ဗေကျေန်၊ အေဗရာ ၁၁
ညးဍုၚ်ကွာန်ကြုက် ကေုာံ ထာဲဝါန်တံ သွက်ဂွံကလေၚ်ပံၚ်ကောံအာဂှ် ပတေဟ်ကေတ်လဝ်ပေၚ်ၚ်ရောၚ် သမ္မတကြုက် ယှဳကျေန်ဖျေန် ပ္ဍဲဂိတုအေဗရာ ၁၀ ဂှ် ဟီုကဵု က္ဍိုပ်သ္ကိုပ်ဒစဵုဒစးထာဲဝါန် ချာန်လဳဝါန် မစိုပ်ကၠုၚ်ဍုၚ်ကြုက်ရ။
ဥက္ကဌဗြဴ ဗော်ကူမေန်တာန် ချာန်လဳဝါန် ဝွံ ပ္ဍဲအကြာပွိုၚ်စှ်သၞာံမ္ဂး ဒှ်က္ဍိုပ်သ္ကိုပ်ဗော် ပထမကၠာအိုတ် အာလဝ်ဍုၚ်ကြုက် မဒှ်ရ။
ဆေၚ်စပ်ကဵုလၟေၚ်တရဴညးတေံဂှ် ပရေၚ်ပါ်ပါဲ ပ္ဍဲထာဲဝါန်တံ သ္ကာတ်မြဟ်မံၚ်တုဲ ပါမံၚ်လ္ပာ်ကြုက်လောန်အာရောၚ် ဟီုဂးမံၚ်အိုတ်ရ။
ကြဴနူသမ္မတ သိုၚ်အန်ဝါမ် နူဗော်ဒဳမဝ်ကရေတ်တောတက် ဇၞးမာဲတုဲ အရာဗေကျေန်မဟီုဂး အဝဵုပရေၚ်မပိုၚ်ပြဳ လ္တူထာဲဝါန်ဂှ် တးပါဲထောံတုဲ ပ္ဍဲသၞာံ ၂၀၁၆ တေံဂှ် ပရေၚ်ဆက်ဆောံအဆံၚ်သၠုၚ် ကုထာဲဝါန်ဂှ် နူကဵုဗေကျေန် ကုတ်ထပိုတ်ထောံလဝ်ရ။
ကိစ္စသွက်ဂွံကလေၚ်ပံၚ်ကောံ ကရောံမွဲစွံကဵုထာဲဝါန်ဂှ် ပြံၚ်သၠာဲဟွံဂွံပုဟ် ယှဳကျေန်ဖျေန် ဟီုကဵုက္ဍိုပ်သ္ကိုပ်ဗော် ချာန်လဳဝါန် ရ။
ဗော်ကူမေန်တာန်ကီု သီုကဵုကရောံဂကောံနာနာ မၞုံပ္ဍဲထာဲဝါန်တံဂှ် ညံၚ်ဂွံသၠုၚ်ပတိုန်ဇြဟတ်ပရေၚ်သဳကၠဳတံဂှ် နကဵုဍုၚ်ကြုက် ကၠောန်အာရောၚ် ယှဳကျေန်ဖျေန် သ္ဂးရ။
ထာဲဝါန်ဝွံ ဒှ်အပိုၚ်အခြာပယျဵုဍုၚ်ပိုဲတုဲ သွက်ဒးကလေၚ်ပံၚ်ကောံဂှ် ယဝ်ရနွံပၟိက်မ္ဂး သုၚ်စောဲဇြဟတ်ပၞာန်ရောၚ် ဍုၚ်ကြုက် ကဵုလဝ်သတိနွံရ။
ပ္ၚံက်ၜဳထာဲဝါန်ဂှ် ဒၞာဲအဓိက ပဋိပက္ခ ထေက်ကဵုမကတဵုဒှ်မာန်မွဲ ဒှ်ဟွံထေက်ပုဟ် ချာန်လဳဝါန် ဟီုရ။
နူကဵုဍုၚ်ကြုက်ဂှ် ကြပ်ပ်ဇၟာပ်ပ်တ္ၚဲ ဗလံၚ်ဏာမံၚ် ၜၚ်ပၞာန် ကေုာံ ၜၚ်ကျာဗတိုက်တံ ပ္ဍဲကရပ်ထာဲဝါန်တုဲ ကဵုမံၚ်ဇြဟတ်ဟရိုဟ်ရ။
ဆေၚ်စပ်ကဵုအစဳဇန် သွက်ပရေၚ်စဵုဒၞာဂှ် ဂွံသုၚ်စောဲသြန် ဒဝ်လာအမေရိကာန် ၃၉ ဗဳလဳယာန်ဂှ် ညးစၞးအမာတ်စၠတ်ထဝ် ထာဲဝါန်တံ ဗဇီုက္ဍိုပ်သဳကၠဳမံၚ်အိုတ်ရ။
ပ္ဍဲစၠတ်ထဝ်ထာဲဝါန် ဗော်ကူမေန်တာန် ချာန်လဳဝါန် မထိၚ်ဓဝ်လဝ်ဂှ် သွက်ဂွံသၠုၚ်ပတိုန်သြန်စရိတ်ပရေၚ်စဵုဒၞာဂှ် ဆက်အာဂတဟွံမာန် ကတဵုဒှ်မံၚ်ရ။
ပ္ဍဲအခိၚ်သမ္မတအမေရိကာန် ဒဝ်နယ်ထရ သွက်ဂွံစိုပ်ဍုၚ်ကြုက်နွံမံၚ်ဂှ် က္ဍိုပ်သ္ကိုပ်ဗော်ကူမေန်တာန်လေဝ် စိုပ်မံၚ်ဍုၚ်ဗေကျေန် မဒှ်ရ။
ပရိုၚ် – သြၚ်လောန်တိုင်မ်
Ref:AFP