ညံၚ်ရဴတၠုၚ်လအာ က္ဍိုပ်သ္ကိုပ်ပၞာန် သွက်ဂွံအုပ်ဓလီုအာ ပရေၚ်ဍုၚ်ကွာန်၊ ပရေၚ်ပၞာန်တံ ကၠောန်ကၠုၚ်မာန်မံၚ်

နေပျဳဒဝ်၊ မာတ် ၂၅

က္ဍိုပ်သ္ကိုပ်ပၞာန်သီအဝဵု ဂဥုပ်သ္ကိုပ်ပၞာန်ဇၞော် မေန်အံၚ်လှာၚ် ယဝ်ရ ဒှ်အာသမ္မတမ္ဂး သွက်အဝဵုသြဇာညး ညံၚ်ဂွံပဵုဇၞော်တိုန်အာမ္ဂး ပ္ဍဲကဵုပရေၚ်ဍုၚ်ကွာန် ကေုာံ ပရေၚ်ပၞာန်တံဂှ် ၝောံပိုဒ်လ္ၚဵု ပ္ဍဲသၞောဝ်ဥပဒေသဇိုၚ်တံ ပလေဝ်စုတ်ကၠုၚ်မာန်မံၚ်ရောၚ် သာ်ဝွံ သ္ၚဳဂၠိပ်မံၚ်အိုတ်ရ။

အတိုၚ်သၞောဝ်ဥပဒေသဇိုၚ် ၂၀၀၈ ၝောံပိုဒ် ၂၀ (ဂ) မ္ဂး ဂဥုပ်သ္ကိုပ်က္ဍိုက်ပ်ဒပ်ပၞာန်ဂှ် ဒှ်ညးဇၞော်အိုတ် ဂကောံဒပ်ရပ်လွဟ် သီုဖအိုတ်တံရောၚ် ထမံက်ထ္ၜးလဝ်ရ။

လပါ်မွဲပၠန် အတိုၚ်သၞောဝ်မ္ဂး တာလျိုၚ်သမ္မတကေုာံ အဆံၚ်တာလျိုၚ်ဂဥုပ်သ္ကိုပ်ဒပ်တံဂှ် ပူဂဵုမွဲတၠဟေၚ် မွဲအလန်ဓဝ် ယိုက်ဂၠေၚ်တာလျိုၚ်ၜါ ဟွံဂွံပုဟ်။

ဟိုတ်ဂှ်ရ က္ဍိုပ်သ္ကိုပ်ပၞာန် ယဝ်ရဒှ်သမ္မတမ္ဂး ဒးထောံကၠဟ်အာ အဆံၚ်တာလျိုၚ်ဂဥုပ်သ္ကိုပ်ဒပ်တုဲ သွက်ဂွံဒှ်ညးဇၞော်အိုတ် ဂကောံဒပ်ရပ်လွဟ်သီုဖအိုတ်တံ ပ္ဍဲဒၞာဲဂဥုပ်သ္ကိုပ်က္ဍိုက်ပ်ဒပ်ပၞာန်ဂှ် သမ္မတ ညံၚ်ဂွံလုပ်သ္ပအာစၞးမာန်ဂှ် ပလေဝ်စုတ်ကၠုၚ်သၞောဝ် မဒှ်ရ။

သွက်ဂွံပလေဝ်ၝောံပိုဒ်ဏအ်ဂှ် ဝါတ်ဂါတ်မံၚ်အိုတ်စောန်ရောၚ် ရံၚ်အာၝောံပိုဒ် ၄၃၆ တုဲ ညးတာလျိုၚ် သုတေသနသွာၚ်ပၞာန် ကိုနံၚ်ယော နူဂကောံလ္ၚတ်ပရေၚ်ဂီုကၠီု ဆေင်စပ်ကဵုဒပ်ပၞာန်ဗၟာ MDSI ဟီုကဵုဌာန်ပရိုၚ်သြၚ်လောန်တိုၚ်မ်ရ။

“ပိုဲတံထေၚ်ခယျကေတ်၊ ၝောံပိုဒ်ဥပဒေတံဏအ်ဂှ် သွက်ဂွံပလေဝ်အာလောဲလောဲမာန်ဂှ် ဝါတ်မံၚ်ကွေံကွေံဏောၚ်။ သၞောဝ်ဥပဒေသဇိုၚ်ဂှ် ပလေဝ်တုဲဟီုကီုလေဝ် သွက်ဂွံသ္ပအာဒတန်ဂှ် နူစၠတ်ဓဝ်ကၟိန်ဍုၚ် ၇၅% ပြၚ် ဒးဂွံမာဲထံက်ဂလာန်ဂှ် ဒးပလေဝ်အာ ပထမမွဲတၚ်။ တုဲမ္ဂး ဒးကၠောန်ပေါဲကံက်ဆန္ဒညးဍုၚ်ကွာန်အလုံဍုၚ်တုဲ ဒးဂွံမာဲကဝက်ပြၚ်ဟီုဂှ်လေဝ် အကာဲအရာဝါတ်ဂါတ်မံၚ်ဗွဲမလောန်ရ။ တုဲပၠန် ပလေဝ်တုဲ သွက်ဂွံစိုပ်အဆံၚ်သုၚ်စောဲပၠုပ်လမျီုမာန်ဂှ်လေဝ် အကာဲအရာနွံမံၚ်အဆံၚ်ၚ်ဏီရောၚ် ထေၚ်ကေတ်ရ” သာ်ဝွံ သ္ဂးရ။

