ဝါယှေန်တာန်၊ အေဗရာ ၂၄
စပ်ကဵု ပေါဲပၞာန်အဳရာန် အခိၚ်သွက်ဂွံဒေါအ်ထပိုတ်ထောံ ဂှ် ပရေၚ်ဇြဟတ်ဟရိုဟ် မုလေဝ်ဟၟဲပုဟ် အလဵုအသဳအမေရိကာန် ဟီုရ။
အပ္ဍဲအကြာဏံ ပရေၚ်ဆက်လဝ်အာယုက် သွက်ပရေၚ်ဒေါအ်ပန်ပှော်ဂှ် သမ္မတ ဒဝ်နယ်ထရ ချိၚ်ကဵုလဝ် တ္ၚဲလက္ကရဴအိုတ်တၟိတၟိ ဟၟဲပုဟ် သ္ၚိထဝ်ဗတာင် သ္ဂးရ။
ဟိုတ်နူအမေရိကာန် ကေုာံ အေဿရေတံ ဖံက်ပကဝ်မံၚ် ပရေေၚ်တင်တုပ်စိုပ်ဒေါအ်ပန်ပှော် ထေၚ်ကဵုကၠးမးမံၚ်တုဲ သွက်ဂွံကလေၚ်ပံက် ပ္ၚံက်ၜဳဟဝ်မုဇ်ဂှ် ဒှ်ဟွံမာန်ပုဟ် သ္ကိုပ်ပ္ညဳပ္ညပ်အဳရာန် မဝ်ဟာမေတ် ဂါလဳဗက်က် ဟီုရ။
အမေရိကာန် ကၟာတ်ဆိုအ်လဝ် ကေုာံ အရာပလီုလဝ်ဂလာန်ကတိတံဂှ် ဒှ်တၚ်ဒၞာတာမံၚ် အဓိက သွက်ပရေၚ်ပ္ညဳပ္ညပ်ရောၚ် သမ္မတအဳရာန် မာသံက် ပဳဇက်ခဳယာန် ကလေၚ်ပလန်လဝ်ရ။
ဂၠံၚ်ဍာ်မဖ္ဍိုက်ပလံၚ်ကၠေၚ်ဍေၚ် ကေုာံ သၟုဟ်ဓါတ်သဘာဝဂၠးကဝ်တံဂှ် ကလေၚ်ပံက်ကဵုဟွံသေၚ်ရောၚ် နကဵုအဳရာန် စွံပရေၚ်ဇြိုဟ်နက် အခိၚ်ဟီုမံၚ်တံဏံ ဍုၚ်သီုၜါလ္ပာ်တံဂှ် စိုပ်အာအကာဲအရာ တိုန်ဂတးဟွံမာန် ကလေၚ်ဆုတ်လေဝ်ဟွံဂွံ ဒှ်မံၚ်ယျရောၚ် အစာပရိုၚ်ဗဳဗဳသဳ သွာၚ်အမေရိကာန်သၟဝ်ကျာ ချူဗၟံက်လဝ်ရ။
အပ္ဍဲအကြာဏံ ကွဳက္ၜၚ်ဖ္ဍိုက်ကပေါတ် ပိဖ္ဍိုက် ဂစာန်တတ်အာပ္ၚံက်ၜဳဟဝ်မုဇ်တံဂှ် နကဵုအဳရာန် ဗတိုက်တုဲ ကောန်က္ၜၚ်တံနူကဵု ၜၚ်ၜါမဂှ်လေဝ် ရပ်ထိၚ်လဝ်ရ။
နူကဵုအမေရိကာန်လေဝ် က္ၜၚ်အဳရာန် ပိဖ္ဍိုက် မၞုံပ္ဍဲၜဳအာယှတံဂှ် ကၟာတ်ဒၞာဆိုအ်လဝ်ရောၚ် ပ္ဍဲပရိုၚ်ကိုပ်ကၠာတံ ဗၟံက်ထ္ၜးလဝ်ရ။
ပေါဲသဳကၠဳအလန်ပထမ ပ္ဍဲဍုၚ်အေဿလာမ်မာဗတ် ဍုၚ်ပါကေဿတာန် ဟွံအံၚ်ဇၞးတုဲ၊ အမေရိကာန်တံ အာတ်မိက်လောန်ကာဲအာ ကေုာံ အရာဟွံကိတ်ညဳကဵုသၞောဝ်ဥပဒေတံရောၚ် အဳရာန် စောဲလဝ်ရ။
အကြာၜါဍုၚ် သွက်ဂွံဆက်သဳကၠဳအာဂှ် ဒှ်မံၚ်အခိၚ်ဟွံချိုတ်ပၠိုတ်မံၚ်ဏံ အမေရိကာန် ကၟာတ်ဆိုအ်လဝ် သၞေဟ်က္ၜၚ်အဳရာန်တံတုဲ နူလပါ်အဳရာန်လေဝ် ဆက်တုဲကၟာတ်ဆိုအ်လဝ် ပ္ၚံက်ၜဳဟဝ်မုဇ်ဖိုဟ်ရ။
အပ္ဍဲအခိၚ်ကၟာတ်ဆိုအ်လဝ် ပ္ၚံက်ၜဳဂှ် င္ၚုဟ်ကၠေၚ်ဍေၚ်ဂၠးကဝ် မွဲစေဝ်ဗေၚ်မ္ဂး သၠုၚ်တိုန်အာ ဒဝ်လာ ၁၀၀ ပြၚ်တုဲ၊ ပရေၚ်ပိုန်ဒြပ်ဂၠးကဝ် ကြပ်ဒးဂဗဆဵုကဵု ပရေၚ်ဆုတ်ယုတ်စှ်ေရောၚ် တၠပညာပရေၚ်ပိုန်ဒြပ်တံ ကဵုလဝ်သတိရ။
အပ္ဍဲအကြာဏံ ဟိုတ်နူပေါဲပၞာန်အဳရာန်တုဲ ပွဳဗွိုၚ်ဍုၚ်ယူရောပ်တံ ဇြဟတ်စဆုတ်ယုတ်စှ်ေကၠုၚ်မံၚ်ယျရောၚ်ဂှ် သမ္မတတူရကဳ အာဒိုဂန် ဟီုဂးလဝ် ပ္ဍဲအခိၚ်ဆက်ဖုၚ်ကု သမ္မတဂျာမနဳ ဖရ ဝဝ်လ်ကာ စတိၚ်မဳယာ ရောၚ်။
စနူကဵု အခိၚ်ကၟာတ်ဆိုအ်လဝ် သၞေဟ်က္ၜၚ်အဳရာန်တုဲ က္ၜၚ်ဒးကလေၚ်ဂတးစဴ ဟွံသေၚ်မ္ဂး ဒးကလေၚ်ကဵုအာလဝ် ဇရေၚ်သၞေဟ်က္ၜၚ်တံဂှ် နွံ ၃၁ မရောၚ် အမေရိကာန် ဟီုရ။
Ref:BBC