သိုဝ်၊ အေဗရာ ၁၂
ကြဴနူအေဿရေ စောဲလဝ်ဒုဟ် သွက်အရာသၠုၚ်ပတိုန်လဝ်အသိၚ် တြးပရိုၚ်ဗၠေတ်တ် ပ္ဍဲဇာဖိုၚ်မှာဇန်တံတုဲ အေဿရေဝွံ ဆေၚ်စပ်ကဵုတၚ်စောဲစပ် ဖံက်ပကဝ်ပရေၚ်အခေါၚ်အရာမၞိဟ် ဒပ်ပၞာန်ညးတံကၠောန်ဗဒှ်လဝ်တံဂှ် သွက်ဂွံထမံက်ပတိတ်ထ္ၜးကဵု အကာဲအရာဍာံတံ ယုတ်ဒေက်မံၚ်ရောၚ် သမ္မတကိုဝ်ရဳယျာ သၠုၚ်ကျာ လဳဂျေဝ်မျံၚ် ကလေၚ်တင်ဒုဟ် ပ္ဍဲဂိတုအေဗရာ ၁၁ ရ။
ပ္ဍဲဇာဖိုၚ်မှာဇန် ဗဳဒဳယဝ်မွဲဂှ်တှ်ေ ဂွံဆဵုကေတ် ကောန်ပၞာန်အေဿရေတံ ဍဵုဍိုက်ပျဲပျာံ ထရိုဟ်ဖျေံမံၚ်နူကၟဳသ္ၚိ ကောန်ၚာ်ပါလေတ်သတိုၚ်မွဲတၠဂှ် ဂွံဆဵုညာတ်လဝ်ရ။
ဟိုတ်နူတၚ်စၟတ်သမ္တီ သမ္မတ လဳဂျေဝ်မျံၚ် ချူလဝ် ပ္ဍဲသၟဝ်ဗဳဒဳယဝ်ဂှ်တုဲ ဝန်ဇၞော်ပရေၚ်ဍုၚ်သအာၚ်အေဿရေ ဒေါသတိတ်အာလဝ် ကွေံကွေံရ။
ဖိုင်ဗဳဒဳယဝ်ဏံ ဍာံ ဟွံဍာံဂှ် နကဵုဇကုညးတေံ ဒးလ္ၚတ်ရံၚ်ကၠာတုဲ၊ ယဝ်ရဍာံမ္ဂးတှ်ေ ဗီုလဵုရပ်စပ်လဝ်ရော သာ်ဝွံ သမ္မတလဳ ချူလဝ်တၚ်စၟတ်သမ္တီ ပ္ဍဲဂိတုအေဗရာ ၁၀ မဒှ်ရ။
ဖိုင်ဗဳဒဳယဝ် ညးဂမၠိုၚ်ပါ်ပရအ်တြးမံၚ် ပ္ဍဲဇာဖိုၚ်မှာဇန်ဂှ် ဒှ်အရာဍာံစၟတ်ဇေတ်တ်ရောၚ် သ္ပဒတန်ဟွံမာန်ဏီပုဟ် ဌာန်ပရိုၚ်အေအက်ဖ်ပဳ (AFP) ဗၟံက်ထ္ၜးလဝ်ရ။
ဆဂး လောန်ကၠုၚ်ၜါသၞာံတေံ ပ္ဍဲဒေသဇိုၚ်ၜဳလ္ပာ်ပလိုတ်ဂှ် ကောန်ပၞာန်အေဿရေတံ ဓရိုဟ်ဖျေံမံၚ်ဇွမၞိဟ်အာယုက်ဇၞော်မွဲ နူလ္တူကၟဳသ္ၚိဂှ် နကဵုဗီုပြၚ်တၞဟ်ခြာ AFPTV တက်ဂွံလဝ်ရုပ်နွံရ။
လၟေၚ်ဒဒှ်ပရူပရာဏံဂှ် ဒှ်အရာပရေၚ်စိုတ်ဟွံမိပ်ဗွဲမလောန်ရောၚ် သ္ၚိဗတာင်ဗု ဟီုလဝ် ပ္ဍဲသၞာံ ၂၀၂၄ တုဲ သွက်ဂွံသောၚ်ကလးကဵုဂှ်လေဝ် ကေၚ်အာတ်မိက်လဝ် အေဿရေ ကီုရ။
လၟေၚ်ဒဒှ်ပရူပရာ ကောန်ပၞာန်အေဿရေတံ ပါလုပ်မံၚ်တံဂှ် စၟဳစၟတ်သောၚ်ကလးတုဲဒှ်အာယျရောၚ် ပ္ဍဲလိက်လလောၚ်တြး ဌာန်ပရေၚ်ဍုၚ်သအာၚ်အေဿရေ ပ္ဍဲဂိတုအေဗရာ ၁၁ ဂှ် ဗၟံက်ထ္ၜးလဝ်ရ။
ဟိုတ်နူဟိုတ်ပရူပရာတၟေၚ်တံတုဲ သမ္မတ လဳဂျေဝ်မျံၚ် ရုဲစှ်ကေတ်အကာဲအရာ သၞာံ ၂၀၂၄ တုဲ နိဿဲလဝ်ကဵုအကံက်အလီ မဗၟံက်ထ္ၜးလဝ်ဗၠေတ်တ်တုဲ ဟီုဂးမံၚ်ရောၚ် ဌာန်ပရေၚ်ဍုၚ်သအာၚ်အေဿရေ ကလေၚ်ခၠေဝ်ပလန်လဝ်ရ။
အကံက်ဏံဂှ်တှ်ေ ဒှ်အကံက်တြးမံၚ် ပရိုၚ်ဗၠေတ်တ် သွက်ဒစဵုဒစးအေဿရေတုဲ ဒယှ်တှ်မံၚ်နကဵုပရိုၚ် ပရေအ်ပရေအ်ရောၚ် အေဿရေ ဟီုရ။
ကိုဝ်ရဳယျာသၠုၚ်ကျာဝွံ ဒှ်မဟာမိတ်အမေရိကာန် ဒှ်လဝ်မဟာမိတ်ဇၞော် အေဿရေကီုလေဝ် ပ္ဍဲပဋိပက္ခဒေသလဒေါဝ်ဗၟံက်ဂှ်တှ်ေ လပါ်လဵုမှ ဟွံထံက်ဂလာန်လဝ်ပုဟ်။
Ref:AFP