ယဝ်ရပလေဝ်ၝောံပိုဒ် ၂၀ (ဂ) မ္ဂး ဗော်ဒစဵုဒစး NLD ကေုာံ ဗော်တၞဟ်တံလေဝ် ကာလမွဲအခိၚ် ယဝ်ဒှ်အလဵုအသဳမ္ဂး သွက်ရဴညးတံလေဝ်ဒှ်အာအခေါၚ်အရာမာန်တုဲ တင်နၚ်ဏံဂှ်လပါ်ရဲဒပ်ပၞာန်တံ တော်ခယျစုတ်လဝ် နွံမာန်ရောၚ်။

အလဵုအသဳပရေၚ်ဍုၚ်ကွာန်တံဂှ် အတိုၚ်ကာလပြံၚ်လှာဲအာမံၚ်ကီုလေဝ် လပါ်ဒပ်ပၞာန်ဂှ်တှ်ေ ညံၚ်ရဴဗီုပြၚ်အလဵုအသဳတံဟွံပြံၚ်လှာဲတုဲ ဆၜိုတ်ပြၚ်လှာဲတာလျိုၚ်သၠာဲပၞးဟေၚ် နကဵုအလဵုဇကု က္ဍိုပ်သ္ကိုပ်ပၞာန် ဟီုထမံက်လဝ် ပ္ဍဲကဵု ပေါဲဒုၚ်ဂလာန်သြဝါဒ ညးရ။

လပါ်မွဲပၠန်ဂှ်တှ်ေ ဒပ်ပၞာန်ဝွံ ရန်တၟံလဝ် ဒးပါလုပ်ကေတ်တာလျိုၚ် ပ္ဍဲကဏ္ဍပၠတရဴပရေၚ်ဍုၚ်ကွာန်ကောန်ဂကူ လၟိုန်ကာလရောၚ်တုဲ ၝောံပိုဒ် ၆ (စ) ဏံဂှ်တှ်ေ ဂကောံဇြဟတ်ဒဳမဝ်ကရေဇြဳတံ မိက်ဂွံပလီုထောံ မဒှ်ကီုရ။

ဟိုတ်ဂှ်ရ က္ဍိုပ်သ္ကိုပ်ပၞာန်သွက်ဂွံထိၚ်အာဒပ်ပၞာန် နကဵုဗီုပြၚ်တၞဟ်ဟ်တံ ဂစာန်မာန်ကီုလေဝ် သွက်ဂွံယှအ်ဖျေံကဏ္ဍဒပ်ပၞာန် ပ္ဍဲပရေၚ်ဍုၚ်ကွာန်ဂှ် ကၠောန်အာဟွံသေၚ်ပုဟ် သာ်ဝွံ ကိုနံၚ်ယော ကဵုလဝ်တင်စၟတ်သမ္တီနွံရ။

ယဝ်ရ သမ္မတဂှ် ဒှ်ညးဇၞော်အိုတ် ပ္ဍဲဂကောံဒပ်ရပ်လွဟ်သီုဖအိုတ်တံမ္ဂး စပ်ကဵုအရာသီအဝဵု ပ္ဍဲကာလကာမံက်တိုန် မဒးအပ်ပြာပ်အဝဵု ၃ သာ် သွက်ဂဥုပ်သ္ကိုပ်က္ဍိုက်ပ်ဒပ်ပၞာန် ၝောံပိုဒ်လ္ၚဵုတံလေဝ် ဒးပလေဝ်အာရောၚ်။

လၟုဟ်ပြဟ်ဟ်ဏံ သ္ကိုပ်ပၞာန်ဇၞော် ကျဝ်သွာလေန်၊ ဒုတိယ ဂဥုပ်သ္ကိုပ်ပၞာန်ဇၞော် သဵုဝေန်ကေုာံ သ္ကိုပ်ပၞာန်ဇၞော် ယေဝ်ဝေန်ဥူ ယၟုသကိုပ်ပၞာန် ၃ တၠဏံ သွက်ဂွံဆက်ကေတ်အာ အဆံၚ်တာလျိုၚ် ဂဥုပ်သ္ကိုပ်ဒပ်ဂှ် ပြာကတ်ပေၚ်ပြးဇးမံၚ် ပ္ဍဲအကြာညးစကာဇာဖိုၚ်မှာဇန်တံရ။

ညးဒှ် ဂဥုပ်ဒပ်ဂှ် ဒးယိုက်ဂၠေၚ်တာလျိုၚ် ၅ သၞာံမဒှ်တုဲ ပ္ဍဲကံၚ်သဳတေၚ်ဗေၚ်ဂှ်လေဝ် ဒှ်ဥက္ကဌ အယောၚ်အလာနွံမံၚ် ဗီုဏံရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ် ဟီုလဝ်ကဵု ဌာန်ပရိုၚ်သြၚ်လောန်တိုၚ်မ်ရ။

