နေပျဳဒဝ်၊ မာတ် ၃၁
ဟိုတ်နူပၟိက်ဆန္ဒ မိက်ဂွံဒှ်သမ္မတတုဲ က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် သီကေတ်လဝ်အဝဵုဍုၚ်ဂှ် နူကဵုဗော်ပျဳခိုင်ဖျိုဝ် ပတိုန်လဝ်စရၚ်ယၟု နကဵုညးလုပ်ပြိုၚ် အလံၚ်ဒုသမ္မတ သွက်စၠတ်ထဝ်ညးဍုၚ်ကွာန်ရ။
ပ္ဍဲကောံဓရီုစၠတ်ဓဝ်ညးဍုၚ်ကွာန် ကၠောန်ဗဒှ်လဝ် ပ္ဍဲအခိၚ်နူဂယး ဂိတုမာတ် ၃၀ ဂှ် နဒဒှ်ညးလုပ်ပြိုၚ် အလံၚ်ဒုသမ္မတ ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ်ကေုာံ ဒံက်တာကျဝ်သွိုယ် နူဗော်တစည ဒၞာဲဒေသဆန္ဒမာဲပွိုၚ်ဍုၚ် တံၚ်တွောန်ကျဳ ညးၜါတၠဏံ ပၠုပ်ဂလာန်ပတိုန်လဝ်စရၚ်ယၟု နွံရ။
အပ္ဍဲစၠတ်ဓဝ်ကောန်ဂကူဂှ် နဒဒှ်ညးလုပ်ပြိုၚ် အလံၚ်ဒုသမ္မတ ဒဝ်နာန်နဳနဳဧ နူဗော်ပျဳခိုင်ဖျိုဝ် ဒၞာဲဒေသဆန္ဒမာဲ စၟတ် ၂ တွဵုရးကရေၚ် ကေုာံ ဒံက်တာမနာန်တူဝ်ဂျာ ဒၞာဲဒေသဆန္ဒမာဲ စၟတ် ၂ တွဵုရးကချေၚ်တံ ပတိုန်လဝ်စရၚ်ယၟုအိုတ်ရ။
နူဗော်ပျဳခိုင်ဖျိုဝ် ပတိုန်ကဵုလဝ်စရၚ်ယၟု ညးလုပ်ပြိုၚ် အလံၚ်ဒုသမ္မတ က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ကေုာံ ဒဝ်နာန်နဳနဳဧ တံဂှ် ယဝ်ရပါ်မာဲ ဖျေံသ္ဂုတ်သွာတ်မ္ဂး အကာဲအရာ သွက်ဂွံဇၞးမာဲဂၠိုၚ် နွံမံၚ်ရောၚ်။
ၜိုန်ရစရၚ်ယၟု ညးလုပ်ပြိုၚ် အလံၚ်ဒုသမ္မတ ၜါတၠ မံက်တိုန်မံၚ်ကီုလေဝ် စရၚ်ယၟုညးလုပ်ပြိုၚ်အလံၚ်ဒုသမ္မတ နူလပါ်ဒပ်ပၞာန် သွက်ဒးပလံၚ်ဗစိုပ်ကဵုဂှ် စဵုကဵုလၟုဟ် ဟွံဂွံတီဏီပုဟ်။
ညးမၚ်ရံၚ်လ္ၚတ်တံ ဟီုဂးပါ်ပါဲမံၚ်ဂှ်တှ်ေ ညးလုပ်ပြိုၚ် အလံၚ်ဒုသမ္မတ နူလပါ်ဒပ်ပၞာန်ဒးပလံၚ်ဗစိုပ်ကဵုဂှ် ဒုက္ဍိုပ်သ္ကိုပ်ပၞာန် ဒုဂဥုပ်သ္ကိုပ်ပၞာန်ဇၞော် သဵုဝေန် ဟွံသေၚ်မ္ဂး သ္ကိုပ်ဝန်ဇၞော်လၟုဟ် ဥူညိုသဝ်တံဒှ်မာန်ရောၚ် ဟီုဂးမံၚ်အိုတ်ရ။
ပရိုၚ် – သြၚ်လောန်တိုင်မ်
ရုပ် – MOI