ကျံက်ကျဳ၊ မာတ် ၂၅
ပ္ဍဲကဵုရးဗဂေါ ပွိုၚ်ဍုၚ်ကျံက်ကျဳဂှ် အကြာပွိုၚ်ပိဂိတု လောန်ကၠုၚ်ဏအ် ဟိုတ်နူဒပ်ကဝ်မယှေန်ပၞာန် ပန်ဗတိုက်လဝ်တုဲ ညးဍုၚ်ကွာန်ကောန်အရာပ် ၃၈ တၠ ချိုတ်အာလဝ်ဂှ် နူကဵုဗဟဵုဗော်သွးကောန်ဂကူကရေၚ် (KNU) လလောၚ်တြးလဝ်ရ။
အပ္ဍဲပွိုၚ်ပိဂိတု ပထမကိုပ်ကၠာ သၞာံ ၂၀၂၆ ဂှ် ပ္ဍဲပွိုၚ်ဍုၚ်ကျံက်ကျဳ ဒပ်ကဝ်မယှေန်ပၞာန် ဗတိုက်လဝ်နကဵုၜၚ်ကျာကီု နကဵုနဲကဲနာနာတံ ဖံက်ပကဝ်ကၠုၚ်မံၚ်အခေါၚ်အရာမၞိဟ် ဟၟဲကဵုဓရ်မနုဿ မၞိဟ်တံရောၚ်။
ဟိုတ်နူဒပ်ကဝ်မယှေန်ပၞာန် ဖံက်ပကဝ်လဝ်အခေါၚ်အရာမၞိဟ်ဂှ်တှ်ေ ညးဍုၚ်ကွာန်ဟၟဲကဵုဒုဟ်ဒဏ် ၃၈ တၠချိုတ်အာလဝ်တုဲ ၃၅ တၠ ဟွံကဒးဝပ် သီုကဵုညးဍုၚ်ကွာန် နူကဵု ၁၃ ကွာန် ကောန်ကွာန်ၜိုတ် ၆၀၀၀ တၠတံ ဒးဂြိပ်ဒဴ ထောံလဝ်သ္ၚိဌာန်အိုတ်ရောၚ် KNU ဂးလဝ်ရ။
ပ္ဍဲပွိုၚ်ပိဂိတုဂှ်ပၠန် ဗ္ဒိုပ်ဒပ်ကဝ်မယှေန်ပၞာန်ၜါဒၞာဲ ဖျေံလဝ်သ္ဇိုၚ် ပ္ဍဲပွိုၚ်ဍုၚ်ကျံက်ကျဳဂှ် ဒပ်ပၞာန်ဗၠးၜးကောန်ဂကူကရေၚ် (KNLA) ဗတိုက်သီကေတ်မာန်လဝ်တုဲ သီုကဵုသီဂွံလဝ် လွဟ်ကပေါတ်ပၞာန် ဗွဲမဂၠိုၚ်ရောၚ် လလောၚ်တြးလဝ်ရ။
တုဲပၠန် ကောန်ပၞာန်ယိုက်ဝန်ပၞာန်ညးဍုၚ်ကွာန် ၄၁ တၠ လုပ်ဖျေံလဝ်လွဟ်ဂှ်လေဝ် အတိုၚ်သၞောဝ်ဥပဒေဂၠုဲပၞာန်ဂှ် ရေၚ်တၠုၚ် ဖန်ဖက်ကဵုလဝ်ရောၚ် သ္ဂးရ။
ကမၠောန်ကဝ်မယှေန်ပၞာန် ပလီုပလာ်မံၚ် ဖဵုဂုဏ်ပိုန်ဒြပ်ကၟိန်ဍုၚ် အရာဟၟဲကဵု ဓရ်မနုဿာပရေၚ်မၞိဟ်တံဂှ် သွက်ဂွံဒစဵုဒစးအာ စဵုကဵုစိုပ် တိုၚ်ပကဴရန်တၟံတေံ ညးဍုၚ်ကွာန်တံ ပံၚ်တောဲပါလုပ်အာညိဂှ် KNU ဗ္တိုက်ဖ္အောဝ်လဝ်ရ။
ပရိုၚ် – သြၚ်လောန်တိုၚ်မ်
Photo – KNU