မတ်မလီု၊ မာတ် ၂၈
ပ္ဍဲတွဵုရးမန် ဟိုတ်နူကၠေၚ်စက်ဝါတ်ဂါတ်အိုတ်ပိုတ်အာကီု ပရေၚ်အခက်အခုဲရာန်ကၠေၚ်ဟွံဂွံဂှ်တုဲ ကမၠောန်အဇာဍောတ်၊ အဇာအဒေါဝ် ပ္ဍဲဒေသ ကမၠောန်ပရေၚ်ပိုန်ဒြပ်ဗွဲမဂၠိုၚ် ကြပ်ဒးဒေါအ်အာအိုတ်ယျရောၚ်ဂှ် တၠကမၠောန်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကမၠောန်ပရေၚ်ပိုန်ဒြပ်ဗွဲမဂၠိုၚ်တံဂှ် ဟိုတ်နူပၟတ်ဓါတ်လလဳ ကၠုၚ်ဟွံမှာန်ဂှ်ရ အဓိက ဒးပတှ်ေစကာမံၚ် စက်ပၟတ်ဇၞော်ဇၞော်တံတုဲ ပ္ဍဲအရာကဏ္ဍဖ္ဍိုက်ပလံၚ်တံလေဝ် နွံပၟိက်ကဵုကၠေၚ်စက်တုဲ သွက်ကမၠောန် ဂွံဂေတ်အာလၟေၚ်ဍာံမာန်ဂှ် ဒးဇီုကပိုက်မံၚ်ကဵု အခက်အခုဲကြေပ်ဂြတ်ရ။
ဟိုတ်နူ ဒှ်မံၚ်ပရေၚ်အခက်အခုဲဝါတ်ဂါတ် ဒးရာန်ကၠေၚ်စက်ဗီုဏအ်တုဲ ကမၠောန်ဗွဲမဂၠိုၚ် ဒးယှအ်ဖျေံကမၠောန်၊ ကၠောန်ၜိုတ်ဂွံ နကဵုအခိၚ်အပိုၚ်အခြာမွဲဍောတ်ဓဝ်တုဲ သီုကဵုကမၠောန်ကၠောန်ကၠုၚ်လဝ် လၟေၚ်ၚ်တံဂှ် ကၠောန်ဟွံမာန်တုဲ ကမၠောန်ပရေၚ်ပိုန်ဒြပ်တံ ဒှ်ကၠုၚ်အကာဲအရာ ဟောံဗြောမ်စှ်ေအာမာန် မဒှ်ကီုရ။
ဟိုတ်နူအခက်အခုဲ ဝါတ်ဂါတ်ကၠေၚ်စက်တုဲ ကမၠောန်ပရေၚ်ပိုန်ဒြပ်ကဆံၚ်ဇၞော်ဍောတ် အိုတ်သီုတံဟွံရုဲ ပရေၚ်ဇီုကပိုက်မၞုံကၠုၚ်တုဲ ယဝ်ရဆက်အာမံၚ်အတိုၚ်ဗီုဏအ်မ္ဂး ပရေၚ်ပိုန်ဒြပ်တံဂှ် စိုပ်အာအကာဲအရာ ပရေံအိုတ်မာန်ရောၚ် တၠကမၠောန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကၠေၚ်စက်ဏအ်ဂှ်တှ်ေ ပ္ဍဲအရာကမၠောန်ဇၞော်ဇၞော်တံ ဂွံဂေတ်အာမန်ဂှ် ဂိဂၠိုၚ်ကွေံရ။ ကမၠောန်ဍောတ်တ်တံလေဝ် အလိုက်ဍေံကဵုဍေံ ဒးဘဲရ။ ရုၚ်စက်ဇၞော်ဇၞော်တံဂှ်တှ်ေ ယဝ်ပၟတ်ကၠုၚ်တှ်ေ တော်စဂွံညိ၊ ယဝ်ပၟတ်ဟွံကၠုၚ်တှ်ေ သဘဴကမၠောန်ဂှ် ဒးဒေါအ်ထောံရ။ အယောၚ်အလာဂတတေံလေဝ် ယဝ်ရဆက်အာမံၚ် အတိုၚ်ဗီုဏအ်မ္ဂး ပရေၚ်ပိုန်ဒြပ် စိုပ်အာအကာဲအရာပရေံအိုတ်မာန်ဏောၚ်” သာ်ဝွံ သ္ဂးရ။
တုဲပၠန် ဟိုတ်နူပရေၚ်အခက်အခုဲရာန်ကၠေၚ်စက်ဝါတ်တုဲ ကမၠောန်ဗွဲမဂၠိုၚ် အတိုၚ်ပကတိဂေတ်ဟွံမာန်တုဲ ပရေၚ်ကပေါတ်ပတိတ် ပ္ဍဲဒေသတံယုတ်ဒေက်ဟုတ်စှ်ေအာသၟးဟွံက သီုကဵုကောန်ကမၠောန်ဒးဗ္ဒဗ္ဒါဲမံၚ် ကမၠောန်တံဏံဂှ်လေဝ် ဒးဆဵုဂဗအာအခက်အခုဲမာန်ရောၚ် ညးဆက်ဟီုရ။
