ကျာ်ထဝ်၊ မာတ် ၂၇
ပ္ဍဲတွဵုရးမန် ပွိုၚ်ဍုၚ်ကျာ်ထဝ် ကွာန်ကျိုက္ကတာ အပ္ဍဲကဵုသၟာကမၠောန် ယိုက်ပတိုန်ဖျေံကပေါတ် ၃၀ တၠပြၚ် ဒပ်ကဝ်မယှေန်ပၞာန် ရပ်ဏာလဝ် တံဂှ် သၟတ် ၁၂ တၠ ဒးဒုၚ်ပကောံဏာ နဒဒှ်ကောန်ပၞာန်ယိုက်ဝန်ပၞာန်ယျရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုဂိတုမာတ် ၂၃ လောန်ကၠုၚ်ဏအ် ပ္ဍဲသၞေဟ်ကွာန်ကျိုက္ကတာဂှ် ဒပ်ကဝ်မယှေန်ပၞာန် စကာဇြဟတ်ဗွဲမဂၠိုၚ်တုဲ လုပ်ရပ်လဝ် ကွဳစက်ဖ္ဍိုက်ကပေါတ် ၜါမရ။
ပ္ဍဲအခိၚ်ရပ်မံၚ်ကွဳစက်ဖ္ဍိုက်ကပေါတ် ၜါမဂှ် သီုကဵုရဲဂၠုၚ်စက်၊ သၟာဒဳကွဳစက်ကေုာံ သၟာကမၠောန် ယိုက်ပတိုန်ဖျေံကပေါတ် မၞုံဗဒါဲတံ သီုဖအိုတ် ၃၆ တၠဂှ်လေဝ် ဒးဒုၚ်ရပ်ဏာလဝ် မွဲတဲဓဝ် မဒှ်ရ။
အပ္ဍဲညးဒးဒုၚ်ရပ်ဏာတံမ္ဂး သၟတ်လုပ်အဝေါၚ်ယိုက်ဝန်ပၞာန် အကြာအယုက် ၁၈ သၞာံကဵု ၃၅ သၞာံ ၁၂ တၠတံဂှ် ပလံၚ်ဗစိုပ်ဏာလဝ် ဇရေၚ်ဒပ်ပကောံကောန်ပၞာန်တၟိ ဖျေံလဝ်သ္ဇိုၚ် ပ္ဍဲမတ်မလီုဂှ် သ္ဂးရ။
ဆဂး အပ္ဍဲညးဒးဒုၚ်ရပ်လဝ်တံဏံ ညးအယုက်ဟွံပေၚ်တံကီု မၞိဟ်တြုံအယုက် ၄၀ သၞာံပြၚ် ၂၄ တၠတံ ပ္ဍဲတ္ၚဲယးမာတ် ၂၆ ဂှ် ကလေၚ်ဗၠးတိတ်ကၠုၚ်လဝ်ယျရောၚ် ဂွံတီကေတ်ရ။
သၟတ်ဒးဒုၚ်ပကောံဏာ ကောန်ပၞာန်တၟိတံဂှ် ဂကောံသ္ၚိကၟိန်ညးတံ ဂစာန်ဗက်ဂၠာဲနုက်ပတိတ်ကီုလေဝ် ပလံၚ်ဗစိုပ်ဏာလဝ် ဇရေၚ်တမ်ဒပ် တန်ဗ္တောန်ကွတ်ပၞာန် ပ္ဍဲမတ်မလီုတုဲယျ ဆၜိုတ် ကလေၚ်ကဵုနင်လဝ် ပရိုင်ဓဝ် သ္ဂးရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ပကောံလဝ်ဂှ်တှ်ေ ပ္ဍဲတွဵုရးမန် ကဝ်မယှေန်ပၞာန် ပံက်ကၠုၚ်မံၚ်တန်ဗတောန်ယိုက်ဝန်ပၞာန် နူလၟေၚ် ၁ စိုပ်လၟေၚ် ၂၃ ဂှ် သၟတ် လုပ်အဝေါၚ်ယိုက်ဝန်ပၞာန် ဟွံအောန်နူ ၄၇၀၀ တၠ ဒးဒုၚ်ပကောံလဝ် ကောန်ပၞာန်တၟိရောၚ်။
ပရိုၚ် – သြၚ်လောန်တိုၚ်မ်
Photo – Social Media