ဗြဝတီ၊ မာတ် ၂၆
ဂၠံၚ်အာယှ ကအ်ကြိက်-ဗြဝတီ ဒှ်ဂၠံၚ်တရဴဗၞိက်ပယျဵု ဗၟာ-သေံဂှ် ပ္ဍဲဂိုတုအေဗရာ ၁ ဏံမ္ဂး ကဝ်မယှေန်ပၞာန် ကလေၚ်ပံက်အာရောၚ် ပရိုၚ်တိတ်မံၚ်တုဲ ပ္ဍဲကာလအကာဲအရာ ဝါတ်ကျာတ်မံၚ်ကၠေၚ်စက်ဏအ် ညးဍုၚ်ကွာန်ဒေသတံ စၟဳစမံၚ် ညံၚ်ဂၠံၚ်အာယှ ဂွံကလေၚ်ပံက်မာန်ရ။
ဂၠံၚ်အာယှဏံ ဒးဒုၚ်ကၟာတ်ကၠုၚ်လဝ် သၞာံဗွဲမလအ်လတုဲ ပ္ဍဲဂိတုသေပ်တေမ်ဗါ သၞာံ ၂၀၂၅ လောန်ကၠုၚ်ဂှ် ဒပ်ကဝ်မယှေန်ပၞာန်တံ ကလေၚ်ထိၚ်ချုက်မာန်ကၠုၚ်တုဲ ကၠာဟွံဂွံဒက်ပ္တန်အလဵုအသဳပၞာန်တၟိဏီ ဂၠံၚ်အာယှကီု သီုကဵုဒဒန် ပရေၚ်ဆာန်ကၟိန် ဗၟာ-သေံ လၟေၚ် ၂ ပ္ဍဲဍုၚ်ဗြဝတီဂှ်လေဝ် ကလေၚ်ပံက်အာရောၚ် ပရိုၚ်တိတ်မံၚ် မဒှ်ရ။
အတိုၚ်ညးဍုၚ်ကွာန်ဗြဝတီတံ ဟီုဂှ်တှ်ေ ပ္ဍဲဇုန်ကူသာန်ဗၞိက်ဗြဝတီ ကေုာံဒဒန်ပရေၚ်ဆာန်ကၟိန် ဗၟာ-သေံ လၟေၚ် ၂ တံဂှ် ပ္ဍဲမာတ် ၂၄ တုဲကၠုၚ်ဏအ် ကၠောန်လဝ်ပရေၚ်သ္အးဇ္ၚးရောၚ် ဂွံတီကေတ်ရ။
ဟိုတ်နူဂၠံၚ်အာယှ ဗြဝတီ-ကအ်ကြိက် သၞာံလအ်လဒးဒုၚ်ကၟာတ်လဝ်တုဲ သွက်ဂွံပလံၚ်ကပေါတ်ဗၞိက်ဂှ် ညးဍုၚ်ကွာန်တံ ဒးစကာအာကၠုၚ်မံၚ် ဂၠံၚ်ဒဵုခၟာဲစာင်၊ ဂၠံၚ်ထောအ်ကဝ်ကိုဝ်ကေုာံ ဂၠံၚ် ၁၀၁၈ မဒှ်ဒၞာဲ ကံၚ်သဳပရေၚ်ၜိုဟ်လလမ်ကရေၚ် PC ကေုာံ ဒပ်မင်ပယျဵုကရေၚ် BGF တံ ထိၚ်ချုက်လဝ်ဂှ်ရ။
ပ္ဍဲဂၠံၚ်တံဂှ် ဟိုတ်နူဂိက်ကံက်သြန်တံဂၠိုၚ်မံၚ်တုဲ ၚုဟ်အိုတ်ဂၠိုၚ်သၟးဟွံက ပရေၚ်အာကၠုၚ်လေဝ် ဒးကေတ်မံၚ် အခိၚ်နာရဳဗွဲမဂၠိုၚ် မဒှ်ရ။
လၟုဟ်ပၠန် ဟိုတ်နူၚုဟ်ကၠေၚ်စက်သၠုၚ်တိုန်အာတုဲ ၚုဟ်ကပေါတ်သဇိုၚ်တံလေဝ် သၠုၚ်တိုန်အာကီု ပရေၚ်အခက်အခုဲ သွက်ဂွံဂွံကၠေၚ်စက်ပဵုဝါတ်ဂါတ်ဂၠိုၚ်အာတုဲ သွက်ဂွံကလေၚ်ပံက်ဂၠံၚ်အာယှဂှ် ညးဒေသတံ စၟဳစမံၚ်အိုတ်ရောၚ် ဟီုဂးမံၚ်အိုတ်ရ။
ပ္ဍဲအေဗရာ ၁ သွက်ဂွံကလေၚ်ပံက်အာ ဂၠံၚ်အာယှဂှ် တၟအ်ကၠမ်ဂၠိုၚ်မံၚ်ရောၚ် သၟာကူဗၞိက်လ္တူဍုၚ်ဗြဝတီမွဲတၠ ဟီုရ။
သွက်ဂွံကလေၚ်ပံက်ဂၠံၚ်အာယှကဵု ဒဒန်ပရေၚ်ဆာန်ကၟိန် လၟေၚ် ၂ ပ္ဍဲအခိၚ်ပရိုၚ်တိတ်မံၚ်ဏံ ဂကောံသ္ကိုပ်ဒပ်ပၞာန်သေံအပ္ဍဲဒေသ ကေုာံ သ္ကိုပ်တမ်ဒပ် ခလရ ၂၇၅ ဂကောံဒပ်ပၞာန်ဗၟာတံ ဆဵုဂဗလဝ်ညးသ္ကံ ဒၞာဲဍုၚ်မေဝ်ဆံက် ဍုၚ်သေံ ပ္ဍဲမာတ် ၂၅ အခိၚ်နူဂယး ၁၀ နာရဳကဝက်ဂှ် ကီုရ။
ပေါဲဆဵုဂဗဏအ်ဂှ်တှ်ေ ကြဴနူ ဂဥုပ်သ္ကိုပ်က္ဍိုက်ပ်ဒပ်ပၞာန်သေံ ဆဵုဂဗသဳကၠဳလဝ်ကဵု ဥက္ကဋ္ဌကဝ်မယှေန်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှာၚ် ပ္ဍဲနေပျဳဒဝ် ပ္ဍဲမာတ် ၁၈ တေံတုဲ ဒှ်ပေါဲဆဵုဂဗ အကြာဒပ်ပၞာန်ၜါလပါ် ညးတာလျိုၚ်အဆံၚ်သၠုၚ်တံ မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media