ဟိုတ်နူပရေၚ်အခက်အခုဲ ဝါတ်ဂါတ်ကၠေၚ်စက်တုဲ ကဏ္ဍပရေၚ်ပိုန်ဒြပ်နာနာတံဂှ် ဖဵုပရေၚ်ဂွံဒးဇီုကပိုက်အာ ပရေံပရေံနွံမံၚ်တုဲ ကမၠောန်ပရေၚ်ပိုန်ဒြပ်တံဟောံဗြောမ်စှ်ေအာမာန်ရောၚ် တၠကမၠောန်တၞဟ်မွဲတၠပၠန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကဏ္ဍနာနာအိုတ်သီုရ။ ကမၠောန်ကွတ်စက်၊ ပရေၚ်တဵုလွဳ၊ ပရေၚ်လွဳပရာ ဒးစကာကၠေၚ်ဍေၚ်တုဲမှ ကၠောန်အာဂွံတံဂှ် ဇီုကပိုက်အာအိုတ်ရ။ ပ္ဍဲပရေၚ်ဗၞိက်လေဝ် ၚုဟ်ပလံၚ်ကပေါတ်တံ သၠုၚ်တိုန်အာဗွဲမဂၠိုၚ်တုဲ ၚုဟ်ကပေါတ်တံလေဝ် သၠုၚ်ဗက်တိုန်အာကီုရ။ ဇီုကပိုက်အာမံၚ်ပရေံကွေံကွေံဏောၚ်။ လၟုဟ်ဏအ်တှ်ေ ဗွဲမဂၠိုၚ် ဗြောမ်စှ်ေအာမာန်သၟးဟွံက သီုကဵုၚုဟ်ကပေါတ်တံလေဝ် သၠုၚ်တိုန်အာ ဟွံတာန်ကဵုအဆဏောၚ်” သာ်ဝွံ သ္ဂးရ။
မွဲလပါ်ပၠန် နူကဵုဌာနစၟဳစၟတ်ထိၚ်ကြာပ်ကပေါတ် ပတိတ်ကၠေၚ်ဍေၚ် တွဵုရးမန် သၟဝ်တဲကဝ်မယှေန်ပၞာန်ဂှ် သွက်တာဝါတိုၚ်ဖုၚ် ကေုာံအရာမစကာ ပ္ဍဲကမၠောန်တၞဟ်တံဂှ် ယဝ်ရသွံကဵုမ္ဂး ဒးနွံကဵု လိက်ထံက်ဂလာန် နူသ္ကိုပ်အုပ်ဓုပ်ပွိုၚ်ဍုၚ်ဆေၚ်စပ်တံ စၟဳစၟတ်လဝ်ဂှ်မှ သွံကဵုရောၚ် လလောၚ်တြးလဝ်ကီုလေဝ် ပ္ဍဲဗလးတိဍာံဍာံဂှ်တှ်ေ ရာန်ကေတ်ဟွံဂွံပုဟ်။
တုဲပၠန် ဆေၚ်ကၠေၚ်စက်တံလေဝ် ညံၚ်ဟွံဂွံသွံနကဵုစေဝ်၊ တိုၚ်ကဳပေပါတံဂှ် ကဵုလဝ်စၞောန်နွံတုဲ ပ္ဍဲဒေသဂှ် ကမၠောန်အဇာ ဍောတ်၊ အဇာလဒေါဝ် ကမၠောန်ဍောတ်တ်တံသၟးဟွံက သီုကမၠောန်ဇၞော်ဇၞော်တံလေဝ် ဒးဇီုကပိုက်မံၚ်ကဵု အခက်အခုဲကၠေၚ်စက်ရောၚ်။
လၟုဟ်ပၠန် ၚုဟ်ကၠေၚ်စက်တံသၠုၚ်တိုန်အာ ဟွံတန်ကဵုအဆသၟးဟွံက အတိုၚ်နွံပၟိက်ရာန်ကေတ်ဟွံဂွံ၊ ဒးၜေတ်ရေၚ်မၚ်မံၚ် အခိၚ်လအ်လ၊ ဒးရာန်နကဵုသၞောတ်စောံ၊ မ သၟးဟွံက သီုကဵုဆေၚ်ကၠေၚ်တံလေဝ် သွံကဵုမံၚ် နကဵုအပိုၚ်အခြာအခိၚ်ပၠန်ရောၚ်။
ပ္ဍဲတွဵုရးမန်ဝွံ ဟိုတ်နူပေါဲပၞာန်အဳရာန်တုဲ စပ္တံနူဂိတုမာတ်သတ္တဟ ပထမတုဲ ကၠေၚ်စက်တံအိုတ်ပိုတ်အာကီု ရာန်ကေတ်ဟွံဂွံဂှ်တုဲ ကမၠောန်ပရေၚ်ပိုန်ဒြပ်တံသၟးဟွံသေၚ် သီုပရေၚ်ပိုန်ဒြပ် ပရေၚ်မၞိဟ်တံလေဝ် ဇီုကပိုက်ကၠုၚ်မံၚ် ဇၞော်ကဵုဇြဟတ်ဒှ်မံၚ်ရ။
ပရိုၚ် – သြၚ်လောန်တိုၚ်မ်
Photo – CJ