တနၚ်သဳ၊ မာတ် ၂၇
ဟိုတ်နူပေါဲဗတိုက် အကြာဒပ်ကဝ်မယှေန်ပၞာန်ကဵု ဂကောံဒပ်ပံၚ်ကောံ ဇြဟတ်ပၠန်ဂတးတံ ထတ်သကာတ်မံၚ်တုဲ ပ္ဍဲရးတနၚ်သဳဂှ် ညးဒေသကြပ်စိုပ်မွဲကိုတ် ဒးထောံဌာန်ဒၞာဲဝါဲတုဲ ဂြိပ်ပါဲဒဴမံၚ်ရောၚ် ဂွံတီကေတ် နူဂကောံသုတေသနပ္ဍဲဒေသ FE 5 Thanintharyi ရ။
လောန်ကၠုၚ် ပ္ဍဲကဵုဂိတုဖေဖော်ဝါရဳဏအ် ပ္ဍဲရးတနၚ်သဳဂှ် ပေါဲဗတိုက်ဒပ်ၜါလပါ်တံသၟးဟွံက ဟိုတ်နူ ဒပ်ကဝ်မယှေန်ပၞာန် ပန်ဗတိုက်မံၚ်ကဵု ဒပ်ပၞာန်ကျာ ဒပ်ပၞာန်ဍာ်တံတုဲ ညးဍုၚ်ကွာန်ၜိုတ် ၈၉၇၀၀ ထောံဌာန် ဒၞာဲဂြိပ်ပါဲမံၚ် ဘဲပၞာန်ရ။
တုဲပၠန် ဒပ်ကဝ်မယှေန်ပၞာန်တံ အခိၚ်ထပက်ကရောၚ်ပၞာန်လုပ်ကၠုၚ်ကွာန်မ္ဂး ရပ်ညးဍုၚ်ကွာန်တံတုဲ သ္ပဂဒံၚ်မၞိဟ်၊ ဂစိုတ်မၞိဟ်၊ စံၚ်ပလီုသ္ၚိဌာန်ကဵု ပန်မံၚ်လွဟ်ဇၞော်တံဂှ်ရ ညးဒးဂြိပ်ပါဲဒဴဘဲပၞာန်တံ ဒးဆက်မၞုံအာမံၚ် မဒှ်ရ။
ပ္ဍဲပွိုၚ်ဍုၚ်တယိတ်ချံၚ် မွဲပွိုၚ်ဍုၚ်ဓဝ်ဂှ်ရ ဟိုတ်နူဒပ်ကဝ်မယှေန်ပၞာန် ဗတိုက်လဝ် နကဵုဒပ်တိုက်၊ ဒပ်ဍာ်၊ ဒပ်ကျာတုဲ နူကဵု ၂၀ ကွာန် ညးဒေသ ၁၇၀၀၀ ပြၚ် ဒးထောံသ္ၚိဌာန် ဂြိပ်ပါဲဒဴအာအိုတ်ရ။
အပ္ဍဲခရိုၚ်ဗိက် ပွိုၚ်ဍုၚ်ပလဝ်၊ ဗိက်၊ ကျောန်သု ကေုာံ တနၚ်သဳတံလေဝ် ဟိုတ်နူပေါဲဗတိုက် အကြာဒပ်ၜါလပါ်ဒှ်တုဲ ညးဒးထောံသ္ရိ ဌာန်ဒၞာဲပါဲဒဴဘဲပၞာန် ၅၂၇၀၀ ပြၚ် မၞုံမံၚ်ရောၚ် သ္ဂးရ။
မွဲလပါ်ပၠန် ဂၠံၚ်ကွဳစက် ဗိက်-ထဝါဲဂှ် စနူဖေဖော်ဝါရဳ ၈ တေံ ကၟာတ်လဝ် အခေါၚ်အာကၠုၚ်တုဲ သီုကဵုကုတ်ထပိုတ်လဝ် လိုၚ်ဆက်စၠောံတံဂှ်ရ ပ္ဍဲဒေသ စၞစဇွောံမ အိုတ်ပိုတ်အာတုဲ ၚုဟ်ကပေါတ်တံသၠုၚ်တိုန်မံၚ်ရောၚ် ချူထမံက်လဝ်ရ။
ပ္ဍဲကဵုဂိတုဂျာန်နဝါရဳ လောန်ကၠုၚ်တေံလေဝ် ပ္ဍဲရးတနၚ်သဳ ဟိုတ်နူဒပ်ကဝ်မယှေန်ပၞာန် ပန်လွဟ်ဇၞော် ဗတိုက်လဝ်နကဵုၜၚ်ကျာတံတုဲ ညးဍုၚ်ကွာန် ၈၅၀၀၀ ပြၚ်ၚ် ဒးဂြိပ်ပါဲဒဴလဝ်ဘဲပၞာန်နွံ ဂွံတီရ။
ပရိုၚ် – သြၚ်လောန်တိုၚ်မ်
Photo – CJ