ဝါယှေန်တာန်၊ မေ ၃
ဟိုတ်နူဒေါအ်ပန်ပှော်ကဵု အဳရာန်တုဲ အရာပေါဲဗတိုက်ဂၠာဲမံၚ်သၞတင်တံဂှ် အာစိုပ်ဒတုဲယျရောၚ် သမ္မတအမေရိကာန် ဒဝ်နေဝ်ထရ ဟီုရ။
နကဵုညးတေံ သွက်ဂွံဆက်ဗတိုက်အာ ပေါဲပၞာန်အဳရာန်ဂှ် အခေါၚ်နူစၠတ်ထဝ် ဟွံဒးကေတ်ပုဟ် ထရ သ္ဂးရ။
အပ္ဍဲလိက်မပလံၚ်ဗစိုပ်လဝ်ကဵု က္ဍိုပ်သ္ကိုပ်စၠတ်ထဝ်တံဂှ် ပေါဲပၞာန်အဳရာန် ဟိုတ်နူဒေါအ်လဝ် ပန်ပှော်ညးသ္ကံ တုဲဒှ်မံၚ်တုဲ ဒှ်မံၚ်ပေါဲပၞာန်ဖိုဟ်ဏီရောၚ် သ္ပစၟတ်သမ္တီဟွံဂွံပုဟ် ထရ ဗၟံက်ထ္ၜးလဝ်ရ။
အတိုၚ်ဥပဒေသောၚ်ကလးဇြဟတ်ပၞာန် သၞာံ ၁၉၇၃ မ္ဂး သမ္မတအမေရိကာန်မွဲတၠမ္ဂး အခေါၚ်ရပ်စပ်ကေတ်အရေဝ် နကဵုနဲကဲပၞာန် နွံဆပွိုၚ် ၆၀ တ္ၚဲဟေၚ် မဒှ်ရ။
ကြဴနူဂှ်မ္ဂး ဒးအာတ်အခေါၚ်နူစၠတ်ထဝ်၊ ဟွံသေၚ်မ္ဂး ယဝ်ရကိစ္စဇၞော် နွံတိုန်ပၟိက်ဗွဲမပြဟ်မ္ဂးတှ်ေ ထပ်ဆက်အာယုက် ၃၀ တ္ၚဲ ဂွံမာန်ရ။
ဆေၚ်စပ်ကဵု နူအဳရာန် ပတိုန်ဂလာန်လက္ကရဴအိုတ်ဂှ် သမ္မတထရ ဟွံပေၚ်မံၚ်စိုတ်ရောၚ် ဗၟံက်ထ္ၜးမံၚ်ပ္ဍဲအခိၚ်ဂှ် အရာအဳရာန်မပတိုန်လဝ်ဂလာန်တံ ဒးဒုၚ်တးပါဲထောံယျဂှ် ဌာန်ပရိုၚ်အလဵုအသဳအဳရာန် ဗၟံက်ထ္ၜးလဝ်ရ။
စနူလဝေၚ်ပၞာန်ဗလးကျာ လောန်ကၠုၚ် ၂ ဂိတုတေံတုဲ ပရူပေါဲပၞာန်ဂှ် ကြဴနူ ၄၈ နာဍဳမ္ဂး ဒးကဵုအာသမ္တီ ဗွဲမလုပ်သၞောဝ် ဇရေၚ်စၠတ်ထဝ်တုဲ အခေါၚ်သ္ဂုတ်သွာတ်နွံဆပွိုၚ် ၆၀ တ္ၚဲဟေၚ် မဒှ်ရ။
အပိုၚ်အခြာ ၆၀ တ္ၚဲဂှ် ပ္ဍဲဂိတုမေ ၁ ပေၚ်စိုပ်အာတုဲ ပ္ဍဲအခိၚ်ဏံ သွက်ဂွံဆက်ကၠောန်ပေါဲပၞာန်ဂှ် အခေါၚ်နူစၠတ်ထဝ် ဟွံဒးကေတ်ရောၚ် ထရ ဟီုကၠုၚ်ရ။
အဝဵုမသုၚ်စောဲဂွံ ဆေၚ်စပ်ကဵုပေါဲပၞာန်ဂှ်တှ်ေ ဟွံကိတ်ညဳကဵုသ္ဇိုၚ်သၞောဝ်ဥပဒေပုဟ် ထရ သ္ဂးရ။
ပ္ဍဲအမေရိကာန် စၟတ်သမ္တီလဝ် သမ္မတဂှ် ဒှ်ပူဂိုလ်အဆံၚ်သၠုၚ်အိုတ် အပ္ဍဲဒပ်ပၞာန်တုဲ၊ ဥပဒေဏံဂှ်တှ်ေ ဟွံကိတ်ညဳကဵုသ္ဇိုၚ်သၞောဝ်ဥပဒေပုဟ် သမ္မတရဳပါတ်ဗလေကၚ်ကီု သမ္မတဒဳမဝ်ကရေတ်တံကီ ကေၚ်ပတိုန်လဝ်ဂလာန်စောဒကကီုရ။
“ပိုဲတံ ဒေါအ်လဝ်ပန်ပှော် ညးသ္ကံရ။ ဟိုတ်နူဂှ်ရ သွက်ပိုဲတံ ဂွံအခိၚ်ဂၠိုၚ်တိုန်ကၠုၚ်ရ” သာ်ဝွံ ထရဟီုရ။
ပြဟ်ဟ်ဏံ သၞေဟ်က္ၜၚ်အဳရာန်တံဂှ် နူကဵုဒပ်ဍာ်အမေရိကာန် ကၟာတ်ဆိုအ်လဝ်တုဲ ဂၠံၚ်ဍာ်က္ၜၚ်ကိစ္စဇၞော် သွက်ကၠေၚ်ဍေၚ်ဂၠးကဝ်ဂှ်လေဝ် အဳရာန် ကၟာတ်လဝ်တုဲ၊ အလုံမွဲဂၠးကဝ် ဒးဂဗမံၚ်ကဵုပြသၞာဓာတ်အစောမ်တံ အိုတ်ရ။
Ref:Reuters