သေတ်ဒနဳ၊ မာတ် ၂၈ ပ္ဍဲအဝ်သတေလျ အခိၚ်ၚုဟ်ကၠေၚ်ဍေၚ် သၠုၚ်တိုန်မံၚ်ဏံ ပရေၚ်ပၠံၚ်ရာန်ကေတ်တံ နွံမံၚ်တုဲ ဟိုတ်နူပရိုၚ်ကၠေၚ်ဍေၚ်ပိုတ်အိုတ်မံၚ် ပ္ဍဲဆေၚ်ကၠေၚ်တံဂှ်ရ သ္ကိုပ်ဝန်ဇၞော် အန်ထိုနဳ အယ်လ်ဘာနိစ် လလောၚ်တြးဏာ ပရေၚ်အထံက်ပၚ်တံ ဆက်ရုံဂပ်မံၚ်ဖိုဟ်ရောၚ် ကဵုလဝ်သမ္တီရ။
ပေါဲပၞာန်ဏအ် ယဝ်ရအာဍာ်ဇမၠိၚ်မ္ဂး ပရေၚ်ဇီုကပိုက်တံ ဆက်ဇၞော်မံၚ်ဖိုဟ်ဏီ။ ဆဂး ညံၚ်ကောန်ဍုၚ်အဝ်သတေလျတံ ဟွံဒးဒုၚ်စသိုၚ်ဘဲဒဏ်ပရေံအိုတ်ဂှ် ပိုဲတံဒစးဒုၚ်ပလေဝ်စမံၚ်ရောၚ် သာ်ဝွံ သ္ကိုပ်ဝန်ဇၞော် အယ်လ်ဘာနိစ် ဟီုကဵုအစာပရိုၚ်ဂမၠိုၚ် ပ္ဍဲမာတ် ၂၇ ဂှ်ရ။
သၟာဒဳကွဳစက်ဖ္ဍိုက်ကပေါတ် ကေုာံ သၟာဒဳကွဳစက်တၞဟ်ဟ်တံ အာကၠုၚ်ဟွံဂွံဒှ်မံၚ် သာ်ဝွံ ပရိုၚ်တံတိတ်မံၚ်တုဲ ဟိုတ်နူၚုဟ်အိုတ်သြန်သွက်ကၠေၚ်ဍေၚ်သၠုၚ်အာတုဲ ကမၠောန်ပရေၚ်ပိုန်ဒြပ်တံ ညံၚ်ဂွံဂေတ်အာမာန်ဂှ် ဒးဆဵုဂဗမံၚ်ကဵု အခက်အခုဲနာနာရောၚ်။
ဟိုတ်နူပြသၞာပၟိက်ဇြဟတ်ရာန် ကေုာံ ပရေၚ်တြးပ္တိတ်ကဵုမံၚ်တံတုဲ ကၠေၚ်ဍေၚ်ပိုတ်အာမဒှ်တုဲ ဟိုတ်နူပရေၚ်အထံက်ပၚ် ဟွံသေၚ်ပုဟ် သာ်ဝွံ အလဵုအသဳ ဟီုရ။
ပရေၚ်အထံက်ပၚ်ကၠေၚ်ဍေၚ် ပ္ဍဲအဝ်သတေလျဂှ် နွံမံၚ်အတိုၚ်ကၠာပေါဲပၞာန်အဳရာန်ဟွံစဒှ်ဖိုဟ်ဏီရောၚ် အလဵုအသဳ ဟီုရ။
ဒဵုကဵုသတ္တဟဂတဏအ်ညိညဂှ် ပရေၚ်အထံက်ပၚ်ကၠေၚ်ဓာတ် ကေုာံ ဒဳဇြေလ်တံ ဆက်မၞုံအာမံၚ် တုပ်တုပ်ရောၚ် ဝန်ဇၞော်သၟုဟ်ဇြဟတ်ဓါတ် ခရေတ် ဗိုဝါန် ဟီုကဵုအစာပရိုၚ်တံရ။ ပ္ဍဲဍုၚ်ကာရေၚ်သ် တွဵုရးကွေၚ်သလာန်ဂှ် တၟော်အာနူကဵုကၠာပေါဲပၞာန်အဳရာန်ဟွံစဏီမ္ဂး ၚုဟ်ဒဳဇြေလ် ကေုာံ ကၠေၚ်ဓာတ်တံ သၠုၚ်တိုန်အာ ၈၅% ရ။
ပ္ဍဲတွဵုရးနယူသံက်ဝေလ် ဒှ်တွဵုရးလၟိဟ်မၞိဟ်မံၚ်ဂၠိုၚ်အိုတ် ပ္ဍဲအဝ်သတေလျဂှ် ပ္ဍဲဆေၚ်သွံတြး ၇ ဆေၚ်မ္ဂး ၁ ဆေၚ်ဂှ် ကၠေၚ်ဍေၚ်မွဲမွဲသာ် ပိုတ်မံၚ်ရ။
နူအမေရိကာန် ကေုာံ အေဿရေဝ်တံ ဗတိုက်အဳရာန်ဂှ် ပ္ၚံက်ၜဳဟဝ်မုဇ် ကၟာတ်အာတုဲ စပ္တံနူအခိၚ်ဂှ်ရ ပ္ဍဲအဝ်သတေလျ ၚုဟ်မးကၠေၚ်ဍေၚ်တံ ဆက်တုဲသၠုၚ်တိုန်အာရ။
ၚုဟ်ကၠေၚ်ဓာတ်သွံတြးမံၚ်မွဲလေတ် ဗွဲအပြောံဂှ် နူကၠာပွိုၚ် ၄ သတ္တဟတေံ နွံ ၁၇၁ ခတှ်ေ သြန်ဒဝ်လာအဝ်သတေလျ)တုဲ ပ္ဍဲမာတ် ၂၂ ဂှ် သၠုၚ်တိုန်အာ ၂၃၈ ခတှ်ေရ။
ၚုဟ်ဒဳဇြေလ်လေဝ် သၠုၚ်တိုန်အာစိုပ်အာသၞောတ်ယျ ဂကောံဂၠံၚ် ကေုာံ သၟာဒဳကွဳစက်အဝ်သတေလျတံ ဟီုရ။
သွက်ဂွံသှ်ပုစ္ဆာပြသၞာကၠေၚ်ဍေၚ်ဏံ သ္ကိုပ်ဝန်ဇၞော် အယ်လ်ဘာနိသ် ပ္ဍဲမာတ် ၃၀ ဂှ် ကော်လဝ်ကောံဓရီု ကာမံက်တိုန်မွဲရ။
Ref:BBC