မတ်မလီု၊ မာတ် ၂၉
ပ္ဍဲဍုၚ်ဗၟာ ဟိုတ်နူဘဲဒဏ်ပဋိပက္ခတံကီု ဘဲတိချဳလဝ်ဂှ်တုဲ လၟိဟ်မၞိဟ်ကြပ် ၁၂ ပြကောတိကိုတ် ဒးဒုၚ်စသိုၚ်မံၚ် ပရေၚ်အေၚ်ကၠောဝ် ဇၞော်ကဵုဇြဟတ်ရောၚ် နူကဵုအစီအဇန် စၞစဇွောံမဂၠးကဝ် ကုလသမဂ္ဂ (WFP) ပ္တိတ်လဝ်လိက်လလောၚ် ပ္ဍဲမာတ် ၂၇ ဂှ်ရ။
ဗွဲတၟေၚ်တှ်ေ တွဵုရးချေၚ်၊ ကချေၚ်၊ ကရေၚ်ဍာဲ၊ ရခေၚ်၊ သဂိုၚ် ကေုာံ သေံဇၞော် ဒှ်မံၚ်ဒေသပဋိပက္ခရပ်လွဟ်တံကီု ဒေသဒးဒုၚ်စသိုၚ်လဝ် ဘဲတိချဳဇၞော်ဇၞော် ညးဍုၚ်ကွာန်တံဏံ ဒးဆဵုဂဗမံၚ်ကဵု ပရေၚ်စၞစ ဇွောံမ ဟွံရုံဂပ်တံရောၚ် သ္ဂးရ။
ပ္ဍဲဂိတုမာတ် သၞာံအာတုဲကၠုၚ်တေံ ကြဴနူဘဲတိချဳတုဲ လီုလာ်အာလဝ်တံဂှ် အဃောဂစာန်ကၠောန်မံၚ် အရာ သွက်ဂွံကလေၚ် ဗဂဵုလဟဵုပ္တန်ဂှ် အခိၚ်လၟုဟ်ဟိုတ်နူပဋိပက္ခပၞာန် ဒေသဗၟံက်အဒေါဝ်တုဲ ၚုဟ်ကၠေၚ်ဍေၚ်၊ စၞစ ကေုာံၚုဟ်ဝါဲဓာတ်တံ ဒးဒုၚ်ဇီုကပိုက်မံၚ်ကီုရောၚ် ချူထမံက်ထ္ၜးလဝ်ရ။
ပ္ဍဲဍုၚ်ဗၟာ ရးသဂိုၚ်ကဵု ရးမာန္တလေဝ် အပ္ဍဲ ၆ သ္ၚိကၟိန်မ္ဂး ၁ သ္ၚိကၟိန်ဂှ် ဒးဆဵုဂဗမံၚ်ကဵု ပရေၚ်စၞစဇွောံမဟွံရုံဂပ်တုဲ ပရေၚ်အလုံဂၠးကဝ် ဟွံၜိုဟ်သြိုဟ်မံၚ်တံဂှ် ဍုၚ်ဗၟာဂှ်တှ်ေ ကၠုၚ်ဇီုကပိုက်မံၚ်ကဵု အကာဲအရာပရေံအိုတ်ရောၚ် WFP ဂးလဝ်ရ။
တုဲပၠန် ဟိုတ်နူပဋိပက္ခ ဒေသဗၟံက်အဒေါဝ် ကေုာံ ပရေၚ်အခက်အခုဲ အရာဖ္ဍိုက်ပလံၚ်ဗ္စိုပ်တံဂှ် အလုံဍုၚ်ဗၟာ ကၠေၚ်ဍေၚ်အိုတ်ပိုတ်အာအိုတ်တုဲ ၚုဟ်ကၠေၚ်လေဝ် ထပက်သၠုၚ်တိုန်အာ ဟွံတာန်ကဵုအဆတံရ။
ပ္ဍဲသၞာံအာတေံဂှ် ကုညးလမျီုဂျိုၚ်တန်တဴ နူကဵုဘဲတိချဳလဝ် မၞိဟ်ၜိုတ် ၅ ကိုတ်တၠတံဂှ် WFP ရီုဗၚ်ဟံၚ်ပြာ်လဝ်ဂှ်ကီု ကၠောန်ကဵုလဝ်ပရေၚ်ကလေၚ်ဗဂဵုလဟဵုပ္တန်တံတုဲ လၟုဟ်မ္ဂး နူပရေၚ်ဟံၚ်ပြာ် ကာလကာမံက်တိုန်တံဂှ် ပြံၚ်လှာဲအာ ကဏ္ဍကလေၚ်လဟဵုပ္တန် သ္ဇိုၚ်စမြိုၚ်ကွာန်တံရောၚ် သ္ဂးလဝ်ရ။
တုဲပၠန် WFP ဝွံ သွက်အလုံမွဲဍုၚ် ဂွံရီုဗၚ်ဟံၚ်ပြာ်အာကေုာံ ပရေၚ်ကလေၚ်လဟဵုပ္တန် သွက်အရၚ်မၞိဟ် ၁ ဒသမ ၅ ပြကောတိကိုတ်မာန်ဂှ် ပ္ဍဲသၞာံ ၂၀၂၆ ဏံ နွံမံၚ်ပၟိက် သြန်ဒဝ်လာ အမေရိကာန် ၁၅၀ ပြကောတိကိုတ်ဏီရောၚ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – WFP