ဝါယှေန်တန်၊ မာတ် ၂၉
ပ္ဍဲဒေသဗၟံက်အဒေါဝ် ၜၚ်ဖ္ဍိုက်ၜၚ်ကျာ နူအမေရိကာန် မရနုက်ကဵုပိ သမ္မတ ဒဝ်နေဝ်ထရ ထပ်ဗလးဏာ ယူအက်သ်အက်သ် အိတ်ချ် ဒဗလျူ ဘွတ်ချ် ကရပ်ဍုၚ်အဳရာန်ယျ။
လပါ်အမေရိကာန် သွက်ဂွံဗတိုက်အာ ပ္ဍဲအဳရာန်ဂှ် သှ်ေမံၚ် ပွန်ဒၞာဲ ၜိုတ် ၃၅၀၀ ဏီ ထရ ဟီုလဝ်ရ။
စိုပ်ဒေသဗၟံက်အဒေါဝ်တုဲဗက်ဂှ် ၜၚ်ဖ္ဍိုက်ၜၚ်ကျာဏံ ပံၚ်တောဲပါလုပ်အာ ပ္ဍဲလဝေၚ်ပၞာန် ဗတိုက်မံၚ်အဳရာန်လၟုဟ်ဏံမာန်ရောၚ် ညးတာလျိုၚ်အမေရိကာန်တံ ဟီုရ။
ပ္ဍဲဒေသဂှ် ကြဴနူအမေရိကာန် ဖျေံလဝ်ဇြဟတ်ပၞာန်ဗွဲမဂၠိုၚ်တုဲ ၜၚ်ဖ္ဍိုက်ၜၚ်ကျာဇၞော် ညံၚ်ရဴဗ္ဒိုပ်ဒပ်ကျာလ္တူဍာ်ဂှ် ထပ်ဗလးဏာပၠန် မဒှ်ရ။
ဂကောံၜၚ်ဖ္ဍိုက်ၜၚ်ကျာဗတိုက် ၜါဂကောံ ပၠတရဴနကဵု ယူအက်သ်အက်သ် ဂါရဲလ် အာရ်ဖိုဒ် ကေုာံ ယူအက်သ်အက်သ် အေဗရာဟမ် လင်ကောန် တံဂှ် ကြဴနူပေါဲပၞာန်အဳရာန်စ ၅ တ္ၚဲတေံဟေၚ် စိုပ်မံၚ်ပ္ဍဲဒေသဂှ် မဒှ်ရ။
ဆဂး ဟိုတ်နူပၟတ်တူအာ လ္တူၜၚ်ဂါရဲလ်ဖိုဒ်တုဲ သွက်ဂွံပလေဝ်ဂှ် ဗလံၚ်ဏာလဝ် ဇရေၚ်ဗ္ဒိုပ်ဒပ်ဍာ် တ္ကအ်ခရက်တဳ ဍုၚ်ဂရိရ။
ပ္ဍဲအခိၚ်ၜၚ်ဏံဟၟဲဂှ် ဖျေံစွံလဝ်ကဵု ၜၚ်ယူအက်သ်အက်သ် ရောစ် နူဍုၚ်နောသ်ဖိုဒ် ရးဗာဂျဳနီယာ ပ္ဍဲမာတ် ၂၅ ရ။
သွက်ဂွံပံၚ်တောဲပါလုပ် ပ္ဍဲလဝေၚ်ပၞာန်အဳရာန်ဂှ် ယူအက်သ်အက်သ် ဒဝ်နေလ် ကွတ်ခ် ကေုာံ ယူအက်သ်အက်သ် မာသန် တံလေဝ် နူဖလဝ်ရဳဒါဂှ် ပ္ဍဲသတ္တဟဏအ် ထပ်တိတ်အာ လပါ်ဒေသဗၟံက်အဒေါဝ်တေံ မဒှ်ရ။
လပါ်အမေရိကာန်တှ်ေ သွက်ဂွံဗတိုက် ပ္ဍဲအဳရာန် ပွန်ဒၞာဲ ၃၅၅၄ ဒၞာဲ သှ်ေမံၚ်ဏီရောၚ် ထရ ဟီုတုဲဗက်ဂှ် ဗလးဏာလဝ် ၜၚ်တံဏအ် မဒှ်ရ။
သီုကဵုလဝေၚ်ပၞာန် ၜၚ်တံဏအ် တုဲဒှ်အာပြဟ်ပြဟ်မာန်ရောၚ် ထရ ဟီုလဝ်ကဵုပူရိသာဒ်တံ ပ္ဍဲဍုၚ်မဳယာမဳရ။
ကြဴနူဂှ်တှ်ေ ပ္ၚံက်ၜဳဟဝ်မုဇ်ဂှ် ထေက်ကဵုဒးပြံၚ်လှာဲကော်အာ ပ္ၚံက်ၜဳထရ ရောၚ်လေဝ် ညးတေံဟီုရ။
ဝန်ဇၞော်ပရေၚ်ဍုၚ်သအာၚ်အမေရိကာန် မာကို ရူဗဳယိုလေဝ် ပေါဲပၞာန်အဳရာန်ဂှ် ဟွံလအ်ကဵုဂိတု ပ္ဍဲပွိုၚ်သတ္တဟအောန်န်ဏအ် တုဲဒှ်အာမာန်ရောၚ် ဟီုလဝ်ရ။
Ref:Middleeast eye/The Sun