မတ်မလီု၊ မာတ် ၂၈
ပ္ဍဲတွဵုရးမန် ဟိုတ်နူကၠေၚ်စက်ပိုတ်အာကီုတုဲ ၚုဟ်ကၠေၚ်စက်ဂှ် ဆအပ္ဍဲပွိုၚ်မွဲတ္ၚဲဓဝ်ဟေၚ်ဂှ် မွဲလေတ်မ္ဂး ၁၀၀၀ ဒကေဝ်ပြၚ် ၚုဟ်သၠာ်တိုန်အာ ဟဂှ်ရ။
ၚုဟ်ကၠေၚ်ဓာတ် 95 ပ္ဍဲမာတ် ၂၆ ဂှ် မွဲလေတ် နွံၜိုတ် ၃၉၅၅ ဒကေဝ် ကီုလေဝ် ပ္ဍဲမာတ် ၂၇ ဂှ်တှ်ေ မွဲလေတ်မ္ဂး တိုန်အာစိုပ် ၅၁၉၅ ဒကေဝ်တုဲ မွဲလေတ်ၚုဟ်သၠာ်တိုန်အာ ၁၂၀၀ ဒကေဝ်ရ။
တုပ်တဴညံၚ်ရဴသာ်ဂှ်ကီု ကၠေၚ်ဒဳဇြေလ်ပရဳမဳယာမ်လေဝ် မွဲလေတ် နူ ၅၀၃၀ ဒကေဝ်ဂှ် တိုန်အာ ၆၄၂၀ ဒကေဝ်၊ ကၠေၚ်ဓာတ် 92 ဂှ်လေဝ် မွဲလေတ် နူ ၃၇၆၅ ဒကေဝ် တိုန်အာ ၄၈၂၅ ဒကေဝ် မဒှ်ရ။
ၜိုန်ရၚုဟ်ကၠေၚ်စက် တိုန်မံၚ်ဆက်ဆက်ကီုလေဝ် ဆေၚ်ကၠေၚ်စက်ဗွဲမဂၠိုၚ် ကၟာတ်လဝ်ပရေၚ်သွံရာန်တုဲ ဒးဆဵုဂဗမံၚ်ကဵု အကာဲအရာဗက်ဂၠာဲရာန်ကၠေၚ်ဟွံဂွံ ဒှ်မံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူပေါဲပၞာန်အဳရာန် ပ္ဍဲဒေသဗၟံက်အဒေါဝ်တုဲ ၚုဟ်ကၠေၚ်စက်ဂှ် ပ္ဍဲဂိတုမာတ် ပွိုၚ်ၜါသတ္တဟဏအ်ဟေၚ် မွဲလေတ်မ္ဂး ထပက်တိုန်အာ ၂၀၀၀ ဒကေဝ်ပြၚ်တုဲ ညးဍုၚ်ကွာန်တံ ဒးဒုၚ်စသိုၚ်မံၚ် ဘဲကၠေၚ်စက်အိုတ် ယီုပီုဟွံမာန် ဒှ်အာရ။
ဟိုတ်နူကၠေၚ်စက်ပိုတ်အာကီု ပရေၚ်အခက်အခုဲ ရာန်ဝါတ်ဂါတ်မံၚ်တုဲ ကမၠောန်ပရေၚ်ပိုန်ဒြပ် ပ္ဍဲတွဵုရး ဗွဲမဂၠိုၚ်တံဂှ် ဒးဂဗဆဵုမံၚ်ကဵု အကာဲအရာဒးဒေါအ်ထောံရောၚ် သာ်ဝွံ တၠကမၠောန်တံ သ္ဂးရ။
ပ္ဍဲဒေသဂှ်တှ်ေ ဟိုတ်နူၚုဟ်ကၠေၚ်စက်သၠုၚ်အာကီု ရာန်ဝါတ်အာကီုတုဲ ပ္ဍဲဆေၚ်ဖျာဒမၠုကၠေၚ်မွဲလေတ် ၚုဟ်စိုပ်မံၚ် နူ ၁၂၀၀၀ ဒကေဝ် ဒဵုကဵု ၁၅၀၀၀ ဒကေဝ်ရောၚ်။
ၜိုန်ရ ပရေၚ်ကၠေၚ်စက်ပိုတ်ကတဵုဒှ်မံၚ်ကီုလေဝ် ပ္ဍဲဍုၚ်ဗၟာဝွံ ကၠေၚ်ခြိုၚ်စွံဒေပ်လဝ် သွက် ၄၀ တ္ၚဲ နွံမံၚ်တုဲ ၜၚ်ဖ္ဍိုက်ကၠေၚ်ရာန်လဝ် ၁၉ မ နွံမံၚ်ရောၚ် ညးအခါင်ဟီုဂးနွံ ကဝ်မယှေန်ပၞာန် သ္ကိုပ်ပၞာန် ဇြဝ်မေန်ထောန် ဟီုလဝ် ပ္ဍဲမာတ် ၁၄ တေံရ။
ပရိုၚ် – သြၚ်လောန်တိုၚ်မ်
Photo – CJ