ကျာ်ပိ၊ မာတ် ၂၆
ပ္ဍဲဍုၚ်ကျာ်ပိ တွဵုရးကရေၚ် ပယျဵုဗၟာ-သေံဂှ် ထပ်သၠဲသိုၚ်ခၞံကၠောန်မံၚ် စမြိုၚ်ဒၞာဲတၟိ သွက်ကမၠောန် လီသြန်အန်လာၚ်ကျာဖျတံရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စပ္တံနူဂိတုဖေဖဝ်ဝါရဳ လောန်ကၠုၚ်ဏံ ပ္ဍဲဗွိုၚ်ကၠအ်ကဝ်ဖဳ ဂၠံၚ်အာဍာ်ဆင် ထဳလံၚ်ယူ ဒၞာဲကြပ်မံၚ်ကဵု ဍုၚ်ကျာ်ပိဂှ် အဃော ထပ်သိုၚ်မံၚ် စမြိုၚ်ဒၞာဲတၟိ သွက်ကမၠောန်ကျာဖျတံရ။
ကၠအ်ကဝ်ဖဳဏံဂှ် သကိုပ်ဗိုလ်ဇၞော် သဝ်အေဝါန် နူဒပ် DKBA ထိၚ်ချုက်လဝ် ဍုၚ်ကျာ်ပိဂှ် ပိုင်ပြဳလဝ်တုဲ ဗလးသၠဲနွံၜိုတ် ၇၀၀ ဨကပြၚ်တုဲ မၞုံမံၚ်ဒၞာဲဇိုၚ်ဒဵု ဂၠံၚ်အာ ဍာ်ဆင်ထဳလံၚ်ယူ မဒှ်ရ။
လၟုဟ်မ္ဂး ပ္ဍဲကဵုဒၞာဲကၠအ်ကဝ်ဖဳဏံ ထပ်သိုၚ်ကၠောန်မံၚ် စမြိုၚ်ဒၞာဲတၟိ သွက်ကမၠောန်ကျာဖျတံ လၟိဟ်ကဵုကၠံပြၚ်နွံတုဲ စကာလဝ်ဇြဟတ် သၟာကမၠောန်ၜိုတ် ၁၀၀၀ တၠပြၚ်နွံတုဲ သကိုပ်ဗိုလ်သဝ်အေဝါန်ဂှ် ချုက်လဝ်လိက် နကဵုကိုန်အစဳဇန် ၅ သၞာံနွံရောၚ် မၞိဟ်တြုံညးဒေသ မွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
အခိၚ်ကၠာတေံ ပ္ဍဲဒၞာဲဍာ်ဆၚ် ပရေလၟောၚ်သဘာဝ ကြုၚ်ထဝ်ကေုာံ ဇိုၚ်ဒဵု ကရပ်ကွာန်ကြုၚ်ၜဝ် ဂၠံၚ်ကျာ်ပိ-လှာဒကှ်တံဂှ် သိုၚ်လဝ်စမြိုၚ်ဒၞာဲ ကၠောန်မံၚ်ကမၠောန်ကျာဖျကီုလေဝ် ဟိုတ်နူပရိုၚ်မံက်အာတုဲ သွက်ဂွံပြံၚ်အာ ဒၞာဲတၟိဏံစဳဇန်လဝ် မဒှ်ရ။
ပြဟ်ဟ်ဏံ ပ္ဍဲဍုၚ်ကျာ်ပိကဵု ဗွိုၚ်ပွဳပွူတံဂှ်တှ်ေ နကဵုအရီုအဗၚ် DKBA ဂှ် ကောန်ဍုၚ်ကြုက်တံစိုပ်ကၠုၚ်မံၚ်တုဲ ကမၠောန်ကျာဖျတံဂှ်လေဝ် DKBA တံ စဵုဒၞာမၚ်မွဲကဵုလဝ်ရောၚ်။
ပ္ဍဲသၞာံ ၂၀၂၅ လောန်ကၠုၚ်ဏအ်လေဝ် စမြိုၚ်ဒၞာဲကျာဖျ မၞုံပ္ဍဲဍုၚ်တၟိ ယှိုဲကုက်ကို ပယျဵုဗြဝတီတံဂှ် ဟိုတ်နူပရေင်ဇြဟတ်ဟရိုဟ် နူဂကောံဂၠးကဝ်ကဵု ဍုၚ်ကြုက်တံဂှ်ရ ကြဴနူဒးဒုၚ်ကၟာတ်ပလီုထောံတုဲဂှ် ပြံၚ်စိုပ်အာဒၞာဲ လပါ်ဒေသဖလူကေုာံ ဒေသကျာ်ပိတုဲ ဆက်ကၠောန်မံၚ်ရောၚ်ဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media