ကျာ်ထဝ်၊ မာတ် ၂၆
ပ္ဍဲတွဵုရးမန် ပွိုၚ်ဍုၚ်ကျာ်ထဝ် သၟာကမၠောန် ယိုက်ကပေါတ် ၃၀ တၠ ပြၚ် ကၠောန်မံၚ်ကမၠောန် ဒၞာဲသၞေဟ်ကွာန်ကျိုက္ကတာဂှ် ဒပ်ကဝ်မယှေန်ပၞာန် လုပ်ရပ်ကေတ်ဏာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဂကောံပံၚ်ကောံကဝ်မယှေန်ပၞာန်တံဝွံ ပ္ဍဲကဵုမာတ် ၂၃ လောန်ကၠုၚ်ဏအ် အခိၚ်ဗ္တံၜိုတ် ၇ နာရဳဂှ် ပ္ဍဲသၞေဟ်ကွာန်ကျိုက္ကတာ ပွိုၚ်ဍုၚ်ကျာ်ထဝ်ဂှ် လုပ်ရပ်လဝ်ကွဳစက်ဖ္ဍိုက်ကပေါတ် ၜါမကီုရ။
သီုကဵုသၟာကမၠောန် ယိုက်ဖျေံပတိုန်မံၚ်ကပေါတ် ၃၀ တၠပြၚ် တံဂှ် ဟိုတ်ဟၟဲမွဲသာ် ဒပ်ကဝ်မယှေန်ပၞာန်ရပ်ဏာ၊ တုဲပၠန် ကွဳစက်ဖ္ဍိုက်ကပေါတ်ၜါမဂှ်လေဝ် ရပ်ဏာလဝ်မဒှ်ရ။
သၟာကမၠောန် ဒးဒုၚ်ရပ်ဏာလဝ်တံဂှ် ဒှ်မံၚ်သၟာကမၠောန် ယိုက်ကပေါတ် နူကွာန်ကျိုက္ကတာကဵု အကြာကွာန်ဗွိုၚ်ပွဳပွူတံတုဲ ဒှ်ညးတြုံ အကြာအယုက် ၁၄ သၞာံကဵု ၄၀ သၞာံတံရောၚ် သ္ဂးရ။
သၟာကမၠောန် ယိုက်ဖျေံပတိုန်ကပေါတ် နူကဝ်မယှေန်ပၞာန်ရပ်ဏာလဝ်တံဂှ် ဒဵုကဵုဂိတုမာတ် ၂၄ အခိၚ်သဝ်တ္ၚဲဂှ် ဟွံဗၠးတိတ်ကၠုၚ်ဏီပုဟ်ဂှ် ဂွံတီကေတ် နူညးဒေသတံရ။
ကပေါတ်ဗၞိက်သေံတံဂှ် နူသၞေဟ်ကွာန်ကျိုက္ကတာ နကဵုဂၠုၚ်စက်ပလံၚ်ဗစိုပ်မံၚ် လပါ်ဗဂေါတေံ ဟိုတ်နူဂွံပရိုၚ်ဂှ်တုဲ ဒပ်ကဝ်မယှေန်ပၞာန်လုပ်ရပ်ဏာလဝ်ရောၚ် ညးဒေသတံ ဟီုရ။
ပ္ဍဲကာလသီလဝ်အဝဵုဏအ် တင်ဒုဟ်ထ္ၜးဟိုတ် ကပေါတ်ဗၞိက်သေံတံလုပ်ကၠုၚ်မံၚ် နကဵုဂၠံၚ်ဒမၠု နူဒေသပယျဵုတုဲ ပ္ဍဲဂိက်သၞေဟ်စၟဳစၟတ်တံဂှ် ကဝ်မယှေန်ပၞာန် ကၟာတ်ဆိုအ်ရပ်ကၠုၚ်မံၚ် မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media