မတ်မလီု၊ မာတ် ၂၅
ပ္ဍဲတွဵုရးမန် ဟိုတ်နူၚုဟ်ကၠေၚ်စက်သၠုၚ်တိုန်အာ ပရေၚ်ရာန်ကၠေၚ်စက်ဝါတ်ဂါတ်ခက်ခုဲဂှ်တုဲ သီုကဵုၚုဟ်ဍိုက်ကွဳစက်ကီု ၚုဟ်တန်သာကပေါတ်တံကီု သၠုၚ်တိုန်အာယျ တၠကွဳစက်လိုၚ်တံကဵု ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲကဵုဒေသမ္ဂး စပ္တံနူသတ္တဟပထမ ဂိတုမာတ်ဏံတုဲ ကၠေၚ်စက် တံဂှ် ရာန်ကေတ်အတိုၚ်ပၟိက်စိုတ်ဟွံဂွံ ဆၜိုတ် နကဵုအပိုၚ်အခြာ ဟေၚ် ရာန်ဂွံမံၚ်တုဲ ဒးၜေတ်ရေၚ်မၚ်မံၚ်ဂှ်အခိၚ်အိုတ်သၟးဟွံက ဆေၚ်ကၠေၚ်တံလေဝ် ဒးသွံကဵုမံၚ် နကဵုသၞောတ်ထ္ၜတ်နွံတုဲ ဒးဆဵုဂဗမံၚ်အခက်အခုဲတံရ။
ဟိုတ်နူပရေၚ်အခက်အခုဲကၠေၚ်စက်တုဲ လၟေၚ်ကွဳစက်လ္ၚဵု ပလံၚ်မံၚ်မၞိဟ်နူတွဵုရးမန် ဗ္စိုပ်ဇရေၚ်ဒေသနာနာတံဂှ် ယှအ်ဖျေံလဝ် လၟိဟ်ကွဳစက်ကီုလေဝ် ၚုဟ်လိၚ်ဍိုက်ကွဳစက် ကေုာံ ၚုဟ်တန်သာကပေါတ်တံဂှ် ထပဵုတုဲကံက်တိုန်မံၚ် မဒှ်ရ။
ဟိုတ်နူ ရာန်ကၠေၚ်စက်ဝါတ်ဂါတ်ခက်ခုဲအာတုဲ ဒးယှအ်ဖျေံလဝ် လၟိဟ်ကွဳစက်ကီုလေဝ် ၚုဟ်လိၚ်ဍိုက်ကွဳစက်ကဵု ၚုဟ်တန်သာကပေါတ်တံဂှ် ဒးကံက်ထပဵုပတိုန်လဝ်ရောၚ် သာ်ဝွံ တၠလိုၚ်ကွဳစက် မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“လိုၚ်ကွဳစက်တံတှ်ေ ယှအ်ဖျေံလၟိဟ်ကွဳစက်နွံ။ တိတ်ဟွံမာန်ပုဟ်။ ကွဳစက်ဟီုမ္ဂးဂှ် ကၠေၚ်ဟၟဲတှ်ေ ဒဳအာဒဳကၠုၚ် ဟွံဂွံပုဟ်။ ဟိုတ်ဂှ်ရ ဒးယှအ်ဖျေံထောံလဝ် လၟိဟ်ကွဳစက်။ ဟိုတ်နူအခက်အခုဲဝါတ်ဂါတ်ကၠေၚ်တုဲ ၚုဟ်တန်သာကပေါတ်တံဂှ် ဥပမာ – ကပေါတ်တန်မံၚ် ၃၀၀၀ ဂှ်တှ်ေ ဒးကေတ်ထောံၜိုတ် ၅၀၀၀ ” သာ်ဝွံ သ္ဂးရ။
