မတ်မလီု၊ မာတ် ၃၁
အပ္ဍဲကဵုတွဵုရးမန် ပွိုၚ်ဍုၚ်ဗွဲမဂၠိုၚ် သၟာဗ္ၚတဵုသြောံက္ညၚ်၊ ရဲတဵုကၠအ်၊ သၞေဝ်ကေဝ်တံ သွက်ဂွံဂွံကၠေၚ်ဍေၚ်မာန်ဂှ် ဒးယိုက်နၚ်စက်ပၟတ်ဇၞော်ဇၞော်တံတုဲ ဒးကၠုၚ်ရာန်ကေတ်မံၚ်ရောၚ် သၟာဗ္ၚတဵုလွဳတံ ဟီုကဵု ဌာန်ပရိုၚ်သြၚ်လောန်တိုင်မ် ရ။
ဟိုတ်နူကဵု ပေါဲပၞာန်အဳရာန်တုဲ စနူကဵုဂိတုမာတ်ဏံ အတိုၚ်နွံပၟိက် ရာန်ကၠေၚ်စက်ဟွံဂွံကီု၊ နကဵု စေဝ်၊ တိုၚ်ကဳပဳပါတံဂှ် ညိလေဝ်လ္ပသွံကဵုညိ နူကဵုဌာနစၟဳစၟတ်ကောပ်ကာဲ ကပေါတ်တိတ်နူကၠေၚ်ဍေၚ် တွဵုရးမန် သၟဝ်ကဝ်မယှေန်ပၞာန်ဂှ် မာတ်ထောံလဝ်ရ။
ဟိုတ်နူ ကဝ်မယှေန်ပၞာန် မာတ်လဝ်ဂှ်တုဲ ရဲသၟာဗ္ၚတံ သွက်ဂွံဂွံကၠေၚ်ဍေၚ်ဂှ် ဒးယိုက်ကေတ်နၚ်မံၚ် စက်ပၟတ်ဇၞော်ဇၞော် ညးတံတုဲ ဒးမၚ်ပြေၚ်ရေၚ်မံၚ် အခိၚ်လံကီုလေဝ် အတိုၚ်ပၟိက် နွံရာန်ဟွံဂွံ သွက်စက်ပၟတ်မွဲမမ္ဂး သွံကဵုကၠေၚ်ဍေၚ် သွက် ၁၀၀၀၀ ဒကေဝ်ဓဝ်ရောၚ်။
ဝါဗ္ၚတဵုလွဳလဝ်သြောံက္ညၚ်လ္ၚဵုတံဂှ် စဵုကဵုလၟုဟ် ဟိုတ်နူ ဒးပၠုပ်မံၚ်ဍာ် ဂှ်ရ ဒးကေတ်နၚ်စက်ပၟတ်တုဲ ဒးကၠုၚ်ပြေၚ်ရေၚ်ၜေတ်မင်ရာန်မံၚ် နူအခိၚ်ဂယးပြဟ်ရောၚ် သၟာဗ္ၚမွဲတၠဂှ် ဟီုကဵု ဌာန်ပရိုၚ်သြၚ်လောန်တိုင်မ် ရ။
“သြောံက္ညၚ်တဵုလဝ်တံဂှ် ပ္ဍဲဒၞာဲခံက်လ္ၚဵု ဒးပၠုပ်မံၚ်ဍာ်ဏီ။ ယဝ်ရဟွံပၠုပ်ဍာ်မ္ဂး သြောံဖအိုတ်ဂှ် လီုလာ်အာဏောၚ်။ ဒၞာဲရတ်ဂွံဂှ် ရတ်မံၚ်အိုတ်ရ။ ဟိုတ်နူကၠေၚ်ဟၟဲတုဲ စက်ရတ်သြောံတံလေဝ် ကၠေၚ်ဍေံတံ ဟၟဲကီုရ၊ ဟိုတ်ဂှ်ရ သၟာဗ္ၚတံ ဒးကတဵုနူအခိၚ်ဗ္တံ ၃ နာဍဳ၊ ၄ နာဍဳတုဲ ဒးအာမၚ်ပြေၚ်ရေၚ်မံၚ် ပ္ဍဲကဵုဆေၚ်ကၠေၚ်တံရ” သာ်ဝွံ သ္ဂးရ။
ဟိုတ်နူအခက်အခုဲ ဒးရာန်ကၠေၚ်ဍေၚ်တုဲ သြောံက္ညၚ်ဒးပၠုပ်ဍာ်ကီု သၞေဝ်ကေဝ်နာနာတံ ဆက်တဵုလွဳအာဟွံဂွံတုဲ ဟွံစိုပ်အခိၚ်ဏီ လီုလာ်အာအိုတ် ဒးဆဵုဂဗမံၚ်ကဵုအကာဲအရာ ဗီုတံဏံရောၚ်။
ဟိုတ်နူအကာဲအရာဗီုတံဏံ သၟာဗ္ၚတံ ကပေါတ်တဵုလွဳ လီုလာ်ဟောံဗြမ်တုဲ ဒးဒုၚ်ကျလေၚ်အာကီု၊ သွက်ဂွံဆက်တဵုအာသၞေဝ်ကေဝ် သၞာံဂတတေံဂှ်လေဝ်ဒှ်အာဟွံမာန်တုဲ ဒးဆဵုဂဗမံၚ်ကဵုအကာဲအရာ ပရေၚ်ဝါတ်ဂါတ်နာနာသာ်ရောၚ် သၟာဗ္ၚတံ ဟီုရ။
မွဲလ္ပာ်ပၠန် နူဌာနစၟဳစၟတ်ကောပ်ကာဲ ကပေါတ်ပတိတ်ကၠေၚ်ဍေၚ် တွဵုရးမန် သၟဝ်တဲကဝ်မယှေန်ပၞာန်ဂှ် ဗီုပြၚ် ညံၚ်ဂွံသွံကဵုကၠေၚ်ဍေၚ် သွက်ကွဳစက်တံသၟး ကဵုလဝ်စၞောန်ပ္ညုၚ်ကီုလေဝ်၊ သွက်ကဏ္ဍတဵုလွဳ ကေုာံ ကမၠောန်ပရေၚ်ဍာ်တံဂှ် တၟဟ်ခြာ ကဵုလဝ်စၞောန်ပ္ညုၚ် ဟၟဲဏီပုဟ်။
ပရိုၚ် – သြၚ်လောန်တိုင်မ်
Photo – CJ