မတ်မလီု၊ မာတ် ၂၉
ဟိုတ်နူပြသၞာပရေၚ်အခက်အခုဲ ကၠေၚ်စက်အိုတ်အာမာန် ဒှ်မံၚ်အပ္ဍဲဍုၚ်ဂှ်ရ ပရေၚ်အရာကူသာန်ဗၞိက်တံ ယအ်စှ်ေအာတုဲ ၚုဟ်မးပတိတ်ကပေါတ် အလုံဍုၚ် (GDP) တံ ထပက်စှ်ေအာမာန်ရောၚ် တၠပညာပရေၚ်ပိုန်ဒြပ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူပေါဲပၞာန်အဳရာန် စဒှ်နူကဵုဂိတုမာတ် သတ္တဟပထမလောန်ကၠုၚ်ဏံတုဲ အတိုၚ်နွံပၟိက်ရာန်ကၠေၚ်စက်ဟွံဂွံ၊ ဂွံမံၚ်ဆၜိုတ် နကဵုအပိုၚ်အခြာ၊ ဒးၜေတ်ရေၚ်မၚ်ရာန်မံၚ် အခိၚ်လအ်လသၟးဟွံက ပ္ဍဲဆေၚ်ကၠေၚ်တံလေဝ် ကၠေၚ်အိုတ်ပိုတ်မံၚ် မွဲဏှမွဲဏှရ။
ဟိုတ်နူအခက်အခုဲ ပရေၚ်ဝါတ်ကျာတ်ကၠေၚ်စက်တုဲ ပ္ဍဲအရာဗဂေတ်ကမၠောန်တံဂှ် အတိုၚ်ပကတိ ဗီုကၠာတေံ ဗဂေတ်အာဟွံမာန်တုဲ ဒးယှအ်ဖျေံလဝ် ကမၠောန်၊ ပ္ဍဲအရာပရေၚ်ဖ္ဍိုက် ပလံၚ်ဗ္စိုပ်ကပေါတ်တံ ယုတ်ဒေက်အာသၟးဟွံက သီုကဵုကဏ္ဍပရေၚ်ပိုန်ဒြပ် အိုတ်သီုဒးဆောံလေၚ်ဟောံဗြောံအာမံၚ် မဒှ်ရ။
ဟိုတ်နူအသိၚ်အလိုန် ကၠေၚ်စက်ဗီုကတဵုဒှ်မံၚ်လၟုဟ်ဂှ် ပါဲနူဍုၚ်လ္ၚဵုပတိတ်မံၚ်ကၠေၚ်ဍေၚ်တံတုဲ အလုံဂၠးတိမွဲ ဇီုကပိုက်အာနာနာမာန် ဟီုကီုလေဝ် ဍုၚ်ဍောတ်တ်ဝါတ်ခါဲမံၚ် ညံၚ်ရဴဍုၚ်ဗၟာဂှ်တှ်ေ ပဵုတုဲဒးဒုၚ်ဘဲဒဏ်ဂၠိုၚ်ရောၚ် တၠပညာပရေၚ်ပိုန်ဒြပ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ပ္ဍဲအခန်ကၞာတ္ၚဲဒပ်ပၞာန်တေံ အတိုၚ် သ္ကိုပ်ပၞာန် သဵုဝေန် မဟီုလဝ်ဂှ်မ္ဂး ကတဵုဒှ်ကၠုၚ်ဟွံမာန်ရ။ သွက်ဂွံပြၚ်လှာဲသၞောဝ်ဥပဒေသဇိုၚ် ၂၀၀၈ ဂှ် ဒှ်ဟွံမာန်ပုဟ်။ အတိုၚ်ညးမဟီုဂှ်တှ်ေ ဒှ်တိုန်အကာဲအရာ ပဵုပရေံအာမာန်ရောၚ် ပိုဲတံညာတ်အိုတ်ရ။ ယဝ်ရဒှ်ပလေဝ်သၞောဝ်မ္ဂး ပဵုတုဲခိုဟ်တိုန်မာန်ဏောၚ်။ ယဝ်ရဗီုဏအ် ညးတံထိၚ်လဝ်ကၟိန်ဍုၚ် နကဵုဒပ်ပၞာန်တုဲ သွက်ဂွံဒှ်သမ္မတ ရံၚ်ကၠောန်ဂှ်တှ်ေ သွက်ဂွံပြၚ်လှာဲသၞောဝ်ဥပဒေသဇိုၚ်ဂှ် အယောၚ်အလာ ကတဵုဒှ်ကၠုၚ်ဟွံမာန်ပုဟ်” သာ်ဝွံ သ္ဂးရ။
တုဲပၠန် ကပေါတ်ပၠုပ်ပလံၚ်လဝ်ဍုၚ်ဗၟာ ၅၀% ပြၚ်ဂှ် ဒှ်ကပေါတ် ပတိတ်နူကၠေၚ်ဍေၚ် ဗီုကဵုကၠေၚ်စက်၊ ဝါဲဓါတ်ကေုာံ ကပေါတ်ပလာတ်သတေတ်တံတုဲ ပ္ဍဲအခိၚ်လၟုဟ် ၚုဟ်ကၠေၚ်စက်သၠုၚ်တိုန်မံၚ်ဂှ် ၚုဟ်မးစရိတ်အိုတ် သွက်ဂွံပတိတ်ကပေါတ်တံလေဝ် သၠုၚ်တိုန်ကီုရောၚ် ညးဆက်ဟီုရ။
ဟိုတ်နူပရေၚ်အခက်အခုဲ ကၠေၚ်စက်တုဲ စရိတ်ၚုဟ်အိုတ် သွက်ဂွံပတိတ်ကပေါတ်တံ သၠုၚ်တိုန်အာမ္ဂး အရာပၟိက်မိက်ဂွံရာန်တံ ယအ်စှ်ေသၟးဟွံက ပ္ဍဲအရာဖ္ဍိုက်ပလံၚ်ကပေါတ်တံလေဝ် အခက်အခုဲနွံတိုန်တုဲ လ္တူပရေၚ်ပိုန်ဒြပ်ဗၟာဂှ် ပရေၚ်ဇီုကပိုက် ဇၞော်တိုန်မာန်ရောၚ် သ္ဂးရ။
ဍုၚ်ဗၟာဝွံ ဒှ်မံၚ်ဍုၚ်သၟုဟ်ဓါတ်သဘာဝ တိတ်မံၚ်ကီုလေဝ် သၟုဟ်ဓါတ်သဘာဝတံဂှ် ဟွံပြံၚ်လှာဲပတိတ် နကဵုဗီုပြၚ်ဇြဟတ်အစောံဓါတ် ဆၜိုတ်ကပေါတ်အပြောံဂှ်ဟေၚ် သွံကဵုမံၚ်ဍုၚ်တၞဟ်ဟ်တံဂှ်ရ ပဵုတုဲဒးဒုၚ်အာပရေၚ်အခက်အခုဲ ကျာတ်ကၠေၚ်စက်ရောၚ် တၠပညာပရေၚ်ပိုန်ဒြပ်တံ ဟီုဂးပါ်ပါဲလဝ်ရ။
လၟုဟ်ဝွံ ဟိုတ်နူပရေၚ်အခက်အခုဲ ဝါတ်ကျာတ်ကၠေၚ်စက်တုဲ လ္တူကဏ္ဍပရေၚ်ပိုန်ဒြပ်အပ္ဍဲဍုၚ်ဂှ် ပရေၚ်ဇီုကပိုက်ဇၞော်မံၚ်ကီုလေဝ် သွက်ဂွံသောၚ်ကလးအာ ဟွံလောဲသွာတုဲ ယဝ်အခိၚ်လအ်တိုန်အာ မ္ဂး ပ္ဍဲကဏ္ဍနာနာတံလေဝ် ပရေအ်ယုတ်ဒေက်ဇၞော်ကဵုဇြဟတ် ကတဵုဒှ်ကၠုၚ်မာန်ရောၚ်။
ပရိုၚ် – သြၚ်လောန်တိုၚ်မ်
Photo – CJ