ဝါယှေန်တာန်၊ အေဗရာ ၂၅
အပ္ဍဲဍုၚ်ဗၟာ ပရေၚ်ကမၠောန် ကျာဖျတိုၚ်ချာန် ကၠောန်မံၚ်လီဠာန်သြန်တံ ညံၚ်ဂွံကလေၚ်ရပ်သီကေတ် သြန်ဘဏ္ဍာတံ ညးကဵုပရိုၚ်မာန်ဂှ် ဖျေံကဵုလာပ်သြန်ဒဝ်လာ ၁၀၀ ကိုတ်ရောၚ် နူကဵုဌာနပရေၚ်ဂဥုဲၜူမာဲဂၠးကဝ် ကေုာံ အရာစၟဳစၟတ်သၞောဝ်ဥပဒေ အမေရိကာန် လလောၚ်တြးလဝ် ပ္ဍဲဂိတုအေဗရာ ၂၃ ရ။
နကဵုပရေၚ်ထံက်ဂလာန် ဌာနဝန်ဇၞော်သၞောဝ်ဓဝ်တုဲ နူဌာနဏံ ပတိတ်လဝ်လာပ်သြန် ဒဝ်လာ ၁၀၀ ကိုတ် မဒှ်ရ။
ဂကောံရာဇဝတ် တတ်ကၠောံပယျဵု ဖျေံလဝ်သ္ဇိုၚ် ပ္ဍဲအာယှအဂၞဲတံဏံ ကၠောန်မံၚ်ပရေၚ်လီဠာန်အန်လာၚ် ဇၞော်ကဵုဇြဟတ်တံဂှ် စွံလဝ်ပွန်ကဵု လ္တူကောန်ဍုၚ်အမေရိကာန်တံ ပဵုဂၠိုၚ်တိုန်မံၚ်ရောၚ် ဌာနဝန်ဇၞော်ပရေၚ်ဘဏ္ဍာ ဟီုရ။
လၟိဟ်ပမာဏသြန် ကောန်ဍုၚ်အမေရိကာန်တံ ဒးဆောံလေၚ်အာလဝ် ပ္ဍဲကမၠောန်ကျာဖျတံ မၞုံပ္ဍဲအာယှအဂၞဲဂှ် ပ္ဍဲသၞာံ ၂၀၂၅ မ္ဂး နွံမံၚ်ဒဝ်လာ ၇ ဒသမ ၂ ဗဳလဳယာန်ပြၚ်ရောၚ် အလဵုအသဳအမေရိကာန် တော်ခယျလဝ်ရ။
ဂကောံကမၠောန်ကျာဖျတိုၚ်ချာန်ဂှ် မၞုံမံၚ်ပ္ဍဲတွဵုရးကရေၚ် ပယျဵုဍုၚ်ဗၟာကဵု ဍုၚ်သေံတုဲ ကၠောန်မံၚ်ကမၠောန်ကျာဖျ ဗွဲမဂၠိုၚ်ရောၚ် အမေရိကာန် ဟီုရ။
နူကဵု FBI (အက်ဖ်ဘဳအိုၚ်) ဗက်ဂၠိုက်ဂၠာဲဒၞာဲဇိုၚ်အရာမလီဠာန်တံ၊ သြန်ရဲဒးဒုၚ်အလီတံ ဂစာန်မံၚ် ညံၚ်ကလေၚ်ဂွံတံဂှ် ကၠောန်ကၠုၚ်မံၚ် ပရေၚ်စၟဳစၟတ်တံနွံရ။
ညးဖန်ဖက်စဳရေၚ်အုပ်ဓုပ်မံၚ် ဂကောံကမၠောန်ကျာဖျ မၞုံပ္ဍဲကွာန်မေန်လက်ပါန် ဂကူကြုက်ၜါတၠ ဟောန်ယှေန်သာန် ကဵု ကျာန်ဝါန်ကျဳတံဂှ် ပ္ဍဲကဵုအမေရိကာန် စောဲလဝ်အမှုတုဲရ။
ညးမဒးဒုၚ်စောဲလဝ်အမှု ပ္ဍဲဝါယှေန်တာန် သီုၜါတၠဏံဂှ် ဟိုတ်နူလုပ်ဍုၚ် ဗွဲဟွံလုပ်သၞောဝ်တုဲ အလဵုအသဳသေံ ရပ်ဂွံလဝ်ရောၚ်ဂှ် ပ္ဍဲတၞးလိက်ရုၚ်သၞောဝ်ဓဝ်တံ ဗၟံက်ထ္ၜးလဝ်ရ။
ကြဴနူဒပ်ပၞာန်ဗၟာ ဗတိုက်ပလီုဒၞာဲဍေံတံတုဲ ဍေံတံပြံၚ်အာမံၚ် လပါ်ဍုၚ်ခမေန်ကီုလေဝ် ပ္ဍဲသၞာံစမံက်ဏံဂှ် ညးတာလျိုၚ်သေံတံ ရပ်ဂွံလဝ်ရောၚ်။
ညးၜါတၠဏံ သွက်ဂွံအာစိုပ်ရုၚ်သၞောဝ်ဓဝ် ပ္ဍဲအမေရိကာန်ဂှ် အခိၚ်လဵု သၠောဲပြံၚ်ကဵုရောဂှ်တှ်ေ ဟွံဂွံတီလဝ် သောၚ်သောၚ်ကၠးကၠးဏီပုဟ်။
ပရိုၚ် – သြၚ်လောန်တိုၚ်မ်
Ref:abc/ US gov