“တၠုၚ်လအာညးတံအာမံၚ်လၟုဟ်ဂှ် ဂဥုပ်သ္ကိုပ်က္ဍိုက်ပ်ဒပ်ပၞာန် ဂှ်လေဝ် သွက်ဂွံစွံအာ ၅ သၞာံ ကရောံစၠတ်ဓဝ်။ သွက်ဂွံထမံက်အာဗီုပြၚ် အယုက်တုပ်ကဵုအလဵုအသဳ မွဲစွံ။ ဟိုတ်ဂှ်တှ်ေ ပလေဝ်ကၠုၚ် သ္ဇိုၚ်သၞောဝ်ဥပဒေဏောၚ်။ ဆဂး ညးဒေါအ်ဇူအာ နူဂဥုပ်ဒပ်ဂှ် အပ္ဍဲကဵုအလဵုအသဳဂတတေံမ္ဂး ညံၚ်ဂွံဒှ်ကၠုၚ် သမ္မတ ဟွံသေၚ်မ္ဂး ဥက္ကဌ ကံၚ်သဳဒုၚ်တေၚ်ဗၚ် ညံၚ်ဂွံဒှ်ကၠုၚ်ဗီုပြၚ်ဏံ ဍေံတံပလေဝ်မာန်” သာ်ဝွံ သ္ဂးရ။

ကံၚ်သဳစဵုဒၞာကောန်ဂကူကေုာံပရေၚ်ဂီုကၠီု ကၠာအယုက်အခေါၚ်ကမၠောန်ညးတံ ဟွံအိုတ်ဏံဂှ် ညံၚ်ဂွံကေတ်လဝ်ဒၞာဲ အဆံၚ်သၠုၚ် အပ္ဍဲလ္တူသီုဖအိုတ်တံမာန် သၞောဝ်ကံၚ်သဳတေၚ်ဗၚ်ကၟိန်ဍုၚ်ဂှ် ချူခၞံလဝ် ပ္ဍဲဖေဖဝ်ဝါရဳ ၃ ရ။

အတိုၚ်သၞောဝ်ဏံမ္ဂး နူကဵုပေါဲရုဲမာဲ သမ္မတ တိုန်ကၠုၚ်ဂှ် ဒးဒက်ပ္တန် ကံၚ်သဳ မၞုံကောန်ဂကောံဟွံအောန်နူ ၅ တၠတံတုဲ ဒးခါန်ကၞက် စုတ်အာ ကောန်ဂကောံကံၚ်သဳတံရောၚ်။

တာလျိုၚ်ကံၚ်သဳတေၚ်ဗၚ်ဂှ်တှ်ေ ပရေၚ်ဂီုကၠီု၊ ပရေၚ်အုပ်ဒလမ် သၞောဝ်ဓဝ်ဥပဒေ၊ ပရေၚ်ဆက်ဆောံဂၠးကဝ်၊ ပရေၚ်ၜိုဟ်လလမ် ကေုာံပရေၚ်ခၞံဥပဒေတံဂှ် သွက်ဂွံကဵုအာကသပ်ပ္ညဳပ္ညပ်အာ မဒှ်ရ။

အပ္ဍဲအကာဲအရာဏအ်တှ်ေ ဂဥုပ်သ္ကိုပ်ပၞာန်ဇၞော် မေန်အံၚ်လှာၚ်ဂှ် ပါဲနူတာလျိုၚ်သမ္မတတုဲ သီုဒှ်ဥက္ကဋ္ဌ ကံၚ်သဳတေၚ်ဗၚ်မာန်ရောၚ် ဟီုဂးမံၚ်အိုတ်ရ။
အခေါၚ်အဝဵုသမ္မတဂှ် ပံၚ်ပစပ်အာကဵုအခေါၚ်အဝဵု ကံၚ်သဳတေၚ်ဗၚ်တုဲ က္ဍိုပ်သ္ကိုပ်ပၞာန်ဆက်ထိၚ်အာ ဒပ်ပၞာန်မာန်ရောၚ် သာ်ဝွံ က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် သ္ၚဳဂၠိပ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

နူကဵုကံၚ်သဳကဵုကသပ် ဆေၚ်စပ်ကဵုဍုၚ်ဗၟာ SAC-M ဂှ်တှ်ေ ပ္ဍဲပွိုၚ်အကြာ ၜါသတ္တဟဂတဏံမ္ဂး သကိုပ်ပၞာန်ဇၞော်ဇၞော်ဗွဲမဂၠိုၚ်တံဂှ် ၜးထောံကယျိုၚ်ယူနဳဖံၚ်ပၞာန်တုဲ ပြံၚ်လှာဲအာ ကယျိုၚ်ကောန်အရာပ်တံ အိုတ်ရောၚ် ဂးမံၚ်ရ။

ပရိုၚ် – သြၚ်လောန်တိုၚ်မ်

Photo – MOI