တယိတ်ချံၚ်၊ မာတ် ၂၉
ပ္ဍဲရးတနၚ်သဳ ပွိုၚ်ဍုၚ်တယိတ်ချံၚ် ဟိုတ်နူပေါဲဗတိုက် အကြာဒပ်ၜါလပါ်ဒှ်မံၚ်တုဲ ဂၠံၚ်ဗိက်-ထဝါဲ ကၟာတ်လဝ် ပွိုၚ်မွဲဂိတုပြၚ်ဂှ် ကလေၚ်ပံက်ကဵုယျ သာ်ဝွံ ဂွံတီကေတ် နူသၟာဒဳကွဳစက်ဖ္ဍိုက်ကပေါတ်တံရ။
ဂၠံၚ်ဗိက်-ထဝါဲဂှ် စပ္တံ နူဂိတုမာတ် ၂၈ နူဂယးတုဲ ဒပ်ပၞာန်ဗၠးၜးကောန်ဂကူကရေၚ် KNLA ကေုာံ ဂကောံဒပ်ပံၚ်ကောံမဟာမိတ်ပၠန်ဂတးတံ ကလေၚ်ပံက်ကဵုလဝ် မဒှ်ရ။
ဟိုတ်နူကလေၚ်ပံက်ကဵု ဂၠံၚ်ဗိက်-ထဝါဲတုဲ ကွဳစက်အာကၠုၚ်တရဴ ကၟာတ်ဆိုအ်မံၚ် နကဵုလၟိဟ်ကၠံတံဂှ်တှ်ေ လၟုဟ် ကလေၚ်အာကၠုၚ်မံၚ် အတိုၚ်ပကတိဂွံအာယျရောၚ် သၟာဒဳကွဳစက်ဖ္ဍိုက်ကပေါတ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူဖေဖော်ဝါရဳ ၈ လောန်ကၠုၚ်တေံ ဂကောံဇြဟတ်ပၠန်ဂတးတံ ကၠောန်လဝ်ပေါဲဗတိုက်သီဗ္ဒိုပ်ဝေန်ဝ ဒၞာဲကဝ်မယှေန်ပၞာန် မၞုံမံၚ် ပွိုၚ်ဍုၚ်တယိတ်ချံၚ်ဂှ်တုဲ ဂၠံၚ်ကွဳစက် ဗိက်-ထဝါဲဏံ ကၟာတ်ကၠုၚ်လဝ် အပိုၚ်အခြာတ္ၚဲဟၟဲရောၚ်။
ဆဂး ဗ္ဒိုပ်ဝေန်ဝဂှ် ဂကောံဇြဟတ်ပၠန်ဂတးတံ ပ္ဍဲမာတ် ၁၁ လောန်ကၠုၚ်ဏအ် သီကေတ်မာန်လဝ်ကီုလေဝ် ဟိုတ်နူပရေၚ် ၜင်ကျာကဝ်မယှေန်ပၞာန်တံဗတိုက်မံၚ်ဂှ်တုဲ ဂၠံၚ်ဗိက်-ထဝါဲ ဟွံကဵုအခေါၚ်စကာ ဆက်ကၟာတ်ဗဒေါအ်လဝ် မဒှ်ရ။
လၟုဟ်ဂှ်တှ်ေ ဟိုတ်နူပရေၚ်အာတ်မိက် ညးဍုၚ်ကွာန်တံတုဲ ကလေၚ်ပံက်ကဵု ဂၠံၚ်ကွဳစက်ဗိက်-ထဝါဲယျရောၚ် ညးတာလျိုၚ် ဂကောံဇြဟတ်ပၠန်ဂတးတံ ဟီုရ။
ဟိုတ်နူပေါဲဗတိုက် အကြာဒပ်ၜါလပါ်တုဲ ဂၠံၚ်ကွဳစက် ဗိက်-ထဝါဲ ကၟာတ်လဝ်ဗွဲမလအ်လတုဲ ကပေါတ်ဗၞိက်ဗွဲမဂၠိုၚ် လီုလာ်အာအိုတ်တုဲ သၟာဒဳကွဳစက်ဖ္ဍိုက်ကပေါတ်တံ ဒးဆဵုဂဗမံၚ်ကဵု အခက်အခုဲ ပရေၚ်စသုၚ်မံၚ်စံၚ်တုဲ ညးအာတရဴတံဂှ်တှ်ေ ဒးအာကၠုၚ်မံၚ် နကဵုလပါ်ဂၠံၚ်ဍာ်တေံရောၚ် ဂွံတီကေတ်ရ။
ပ္ဍဲအခိၚ်ဂၠံၚ်ကွဳစက်ကၟာတ်မံၚ်ဏံ ညးဍုၚ်ကွာန် အာကၠုၚ်ဂၠံၚ်ဍာ်တံကီု ညးမၚ်မံၚ်တံဂှ်ကီု ဟိုတ်နူလွဟ်ဇၞော် ကေုာံ ပရေၚ်ကြဳဗုမ်ကဵုၜၚ်ကျာတံတုဲ ညးအာတရဴ ဟွံအောန်နူ ၁၀ တၠ ဒးချိုတ်အာလဝ်နွံရ။
ပရိုၚ် – သြၚ်လောန်တိုၚ်မ်
Photo – CJ