မတ်မလီု၊ မာတ် ၂၈
ဂကောံပၞာန်ဗၟာ ဆက်ဖံက်ပကဝ်မံၚ် အမှုရာဇဝတ်ပၞာန် ကေုာံ ကြဳမံၚ်ဗုမ်ကဵုၜၚ်ကျာတံ ညံၚ်ကေတ်ကၠေၚ်ၜၚ်ကျာဟွံဂွံဂှ် ဗွဲမပြဟ် သွက်ဂွံ ကၟာတ်ဆိုအ်အာ နွံမံၚ်ပၟိက်ရောၚ် နူကဵုဂကောံချဳဒရာၚ် ကုတ်ထပိုတ်သြန် ကၠိဆီ ပ္တိတ်လဝ်လိက်လလောၚ်တြး ပ္ဍဲမာတ် ၂၆ ရ။
ဂကောံပၞာန်ဗၟာတံ ဂွံမံၚ်ကၠေၚ်ၜၚ်ကျာကေုာံ အရီုအဗၚ်ဒုၚ်လျိုၚ် လပါ်ဂၠံၚ်ဍာ် နူကမ္မဏဳဂၠးကဝ်တံဂှ် ညံၚ်ဂွံပ္ညဳပ္ညပ် ဖျေံအာဒဏ် ကၟာတ်ဆိုအ် ဗွဲမပြဟ်မာန် ပ္ဍဲအကြာဒေသကဵု ဂၠးကဝ်တံဂှ် ထပ်တုဲ အာတ်မိက်လဝ်ရောၚ်။
နကဵုအလဵုအသဳဂၠးကဝ်တံကီု သီုကဵုအာသဳယာန်၊ ဍုၚ်ယူရောပ် ကေုာံ ယူကေတံဂှ် ကုဂကောံပၞာန် ဂိုဏ်ရာဇဝတ်ဏအ်ဂှ် နဒဒှ် အလဵုအသဳ လုပ်သၞောဝ်ဍုၚ်ဗၟာမွဲရောၚ် လ္ပပစၟတ်သမ္တီလးလးညိဂှ် ဗ္တိုက်ဖ္အောဝ် လဝ်ဂှ် ဂွံဆဵုကေတ်ရ။
တုဲပၠန် သွက်ဂွံပဒေါအ်ထောံ ပရေၚ်ကြဳဗုမ်ၜၚ်ကျာ ကေုာံ ရာဇဝတ်ပၞာန် ဂကောံပၞာန်ဖံက်ပကဝ်မံၚ် လ္တူညးဍုၚ်ကွာန်တံဂှ် နကဵုအလဵုအသဳဂၠးကဝ်တံ ပံၚ်တောဲအာတုဲ ဒးကေတ်အရေဝ် ဖျေံဒုဟ်ဒဏ်ရောၚ် အာတ်မိက်လဝ်ရောၚ်။ ပ္ဍဲဍုၚ်ဗၟာဝွံ ကြဴနူ ပေါဲရုဲမာဲအလီတုဲ ဂကောံပၞာန် ကော်မံၚ်စၠတ်ဓဝ် ဆဒုၚ်ယၟုကီုလေဝ် မွဲလပါ်ပၠန်ဂှ်တှ်ေ ပရေၚ်ကြဳဗုမ်ၜၚ်ကျာ ရန်တၟံ ပတဝ်လဝ်ကဵု ညးဍုၚ်ကွာန် နဒဒှ်ပွန်ဒၞာဲတံဂှ် ထပ်သၠုၚ်အသိၚ်တုဲ ဆက်ဖံက်ပကဝ်မံၚ်ဖိုဟ်ရ။
ဟိုတ်နူပဋိပက္ခပၞာန် ပ္ဍဲဒေသဗၟံက်အဒေါဝ်တုဲ ပ္ဍဲဇၟာပ်ဍုၚ်ဂၠးကဝ်တံဂှ် ဒးဆဵုဂဗမံၚ်ကဵု ပရေၚ်ဝါတ်ဂါတ်ခက်ခုဲ ကၠေၚ်ဍေၚ်အရိုၚ်တုဲ အဃောဂစာန်မံၚ် ညံၚ်ကၠေၚ်ၜၚ်ကျာကဵု ကၠေၚ်စက်ဂွံရုံဂပ်ဂှ် လပါ်ဂကောံပၞာန်ဗၟာတံ နနဲအဓ္ဓမ သီကေတ်ထောံကၠေၚ်ၜၚ်ကျာ ညးဍုၚ်ကွာန်ဂွံသုၚ်စောဲဂှ်တုဲ ကြဳဗုမ်ဗတိုက်မံၚ် ညးဍုၚ်ကွာန်တံ မဒှ်ရ။
ပ္ဍဲဂိတုမာတ် သၞာံ ၂၀၂၆ ဏံ ဟိုတ်နူ ပရေၚ်ဗတိုက်လဝ်ကဵုၜၚ်ကျာဂှ် ညးဍုၚ်ကွာန်ဟွံအောန်နူ ၂၀ တၠ ချိုတ်တုဲ နကဵုဂအုံကလောအ် ပန်ဝါဂှ် ကောန်ၚာ်၊ မၞိဟ်ဗြဴ၊ သၚ်ဂမၠိုၚ် မၞိဟ် ၂၀၀ တၠပြၚ်ဒးချိုတ်အာ တုဲ ဗွဲမဂၠိုၚ်ဂှ်လေဝ် ဒးအာဝပ်ဘဲဒဏ်နွံရ။
ဟိုတ်ဂှ်ရ ပေါဲဗတိုက် နကဵုပၞာန်ကျာတံဏအ်ဂှ် ဒှ်အရာဒးထံက်ထ္ၜး ကဵုသမ္တီ ကုအလဵုအသဳဂၠးကဝ်တံ အကြာဍုၚ်ဂမၠိုၚ် ပ္ညဳပ္ညပ်ဖျေံဒဏ် ကၟာတ်ဆိုအ်ပရေၚ်ကေတ်အရေဝ် ဗိုန်ဗိုန်ဗတ်ဗတ်ဟၟဲမံၚ်တံဂှ် ပ္ညုၚ်ထ္ၜးကဵုဏာလဝ်လျးပၟတ်ရောၚ် ဂကောံချဳဒရာၚ် ကုတ်ထပိုတ်သြန်ကၠိဆီ ထံက်ထ္ၜးလဝ်ရ။
ပရိုၚ် – သြၚ်လောန်တိုၚ်မ်
Photo – MOI