ဖာပန်၊ မာတ် ၂၈
ပ္ဍဲကဵုတွဵုရးကရေၚ် နူကဵုဌာန်ဂအုပ်တမ်ဒပ်ခမရ ၃၄၁ ဒပ်ကဝ်မယှေန်ပၞာန် ဖျေံသ္ဇိုၚ်ပ္ဍဲပွိုၚ်ဍုၚ်ဖာပန် သ္ကိုပ်ဗိုလ်မွဲတၠ ကေုာံ မၞိဟ်ဗြဴၜါတၠတံဂှ် ပတိုန်စရာဲအပ်ပြာပ်ဇိုန်နှၚ်ကဵု တဆိပ်ကြာသူရ ရဂှ် လပါ်ကဝ်မယှေန်ပၞာန် လလောၚ်ပ္တိတ်လဝ်ပရိုၚ်ရ။
သွက်သဘၚ်စၟတ်သမ္တီ တ္ၚဲဒပ်ပၞာန် ပေၚ် ၈၁ သၞာံ ပ္ဍဲမာတ် ၂၇ တုဲ ကုညးတာလျိုၚ်ဒပ်၊ ကောန်ဒပ်ဗၠာဲသၟိၚ်ကေုာံ မၞိဟ်ပူဂဵုတံဂှ် နူကဝ်မယှေန်ပၞာန် ပတိုန်စရာဲဇိုန်နှၚ်ကဵု တဆိပ်ကြာသူရ၊ တဆိပ်စၟတ်သမ္တီ သရာဲသဂံၚ် ကေုာံ တဆိပ်ဂံၚ်သ္ကာဗလတံရောၚ်။
ညးဒးဒုၚ်ပတိုန်စရာဲ တဆိပ်ကြာသူရတံဂှ်တှ်ေ နူတမ်ဒပ်ခမရ ၃၄၁ ဖျေံသ္ဇိုၚ်ပ္ဍဲဍုၚ်ဖာပန် သ္ကိုပ်ဗိုလ် ဇြဝ်မျဵုနိုင် ကေုာံ သ္ဂံၚ်ဗြဴတၠအိန်ထံၚ် ဒဝ်သာန်သာန်မဝ်၊ ဒဝ်သနေမတံ မဒှ်ရ။
တဆိပ်ကြာသူရဝွံ ပ္ဍဲဒပ်ပၞာန်ဗၟာမ္ဂး ကြဴနူ တဆိပ်အံၚ်သာန်သူရိယ ကေုာံ တဆိပ်သဳဟသူရတုဲ ဒှ်တဆိပ်အဆံၚ်တတိယ ဂုဏ်သိက္ခာစရာဲ သၠုၚ်အိုတ်မွဲရ။
တဆိပ်ကြာသူရဝွံ အပ္ဍဲပေါဲဗတိုက် ဟွံစွံလဝ်ပဓာနကဵုလမျီု သွက်ဖဵုဂုဏ်ဍုၚ် သၠဖဵုဂစာန်ဗတိုက်လဝ်ဂံၚ်ၚ်သ္ကာသ္ကာတံဂှ် ပတိုန်စရာဲကဵုတဆိပ်ရောၚ် ဂွံတီကေတ်နူဗွိုၚ်ဒပ်ပၞာန်ရ။
ပ္ဍဲသဘၚ်စၟတ်သမ္တီ တ္ၚဲဒပ်ပၞာန် ပေၚ် ၈၁ သၞာံဂှ် ပါဲနူ တဆိပ်ကြာ သူရတုဲ တဆိပ်စၟတ်သမ္တီသရာဲသဂံၚ် ၇ တၠ၊ တဆိပ်ဂံၚ်သ္ကာဗလ ၃၂ တၠတံ ကဝ်မယှေန်ပၞာန် ပတိုန်စရာဲဇိုန်နှၚ်အပ်ကဵုလဝ် မဒှ်ရ။
တမ်ဒပ်ခမရ ၃၄၁ ဖျေံသ္ဇိုၚ်ဖာပန်ဂှ် မၞုံဗဒါဲဒကဲ ဗျူဟာဖာပန်တုဲ သီုကဵုဗျူဟာဖာပန် ကေုာံ တမ်ဒပ်သှ်ေၜက်မံၚ် ခမရ ၃၄၁၊ ခမရ ၃၄၀ တံဂှ် ဂကောံဇြဟတ်ပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA အာက္ဍိုပ်တံ ဗိုၚ်ကၟာတ်ဆိုအ်လဝ်တုဲ ဗတိုက်မံၚ် ပွိုၚ်ၜါသၞာံပြၚ် မဒှ်ရ။
ညံၚ်ဗျူဟာဖာပန် ဟွံဂွံကျအာဂှ် လပါ်ဒပ်ကဝ်မယှေန်ပၞာန်တံ နကဵုၜၚ်ကျာ ကြဳမံၚ်ဗုမ် ဇၟာပ်ပ်တ္ၚဲကီု နူဗလးတိလေဝ် သွက်ဂွံကဵု အရီုအဗၚ်ပၞာန်မာန် ထပက်ကရောၚ်ပၞာန်ဗတိုက်မံၚ်တုဲ ပ္ဍဲတိဍာ်မဟာဒပ် ၅ ခရိုၚ်ဖာပန်ဂှ် ပေါဲဗတိုက်တံ ဆက်သကာတ်မြဟ်မံၚ်ဖိုဟ်ရောၚ်။
ပရိုၚ် – သြၚ်လောန်တိုၚ်မ်
Photo – Social Media