ကွာလာလမ်ပူ၊ အေဗရာ ၈
ဟိုတ်နူပေါဲပၞာန်ဒေသလဒေါဝ်ဗၟံက်တုဲ ပ္ဍဲပ္ၚံက်ၜဳဟဝ်မုဇ် က္ၜၚ်ဖ္ဍိုက် ကပေါတ်မလေဝ်ယှာ ၇ မ ကၟာတ်ဆိုအ်မံၚ်တံဂှ် က္ၜၚ်ပထမကၠာအိုတ်မွဲမ ဘဲဒဏ်ဟၟဲ တတ်ကၠောံအာမာန်ယျ ဌာနပရေၚ်ဍုၚ်သအာၚ်မလေဝ်ယှာ ဟီုရ။
အကြာဝန်ဇၞော်ပရေၚ်ဍုၚ်သအာၚ်ကဵု က္ဍိုပ်သ္ကိုပ်ဍုၚ်ညးၜါလ္ပာ်တံ သဳကၠဳပ္ညဳပ္ညပ်လဝ် ပ္ဍဲဂိတုမာတ်တေံတုဲ အပ္ဍဲက္ၜၚ်ဆိုအ်ကၟာတ်မံၚ် ၇ မတံဂှ် က္ၜၚ်ကၠာအိုတ်မွဲမ တတ်ၜက်အာယျရောၚ်ဂှ် ပ္ဍဲလိက်လလောၚ်တြး ဂိတုအေဗရာ ၇ ဂှ် ဌာနပရေၚ်ဍုၚ်သအာၚ်မလေလဝ်ယှာ သ္ပလဝ်ဒတန်ရ။
တရဴက္ၜၚ်ဏံ အာစိုပ်တိုၚ်ပ္ကဴဒၞာဲလဵုရောဂှ် ဌာနပရေၚ်ဍုၚ်သအာၚ်မလေယှာ ဟွံဟီုလဝ်ကီုလေဝ်၊ က္ၜၚ်မဖ္ဍိုက်နၚ်ကၠေၚ်ဍေၚ်အရိုၚ် နူအဳရတ်တံဏံဂှ် ဒှ်က္ၜၚ်ကာမ္မဏဳကၠေၚ်ဍေၚ်အလဵုအသဳမလေဝ်ယှာရောၚ် နူကဵုဌာန်ပရိုၚ်ရိုက်တာ ဗၟံက်ထ္ၜးလဝ် ပ္ဍဲဂိတုအေဗရာ ၅ ရ။
ကပေါတ်မဖ္ဍိုက်နၚ်တံဂှ် ပ္ဍဲလဒေါဝ်ဂိတုအေဗရာမ္ဂး သွက်ဂွံဖျေံ ပ္ဍဲသၞေဟ်ပဳနာန်ရောၚ် ဖန်ဇန်လဝ် မဒှ်ရ။
ကြဴနူလိက်လလောၚ်တြး ရုၚ်ကလုတ်အဳရာန် နူမလေဝ်ယှာ ပတိတ်ကၠုၚ်တုဲ ဌာနပရေၚ်ဍုၚ်သအာၚ်မလေဝ်ယှာလေဝ် ပတိတ်ကၠုၚ်ဗီုဏံကီုရောၚ်။
ဍုၚ်အဳရာန်ဝွံ ဒှ်မိတ်သဟာဲ ဍုၚ်မလေဝ်ယှာဂှ် ဟွံဝိုတ်လဝ်ပုဟ် မိက်ဂွံဟီုရောၚ် သာ်ဝွံ ပ္ဍဲလိက်လလောၚ်တြး ရုၚ်ကလုတ်အဳရာန်ဂှ် ဗၟံက်ထ္ၜးလဝ်ရ။
ပ္ၚံက်ၜဳဟဝ်မုဇ် မဆက်စၠောံလဝ် အကြာၜဳပါယှာ ကေုာံ ၜဳအိုမန်တံဂှ် စနူအခိၚ်ဒှ်ပေါဲပၞာန်တေံရ အဳရာန် ကၟာတ်လဝ်ရောၚ်။
ဆဂး ၜိုန်ရဍုၚ်သၞဟွံသေၚ်တံ ကလိဂွံအခေါၚ်အာကၠုၚ်ရောၚ် အဳရာန် ဟီုလဝ်ကီုလေဝ် က္ၜၚ်လ္ၚဵုတံ ဒးဒုၚ်ဗတိုက်လဝ် နွံကၠုၚ်ကီုရ။
ဟိုတ်နူကၟာတ်လဝ် ဂၠံၚ်ဍာ်ကိစ္စဇၞော် သွက်အရာကၠေၚ်ဍေၚ်ဂၠးကဝ်ဂွံဇွောဝ်အာကၠုၚ်မံၚ်တံတုဲ အလုံမွဲဂၠးကဝ် င္ၚုဟ်ကၠေၚ်ဍေၚ်တံ သၠုၚ်တိုန်မံၚ် ၜက်စိုပ်အာကၞောတ်အိုတ်တုဲ ပ္ဍဲဒေသအာယှတံလေဝ် ဒးဂဗဆဵုမံၚ်ကဵု ဘဲအန္တရာယ်ကၠေၚ်ဍေၚ် ပိုတ်အိုတ်အာမာန်ရ။
ဂၠံၚ်ဏံဂှ်တှ်ေ ဒှ်ဂၠံၚ်အရာဓါတ်အစောမ် ဂၠးကဝ်မနွံပၟိက်တံ ၂၅% အာကၠုၚ်မံၚ်တုဲ အပ္ဍဲဏံ ၈၀% ဂှ်တှ်ေ ဒှ်ကၠေၚ်ဍေၚ် သွက်ဂွံပလံၚ်ဗစိုပ်အာ ဒေသအာယှတံရောၚ်။
Ref:Agencies