ပလဝ်၊ မာတ် ၂၇
ပ္ဍဲကဵုရးတနၚ်သဳ ပွိုၚ်ဍုၚ်ပလဝ် ကရပ်ကွာန်မဳလံၚ်ချံၚ်ဂှ် မၞိဟ်တြုံမွဲတၠ လိုန်ဒးမာၚ်တပ်တိတုဲ ဒးကုတ်ထောံဇိုၚ်မွဲလပါ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ် ပ္ဍဲကဵုမာတ် ၂၄ ဏအ် ကောန်ကွာန်မဳလံၚ်ချံၚ် မာံအံၚ်သဵု အယုက် ၂၁ သၞာံ အခိၚ်အာဗက်ၜှ်မံၚ်သၞေဝ် ဗဒါဲကွာန်ဂှ် လိုန်ဒးမာၚ် တပ်တိတုဲ ခတိုဟ်အာရ။
ဟိုတ်နူဒဏ်မာၚ်တပ်တိဂှ် ဂတာဇိုၚ်ပါဲ မာံအံၚ်သဵု သၠေက်အာတုဲ ဒးကုတ်ထပိုတ်ထောံနူကအ်ဇိုၚ် မဒှ်ရ။
ပြဟ်ဟ်ဏံတှ်ေ မိုၚ်အံၚ်သဵု ညးလိုန်ဒးလဝ်မာၚ်တပ်တိဏံဂှ် အဃောတိုန်လွဳမံၚ်ယဲ ပ္ဍဲကဵုရုၚ်ဂဥုဲညးဍုၚ်ကွာန် ခရိုၚ်ဗိက်ဖိုဟ်ရောၚ်။
ကွာန်မဳလံၚ်ချံၚ် မာၚ်တပ်ခတိုဟ်လဝ်ဂှ်တှ်ေ ဒှ်ဒၞာဲ ဒပ်ကဝ်မယှေန်ပၞာန်တံကဵု ဒပ်ပၞာန်ဗၠးၜးကောန်ဂကူကရေၚ် KNLA ဂကောံဇြဟတ်ပၠန်ဂတးတံ ချဳဒရာၚ်မံၚ်ပရေၚ်ပၞာန်ရောၚ်။
ဆဂး စပ်ကဵုမာၚ်တပ်တိ ခတိုဟ်လဝ်ဏအ်တုဲ နူဂကောံၜါလပါ်တံ ဒဵုကဵုအခိၚ်လၟုဟ် လလောၚ်တြးလဝ် ပရိုၚ်မွဲမွဲသာ်ဂှ် ဟွံဂွံဆဵုညာတ်ဏီပုဟ်။
ပ္ဍဲကဵုဂိတုဖေဖော်ဝါရဳ ၁၃ လောန်ကၠုၚ်ဏအ်လေဝ် ပ္ဍဲကွာန်သၞေဟ်ဇြပ် ဍုၚ်ပလ ပွိုၚ်ဍုၚ်ပလဝ်ဂှ် တၠသ္ၚိကဵုသမ္ဘာ တြုံကဵုဗြဴၜါတၠ အခိၚ်အာဂြိုပ်ဂှ် လိုန်ဒးမာၚ်တပ်တိတုဲ ချိုတ်အာလဝ်နွံရောၚ် ဂွံတီလဝ် နူညးဒေသတံရ။
ပရိုၚ် – သြၚ်လောန်တိုၚ်မ်
Photo – CJ