နေပျဳဒဝ်၊ မာတ် ၂၆
နူကဵုပေါဲရုဲမာဲ ကဝ်မယှေန်ပၞာန်သ္ကုတ်ကဵုသ္ကုတ် ကတဵုဒှ်ကၠုၚ်လဝ် စၠတ်ဓဝ်ညးဍုၚ်ကွာန်ကေုာံ စၠတ်ဓဝ်ကောန်ဂကူ အလန်တတိယ ပ္ဍဲကဵုကမ္မတဳတဳလၟိုန် ပန်ဂကောံဒက်ပ္တန်လဝ်တံဂှ် သ္ကိုပ်ပၞာန်တြေံတံ ကဵု အမာတ်ဗော်ပျဳခိုၚ်ဖျိုဝ်တံ ကလေၚ်ပၠတရဴလဝ်ပၠန်ရ။
ဥက္ကဋ္ဌ စၠတ်ဓဝ်ညးဍုၚ်ကွာန် ကေုာံ စၠတ်ဓဝ်ကောန်ဂကူ ၜါတၠ ပၠတရဴမံၚ်တံဂှ်တှ်ေ သီုဒှ်သ္ကိုပ်ပၞာန်တြေံသၟးဟွံက နူစၠတ်ဓဝ်ၜါဏအ် ကဵုတာလျိုၚ်ဒက်ပ္တန်လဝ် အပ္ဍဲကမ္မတဳတဳလၟိုန်တံဂှ်လေဝ် သီုစုတ်လဝ် ပူဂဵု နူကဵုဗွိုၚ်ဒပ်ပၞာန်တံရ။
အတိုၚ်ကဝ်မယှေန်ပၞာန် လလောၚ်တြးပရိုၚ်မ္ဂး ပ္ဍဲကောံဓရီုစၠတ်ဓဝ် ညးဍုၚ်ကွာန် ကၠောန်ဗဒှ်လဝ် ပ္ဍဲမာတ် ၂၃ -၂၄ ဂှ် ဥက္ကဋ္ဌ ကေုာံ ညးအုပ်ကာမွဲမွဲဂကောံမ္ဂး ၜါၜါတၠ နူကမ္မတဳဥပဒေအပြောံကေုာံ ကမ္မတဳစရၚ်သြန် ညးဍုၚ်ကွာန်တံဂှ် ရုဲစှ်သ္ပလဝ်ဒတန်တုဲရောၚ်။
ပ္ဍဲကမ္မတဳဥပဒေအပြောံ ဒက်ပ္တန်လဝ်ဏံဂှ် နဒဒှ် ဥက္ကဋ္ဌဂှ်တှ်ေ ဒံက်တာနန္ဒကျဝ်စွာ ကေုာံ ညးအုပ်ကာ ဥူတိၚ်ထောန်ဥူတံပါလုပ်တုဲ ပ္ဍဲကမ္မတဳစရၚ်သြန်ညးဍုၚ်ကွာန်ဂှ် ဥက္ကဋ္ဌ ဒုသ္ကိုပ်ပၞာန်ဇၞော်တြေံ ဥူတေဇကျဝ် ကေုာံ ညးအုပ်ကာ ဥူတေန်အံၚ်ချေတ် တံ ပါလုပ်မံၚ်ရ။
တုဲပၠန် နဒဒှ်ဥက္ကဋ္ဌ ကမ္မတဳအခေါၚ်အရာစၠတ်ဓဝ်ဂှ် နူဒေသဆန္ဒမာဲ ကုန်ဒပ် ဥူမိုၚ်မိုၚ်အုၚ် ကေုာံ ညးအုပ်ကာ ဒံက်တာကျဝ်ကျဝ်ဌေဝ် နူဒေသဆန္ဒမာဲ ထဝါဲတံဂှ် ကဵုတာလျိုၚ်ဒက်ပ္တန်အာရောၚ်။
တုပ်တဴညံၚ်ရဴသာ်ဂှ်ကီု ကမ္မတဳစၟဳစၟတ် တၚ်ဒုၚ်တာလျိုၚ်ဝန်၊ ကတိ ကေုာံ တၚ်တာလျိုၚ်အလဵုအသဳတံဂှ် ဥက္ကဋ္ဌ ဥူတာန်ထောန်ဥူ နူဒေသဆန္ဒမာဲ ကျိုၚ်တုၚ် ကေုာံ ညးအုပ်ကာ ဥူတာန်ထောန် နူဒေသဆန္ဒမာဲ ဘာသီ တံဂှ်လေဝ်ကဵုတာလျိုၚ်တုဲ ဒက်ပ္တန်အာရောၚ်။
