ဗြဝတီ၊ မာတ် ၃၁
ပ္ဍဲကဵုတွဵုရးကရေၚ် လ္ပာ်သၠုၚ်ကျာဗြဝတီ ပွဳပွူတိဍာ်ဒေသဖလူဂှ် ဒပ်ကဝ်မယှေန်ပၞာန် စွံပွန်ဗတိုက်ကၠုၚ်မံၚ် သ္ၚိဌာန်ကောန်ဒေသတံ သၟးဟွံက သီုကဵုဒေသဒပ်ပၞာန် ကရေၚ်ပတုဲဖဝ်ဒဳမဝ်ကရေဇြဳ DKBA တံရောၚ် တမ်ရိုဟ်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုင်မ် ရ။
ပ္ဍဲပွဳပွူတိဍာ်ဒေသဖလူဂှ် ဒပ်ကဝ်မယှေန်ပၞာန်ကဵု ဒပ်ပၠန်ဂတး KNLA အာက္ဍိုပ်တံ ပေါဲဗတိုက်သကာတ်မြဟ် ကတဵုဒှ်မံၚ် ပ္ဍဲမာတ် ၂၈ ဂှ် ကဝ်မယှေန်ပၞာန် သုၚ်စောဲဗုမ်ပၟတ် ဗတိုက်ကၠုၚ်လဝ်တုဲ သ္ၚိဌာန် ကောန်ကွာန်ဖလူဇၞော် ၁၀ မပြၚ်လီုလာ်အာနွံရဂှ် ညးဒေသတံ သ္ဂးရ။
ဒပ်ကဝ်မယှေန်ပၞာန် သုၚ်စောဲဒရုၚ်တုဲ ဗတိုက်လဝ်ကီုလေဝ် အခိၚ်ဗတိုက်ဂှ်တှ်ေ ညးဒေသကောန်ကွာန်တံ ဟွံမွဲမံၚ်တုဲ ပရေၚ်မၞိဟ်ဒးဝပ်ဟွံမွဲပုဟ် ဂွံတီကေတ် နူညးဒေသတံရ။
ဟိုတ်နူ ဒပ်ကဝ်မယှေန်ပၞာန် ဗတိုက်လဝ်ဗီုတံဏံတုဲ ညးဒေသနူကဵု ဍုၚ်လေကေကဝ်၊ ဖလူဍောတ်၊ ဖလူဇၞော်၊ ထီုဣသိ၊ မေန်လက်ပါန်ဂှ် ကောန်ကွာန်တံ ဒးဂြိပ်ပါဲမံၚ်ဒၞာဲဗၠးဘဲဒဏ် လံကၠုၚ်ကဵုဂိတု ဂၠိုၚ်တိုန်တုဲ ဒးဆဵုဂဗဒၟံၚ်ပရေၚ်အခက်အခုဲ ဝါတ်ဂါတ်ဂၠိုၚ်ကွေံရ။
အပ္ဍဲဂိတုမာတ် ၂၆ ဂှ် ဒပ်ကဝ်မယှေန်ပၞာန် သုၚ်စောဲဒရုၚ်တုဲ ထပ်ဗတိုက်လဝ် ပ္ဍဲဒၞာဲကၠအ်ဂြိုပ်ဆုကၠ ကမၠောန်ကျာဖျကြုက် ပရေၚ်လီသြန်အန်လာၚ် ကရပ်ကွာန်ဖလူဍောတ် ဒၞာဲ ဒပ်ပၞာန်ကရေၚ် ပတုဲဖဝ်ဒဳမဝ်ကရေဇြဳ DKBA ကဵုလဝ် ပရေၚ်ဂီုကၠီု ဂှ်တုဲ ဂကူကြုက် ၃ တၠ ချိုတ်၊ ၁၃ တၠ ဒးအာဝပ်နွံရောၚ် ညးဒေသတံ ဟီုရ။
ပ္ဍဲစၟတ်တ္ၚဲ မာတ် ၁၃ ဂှ်လေဝ် ပ္ဍဲဒၞာဲကၠအ် ဂြိုပ်ဆုကၠ ကမၠောန်ကျာဖျကြုက်ဂှ် ဒပ်ကဝ်မယှေန်ပၞာန် သုၚ်စောဲဒရုၚ်၊ ပန်လဝ်ကဵုလွဟ်ဇၞော်ဂှ်တှ်ေ ကောန်ပၞာန် DKBA ကဵု ရဲကမၠောန်ကျာဖျ ဗွဲမဂၠိုၚ် ချိုတ်ဒးဝပ် နွံကၠုၚ်လဝ်ဗွဲမဂၠိုၚ်ရောၚ်။
ပ္ဍဲဂိတုမာတ်မံက်တေံဂှ် အကြာကဝ်မယှေန်ပၞာန်ကဵု ဒပ် DKBA တံ ဒှ်ပန်လဝ်ညးသ္ကံ ပ္ဍဲလ္တူဍုၚ်ဗြဝတီဂှ် ညးတာလျိုၚ် စရဖ ကဝ်မယှေန်ပၞာန် မွဲတၠချိုတ်အာတုဲ လ္ပာ်ဒပ် DKBA ဂှ်လေဝ်ဒးအာလဝ်ဝပ် နွံမံၚ်ကီုရောၚ်။
နကဵုအမိၚ်ညးတာလျိုၚ် သ္ကိုပ်ၝောံဒပ် ၂၂ ကြဴနူ ရပ်ဏာကောန်ပၞာန် DKBA လ္ၚဵု လ္တူဍုၚ်ဗြဝတီတုဲဂှ် အကြာဒပ်ကဝ်မယှေန်ပၞာန်ကဵု ဒပ် DKBA တံ ပရေၚ်ဆက်ဆောံ ဆက်တုဲကြံၚ်မ္ၚိုဟ်ဒၟံၚ်ဖိုဟ်ရောၚ်။
ပရိုၚ် – သြၚ်လောန်တိုင်မ်
Photo – Social Media