၚ်ဂှ်တှ်ေ နူလပါ် WTO မုလေဝ်ဟွံကဵုလဝ် တင်စၟတ်သမ္တီဏီပုဟ်။
Ref:AFP