တဳဟဳရာန်၊ အေဗရာ ၂၂
ယဝ်ရ အမေရိကာန် ကလေၚ်စဗတိုက်ကၠုၚ်မ္ဂး အပ္ဍဲပိုဲ တၚ်နၚ်ညးဂမၠိုၚ်ဟွံတီဏီတံ နွံမံၚ်ဏီရောၚ် ဥက္ကဌစၠတ်ထဝ်အဳရာန် ဟီုရ။
ဥက္ကဌစၠတ်ထဝ်အဳရာန် ဟီုဂးလဝ် “တၞးဖေဝ်တၟိတၟိ” ဟွံပတိတ်ဝေၚ်လဝ်တံ နွံမံၚ်ဏီတုဲ ညးတေံမိက်ဂွံသ္ဂး အဓိပ္ပါယ်ဗီုလဵုရောဂှ် ၜိုန်ရဟွံတီကၠးကီုလေဝ် လွဟ်တၟိတၟိတံ ဒှ်မာန်ရောၚ် ညးလ္ၚတ်တံ သ္ဂးရ။
အပ္ဍဲဂိတုအေဗရာ ၂၂ မ္ဂး တၚ်တုပ်စိုပ်ဒေါအ်ပန်ပှော် အကြာၜါဍုၚ်ဂှ် အာယုက်အိုတ်အာရောၚ် မဒှ်ရ။
သမ္မတအမေရိကာန် ဒဝ်နယ်ထရ ဟီုဂှ်တှ်ေ သွက်ဂွံဆက်အာယုက်တင်တုပ်စိုပ်ဂှ် ဂွံဒှ်မာန် အောန်မံၚ်ရ။
သွက်ဂွံဆက်သဳကၠဳကဵု အဳရာန်မွဲဝါပၠန်ဂှ် ဒုသမ္မတအမေရိကာန် ဂျေဒဳ ဗာတ်ဇ် အာဍုၚ်ပါကေဿတာန်ရောၚ်ဂှ် မဳဒဳယာအမေရိကာန်တံ ဗၟံက်ထ္ၜးလဝ် ပ္ဍဲအေဗရာ ၂၁ ရ။
ဆဂး သွက်ဂွံဗလံၚ်ဏာဂကောံညးစၞး သွက်ပေါဲသဳကၠဳ ပ္ဍဲဍုၚ်အေဿလာမ်မာဗာတ်ဟာဂှ် လပါ်အဳရာန် ဟွံသ္ပဒတန်ဏီပုဟ်။
အပ္ဍဲဂၠံၚ်ဍုၚ်အေဿလာမ်မာဗတ်တံဂှ် သၞေဟ်ကင်ဂိက်ပရေၚ်ဂီုကၠီုတံ နွံမံၚ်ဖိုဟ်တုဲ၊ လိက်လလောၚ်တြးဒုၚ်တၠုၚ်ပေါဲသဳကၠဳတံ အတိုၚ်မွဲဒမြိပ်ဇိုၚ်ဂၠံၚ်တံလေဝ် ဆက်နွံမံၚ်ဖိုဟ်ရောၚ် ရဲပရိုၚ်တံ ဟီုရ။
ဆဂး ပရေၚ်အရာဟွံချိုတ်တံ ဗွဲမဂၠိုၚ် နွံမံၚ်ဖိုဟ်ရောၚ် ရဲပရိုၚ်ဗဳဗဳသဳ အပ္ဍဲဍုၚ်အေဿလာမ်မာဗတ် ဟီုရ။
ပရေၚ်သဳကၠဳအာကဵု အမေရိကာန်တံဂှ် သွက်ဂွံတုဲဒှ်အာ နကဵုတၚ်အာတ်မိက် လပါ်အဳရာန်တံ ဒုၚ်တဲဟွံမာန်ရောၚ် ပရေၚ်စိုတ်ကတဴကတာန် ပ္ဍဲဍုၚ်တဳဟဳရာန်တံ မံက်တိတ်ကၠုၚ်မံၚ်ရ။
အမေရိကာန် အာတ်မိက်မံၚ် တၚ်အာတ်မိက်လောန်ကာဲအာ ကေုာံ ဟွံလုပ်သၞောဝ်တံရောၚ် အဳရာန် စောဲစပ်လဝ်ရ။
အပ္ဍဲအကြာဏံ သ္ကိုပ်ဗိုလ်ဇၞော်အဆံၚ်သၠုၚ်အဳရာန် အဒူလာဟဳ ဟီုဂှ်တှ်ေ ထရဟီုမံၚ်အရေဝ်လီဠာန်တုဲ နွံမံၚ်ပၟိက် မိက်ဂွံကလိဂွံ တင်တုပ်စိုပ်အဳရာန်မွဲ အိုတ်စောန်ရောၚ် သ္ဂးရ။
အပ္ဍဲပေါဲပၞာန်အဳရာန်ဂှ် ညးတံကလိဂွံလဝ် ပေါဲအံၚ်ဇၞးဗွဲမဂၠိုၚ်တုဲ လပါ်အဳရာန်တှ်ေ နွံပၟိက်မိက်ဂွံဂွံ တင်တုပ်စိုပ်မွဲ အိုတ်စောန်ရောၚ် ထရီု ဟီုလဝ် နူကၠာတေံရ။
လက်ကရဴယာတ်ဓနိက် ပရေၚ်ဍုၚ်ကွာန် ပ္ဍဲဍုၚ်အဳရာန်ဂှ် ညးလစွံစိုတ်ကြံၚ်မ္ၚိုဟ်တံနွံမံၚ်တုဲ ဟွံမိက်သဳကၠဳ နကဵုနဲကဲအမာတ်ကလုတ်ဂှ် လ္ပဆက်သဳကၠဳ သွက်ဂွံကလေၚ်ဗတိုက်အမေရိကာန်ဂှ် ကဵုမံၚ်ဇြဟတ်ဟရိုဟ် ကုညးမပ္ညဳပ္ညပ်တံရောၚ် တမ်ရိုဟ်ပရိုၚ် ပ္ဍဲဍုၚ်တဳဟဳရာန်တံ ဟီုရ။
အပ္ဍဲအခိၚ်သၟာဗၞိက်ပရေၚ်သွံရာန်တံ မၚ်ရံၚ်မံၚ်အကာဲအရာ ပေါဲသဳကၠဳပရေၚ်ၜိုဟ်လလမ်ဂှ် င္ၚုဟ်ကၠေၚ်ဍေၚ်ဂၠးကဝ် ယအ်စှ်ေအာ ၁ ဒသမ ၆% ရ။
ပရိုၚ် – သြၚ်လောန်တိုင်မ်
Ref:BBC