ဥက္ကဋ္ဌ ကမ္မတဳအခေါၚ်အရာစၠတ်ဓဝ် ကေုာံ ကမ္မတဳစၟဳစၟတ် တၚ်ဒုၚ်တာလျိုၚ်ဝန်၊ ကတိကဝတ်ကေုာံ တၚ်ဒုၚ်တာလျိုၚ် အလဵုအသဳတံဂှ် သ္ကိုပ်ပၞာန်တြေံတံ ဒးဒုၚ်ကေတ်တာလျိုၚ် သီုဖအိုတ်ရ။
ဒက်ပ္တန်လဝ်ကဵု ကောန်ဂကောံ ၁၅ တၠမွဲဂကောံ ပ္ဍဲကမ္မတဳလၟိုန် ပန်ဂကောံဂှ်တှ်ေ ကောန်ဗော်ပျဳခိုၚ်ဖျိုဝ် ဓယံက်ဒပ်ပၞာန်ကေုာံ သ္ကိုပ်ပၞာန်တြေံတံ ပၠတရဴတုဲ သီုစုတ်လဝ်ကဵု အမာတ်ညးစၞးဒပ်ပၞာန် ၜါတၠမွဲဂကောံ ကေုာံ ကောန်ဗော်နူဗော်လ္ၚဵုတံလေဝ် ပါလုပ်မံၚ်ကီုရ။
ပ္ဍဲစၠတ်ဓဝ်ကောန်ဂကူလေဝ် ကမ္မတဳဥပဒေအပြောံ၊ ကမ္မတဳစရၚ်သြန် ညးဍုၚ်ကွာန်၊ ကမ္မတဳအခေါၚ်အရာစၠတ်ဓဝ်၊ ကမ္မတဳစၟဳစၟတ် တၚ်ဒုၚ်တာလျိုၚ်ဝန်၊ ကတိကဝတ် ကေုာံ တၚ်ဒုၚ်တာလျိုၚ် အလဵုအသဳ၊ ကမ္မတဳလၟိုန်ပန်ဂကောံဏံဂှ် ညံၚ်ရဴစၠတ်ဓဝ်ညးဍုၚ်ကွာန်ကီု ဒက်ပ္တန်လဝ် မဒှ်ရ။
တၚ်တၟေၚ်မွဲဂှ်တှ်ေ ပ္ဍဲကမ္မတဳဥပဒေအပြောံ စၠတ်ဓဝ်ကောန်ဂကူဂှ် ညးအုပ်ကာ ဥူဇြေန်မေန်ထက် သ္ကိုပ်ပၞာန်တြေံ နူရးဗဂေါကေုာံ ပ္ဍဲကမ္မတဳစရၚ်သြန်ညးဍုၚ်ကွာန်ဂှ်တှ်ေ ဥက္ကဋ္ဌ ဥူချေတ်သိုဲ ဒုသ္ကိုပ်ပၞာန်တြေံ နူရးဨရာဝတဳတံလေဝ် ကဵုလဝ်တာလျိုၚ်ရောၚ်။
အတိုၚ်သဇိုၚ်သၞောဝ်ဥပဒေမ္ဂး ပ္ဍဲစၠတ်ဓဝ်ညးဍုၚ်ကွာန် ကေုာံ စၠတ်ဓဝ်ကောန်ဂကူတံဂှ် ပါဲနူကမ္မတဳလၟိုန် ပန်ဂကောံတုဲ စပ်ကဵုပရေၚ်ကဏ္ဍနာနာမ္ဂး ကမ္မတဳရေၚ်တၠုၚ်ကေၚ်ကာဂမၠိုၚ်၊ ကမ္မတဳတၞဟ်ဟ်ကေုာံ ကမ္မယှေန်တံဂှ်လေဝ် ဗွဲယာယဳ ဟွံသေၚ်မ္ဂး သ္ပဒတန်ချိုတ်တ်ပၠိုတ်တ်တုဲ သွက်ဂွံဒက်ပ္တန်အာဂှ် အခေါၚ်နွံမံၚ်ရ။
ကမ္မတဳတံဏအ်ဝွံ သွက်ဂွံယိုက်ဝန်တာလျိုၚ်ဆေၚ်စပ်ကဵုစၠတ်ဓဝ် ကေုာံ စဳရေၚ်ကမၠောန်တၟေၚ်တံသၟးဟွံက သီုကဵုဂွံစၟဳစၟတ်အာ ဥပဒေအပြောံ၊ သ္ပဒတန်ဘဏ္ဍာဗာတ်ဂျိတ်၊ မၚ်ရံၚ်ကမၠောန်အလဵုအသဳ ကေုာံ ပ္ဍဲအရာကိစ္စပရေၚ် ဒှ်ဂုဏ်ဖဵုသွက်ညးဍုၚ်ကွာန်တံဂှ် ဒးပတိုန်ထ္ၜး ကဵုအာကသပ်တံ မဒှ်ရ။
ပရိုၚ် – သြၚ်လောန်တိုၚ်မ်
Photo – USDP