တုဲပၠန် ဟိုတ်နူပရေၚ်အခက်အခုဲ ရာန်ကၠေၚ်စက်ဝါတ်ဂါတ်ပြဟ်ဟ်ဏံတုဲ ညံၚ်ရဴဗီုအခိၚ်တေံ အတိုၚ်စၟတ်လဝ်အခိၚ်ဂှ် စိုပ်ဒၞာဲဟွံမာန်၊ ပ္ဍဲအကြာဂၠံၚ် ဒးၜေတ်ရေၚ်မၚ်မံၚ်ဆေၚ်စုတ်ကၠေၚ်တံဂှ် အခိၚ်လအ်လအာတုဲ တရဴတံလေဝ် ဒးလဇုဲလဇမံၚ်ရောၚ် ညး ဆက်ဟီုရ။
ဟိုတ်နူအခက်အခုဲ ရာန်ကၠေၚ်စက်တုဲ ပါဲနူလိုၚ်ကွဳစက်ဖဍိုက်မၞိဟ် တံတုဲ သီုကဵုကွဳသၠာပိ၊ အိုဝ်ဝေ စနူကွဳလိုန်ဓါတ်တက္ကသဳလိၚ်စ ၚုဟ်ဍိုက်ကွဳတံဂှ် တိုန်အာမံၚ် ၜါဆ၊ ပိဆ အာတ်င္ၚုဟ်မး သၠုၚ်တိုန်အာနူကၠာတေံရောၚ် ညးဒေသတံ ဟီုဂးမံၚ်အိုတ်ရ။
မွဲလပါ်ပၠန် နူဌာနစၟဳစၟတ်ထိၚ်ကြာပ် ကပေါတ်ပတိတ်ကၠေၚ်ဍေၚ် တွဵုရးမန် သၟဝ်တဲကဝ်မယှေန်ပၞာန်ဂှ် သွက်ကွဳစက်ဖဍိုက်မၞိဟ်၊ Light Truck ကေုာံ ကွဳစက်ဖ္ဍိုက်ကပေါတ်တံဂှ် ကၠေၚ်ဒဳဇြေလ် သွက်ၜိုတ်မွဲကိုတ်ဒကေဝ် ဓဝ်ရ ညံၚ်ဂွံသွံကဵုအာဂှ် ကဵုလဝ်စၞောန်ကု ဆေၚ်ကၠေၚ်တံရောၚ်။
တုဲပၠန် ကွဳသၠာပ၊ အိုဝ်ဝေတံဂှ် သွက် ၁၀ဝ၀ဝ ဒကေဝ်၊ ကွဳလိုန်ဓါတ်တံဂှ် သွက် ၅၀ဝ၀ ဒကေဝ်ဟေၚ် ကဵုသွံအာကီုလေဝ် ဟိုတ်နူဒးၜေတ်ရေၚ် မၚ်ရာန်မွဲတ္ၚဲပေၚ်ၚ် အိုတ်အခိၚ်လအ်လ အတိုၚ်ပၟိက်စိုတ်ရာန်ဟွံဂွံဂှ်ရ ဒးထပဵုပတိုန်လဝ် ၚုဟ်ဍိုက်ကွဳစက်ရောၚ် သၟာဒဳကွဳအိုဝ်ဝေတံ ဟီုရ။
အပ္ဍဲတွဵုရးမန်ဂှ်တှ်ေ စနူသတ္တဟပထမ ဂိတုမာတ်ဏံဂှ် ဟိုတ်နူပရေၚ်အခက်အခုဲ ရာန်ကၠေၚ်စက်ဝါတ်ဂါတ်အာတုဲ ကဏ္ဍပရေၚ်အာတရဴကဵု ပ္ဍဲကဏ္ဍပရေၚ်ပိုန်ဒြပ် ပရေၚ်မၞိဟ်နာနာတံဂှ် ဒးဆဵုဂဗမံၚ်ကဵု ပရေၚ်ဝါတ်ဂါတ်နာနာသာ်တုဲ ကဏ္ဍဗွဲမဂၠိုၚ်တံမ္ဂး အတိုၚ်လၟေၚ်ပကတိ ချဳဒရာၚ်အာဟွံမာန်ဏီ ရ။
ပရိုၚ် – သြၚ်လောန်တိုၚ်မ်
Photo – Social Media