နေပျဳဒဝ်၊ အေဗရာ ၂၃
ယဝ်ရမိက်ဂွံ ကလေၚ်ပံၚ်ကောံကရောံအာသဳယာန် ပေၚ်ၚ်မ္ဂး လပါ်ဍုၚ်ဗၟာမ္ဂး တၚ်ဒှ်ဒွိၚ်အာသဳယာန်တံဂှ် ဒးသောၚ်ကလးကဵုရောၚ် ဒု-သ္ကိုပ်ဝန်ဇၞော် ကေုာံ ဝန်ဇၞော်ပရေၚ်ဍုၚ်သအာၚ်သေံ သဳဟာဆက် ဖူအန်ခက်ကွေ ကြဴနူအာစိုပ်နေပျဳဒဝ်တုဲ ဟီုကဵုရဲပရိုၚ်တံရ။
နကဵုနဲကဲဍံၚ်ဗက်အာ မွဲကဆံၚ်တုဲမွဲကဆံၚ် ပရေၚ်ကလေၚ်ပ္ညဳပ္ညပ် အကြာအာသဳယာန် ကေုာံ ဍုၚ်ဗၟာဂှ် နကဵုဍုၚ်သေံ ထံက်ဂလာန်ရောၚ် ညးတေံဟီုရ။
စပ်ကဵုပရေၚ်ထမံက်ရုပ်ရဴ တင်တုပ်စိုတ်ဘုံ ၅ တင် အာသဳယာန်ဂှ် ပရေၚ်တဴတက်နွံ ဆၜိုတ်သၞောတ်ဗ္ၜတ် ညိညဓဝ်ဏီ ညးတေံဟီုလဝ်ရ။
နကဵုဍုၚ်သေံမ္ဂး ပရေၚ်သဳကၠဳတံ ညံၚ်ဂွံအံၚ်ဇၞးအာ နူကဏ္ဍပၠတရဴဂှ် ပါလုပ်ရီုဗၚ်ကဵု နွံမံၚ်တုဲတုဲရောၚ် ဝန်ဇၞော်ပရေၚ်ဍုၚ်သအာၚ်သေံ ဟီုရ။
သမ္မတ ဥူဝေန်မျေတ်ကီု သီုပရေၚ်ဗလးကဵုလဝ် ကောန်ထံၚ်ပရေၚ်ဍုၚ်ကွာန်တံဂှ် ဒုၚ်တၠုၚ်တုဲ ကေုာံ ပရေၚ်ကမၠောန်ဗီုတံဏံဂှ် ဆက်ကၠောန်အာဂှ် စၟဳစမံၚ်ရောၚ် ညးတေံသ္ဂးရ။
မွဲဒမြိပ်အတိုၚ်ပယျဵုသေံ-ဗၟာ ပေါဲဗတိုက်တံ ဂွံယအ်စှ်ေအာ ကေုာံ အရာနွံမံၚ်ပၟိက် ပရေၚ်ဓရ်ဗ္စာရဏာမၞိဟ် ဍုၚ်ဗၟာတံဂှ် ဍုၚ်သီုၜါလ္ပာ် သဳကၠဳအာရောၚ် ညးတေံဟီုရ။
ဆေၚ်စပ်ကဵုဗုမ်ဒပ်ပၞာန်ဗၟာ ကြဳဖျေံနူၜၚ်ကျာတုဲ ဒတုံစှ်ေလဝ်လပါ်တိဍာ်သေံ အခိၚ်ဟွံလံဏီဂှ်တှ်ေ အလုံမွဲပယျဵု အသိၚ်ပရေၚ်ဗတိုက်တံ ညံၚ်ဂွံယအ်စှ်ေအာဂှ် နကဵုအလဵုအသဳသေံ မိက်ဂွံဆဵုညာတ်ရောၚ် ညးတေံဟီုရ။
ပရေၚ်ပံၚ်တောဲ အကြာဒပ်ပၞာန်ၜါဍုၚ်ဂှ် အရာကိစ္စဇၞော်မွဲဒှ်တုဲ အခိၚ်ကၠာတေံလေဝ် အကြာက္ဍိုပ်သ္ကိုပ်ပၞာန်တံ လၟေၚ်တရဴအဆံၚ်သၠုၚ်တံ နွံကၠုၚ်လဝ်တုဲ ကိစ္စပရေၚ်ဂီုကၠီုပယျဵုဂှ် ထေက်ကဵုဒးပံၚ်တောဲသဳကၠဳအာရောၚ် ညးတေံဟီုရ။
ဆေၚ်စပ်ကဵုပြသၞာဍာ် ကေုာံ သၟုကျာကၠိပပ် ပ္ဍဲဒၞာဲပယျဵုဍုၚ်သီုၜါလပါ်ဂှ်လေဝ် ဒးပံၚ်တောဲကၠောန်အာတုဲ၊ သွက်ဂွံဗတိုက်ပလီု ညံၚ်ရဴကမၠောန်ကျာဖျ ဒုဟ်ရာဇဝတ်တတ်ကၠောံပယျဵု ဍုၚ်သီုၜါလ္ပာ်တံ သွက်ဂွံပံၚ်တောဲကၠောန်အာဂှ် ကိစ္စဇၞော်ဗွဲမလောန်ရောၚ် ဝန်ဇၞော် သဳဟာဆက် ဟီုလဝ်ဇြိုဟ်ဟ်နက်က်ရောၚ်။
ပ္ဍဲဂိတုအေဗရာ ၂၁ အာစိုပ်နေပျဳဒဝ်တုဲ ဆဵုဂဗလဝ်ကဵု မေန်အံၚ်လှိုၚ်ဂှ် သွက်ရန်တၟအ်ပိတၚ် ညးတေံကၠုၚ်လဝ် နေပျဳဒဝ်ဏံ သဳဟာဆက် ဟီုလဝ်ရောၚ်။
Ref:Khasod English