သိုလ်၊ မေ ၅
အပ္ဍဲကဵုဂိတုဏံ ဂကောံဗဝ်ညးဗြဴကိုဝ်ရဳယျာသၟဝ်ကျာမွဲဂကောံ သွက်ဂွံအာကိုဝ်ရဳယျာသၠုၚ်ကျာနွံတုဲ ကြဴနူသၞာံ ၂၀၁၈ မ္ဂး ဂကောံဗဝ်ကိုဝ်ရဳယျာသၟဝ်ကျာ ကၠုၚ်ဝေၚ်ကိုဝ်ရဳယျာသၠုၚ်ကျာ ဒှ်ကၠာအိုတ်ရောၚ်ဂှ် ဌာနဝန်ဇၞော်ပရေၚ်ကလေၚ်ပံၚ်ကောံ ကိုဝ်ရဳယျာသၠုၚ်ကျာ ဟီုလဝ် ပ္ဍဲဂိတုမေ ၄ ရ။
ပေါဲပၞာန်ကတဵုဒှ်လဝ် အကြာဍုၚ်ကိုဝ်ရဳယျာသီုၜါလ္ပာ် အပ္ဍဲသၞာံ ၁၉၅၀ စဵုကဵု ၁၉၅၃ ဂှ် တုဲဒှ်အာလဝ် နကဵုတင်တုပ်စိုပ်ပရေၚ်ၜိုဟ်လလမ်ဟွံသေၚ် ဆၜိုတ်တင်တုပ်စိုပ်ဒေါအ်ပန်ပှော်ဟေၚ် တုဲဒှ်ကၠုၚ်လဝ်ဂှ်ရ အကြာဍုၚ်ၜါဏံ သဘဴပေါဲပၞာန်ဒှ်မံၚ်ဏီရ။
ပရေၚ်ဆက်ဆောံဂတးဂတန် ဆေၚ်စပ်ကဵုပရေၚ်ဝေၚ်ဒြဟတ် ကေုာံ ယေန်သၞာၚ် အကြာဍုၚ်ၜါလေဝ် ဝါတ်ဂါတ်မံၚ် ဗွဲမလောန်ရ။
ဂကောံဗဝ်ညးဗြဴ “နေဂိုယန်” နူကိုဝ်ရဳယျာသၟဝ်ကျာဝွံ သွက်ဂွံဒစးဒုၚ်ပြိုၚ်အာ ပေါဲပြိုၚ်ဒေၚ် ချာန်ပဳယာန်လိဂ် ကုဂကောံဗဝ်ညးဗြဴ “ဆူဝမ်” ကိုဝ်ရဳယျာသၠုၚ်ကျာ ပ္ဍဲဂိတုမေ ၂၀ တုဲ၊ သွက်ဂွံဗလံၚ်ဗစိုပ်ဏာ ကောန်ဂကောံ ၃၉ တၠနွံရောၚ်ဂှ် နူကဵုကိုဝ်ရဳယျာသၟဝ်ကျာ ဒစးဒုၚ်ကဵုလဝ်သမ္တီကၠာရောၚ်ဂှ် ဌာနဝန်ဇၞော်ပရေၚ်ကလေၚ်ပံၚ်ကောံ လလောၚ်တြးလဝ်ရ။
အပ္ဍဲဂကောံညးစၞးကိုဝ်ရဳယျာသၟဝ်ကျာဂှ် သၟာဝေၚ်ဒြဟတ် ၂၇ တၠ ကေုာံ ညးယိုက်ဝန်ဂကောံ ၁၂ တၠ ပါလုပ်ရောၚ် ဌာနဝန်ဇၞော် ဟီုရ။
ဆဂး အခိၚ်ဂကောံဗဝ်ညးဗြဴကိုဝ်ရဳယျာသၟဝ်ကျာ ဂွံစိုပ်ကၠုၚ်ဍာံဍာံဂှ်တှ်ေ ဌာနဝန်ဇၞော်ကိုဝ်ရဳယျာသၠုၚ်ကျာ ဗၟံက်ထ္ၜးလဝ်ဟၟဲပုဟ်။
ဂကောံဇၞးအာပေါဲဏံဂှ်တှ်ေ ပ္ဍဲဂိတုမေ ၂၃ မ္ဂး သွက်ဂွံပြိုၚ်ပေါဲပၠံၚ်ဗိုလ် ချာန်ပဳယာန်လိဂ်ညးဗြဴအဆံၚ်သၠုၚ်အာယှ ကရောံဂကောံ “မေလ်ဗုၚ် သဳတဳ” နူအဝ်သတေလျ ဟွံသေၚ်မ္ဂး ဂကောံ “တိုကျို ဘာဒဳ ဗဳလဳဇာ” နူဂျပါန် ရောၚ်။
ဂကောံကျအာမ္ဂးတှ်ေ ပ္ဍဲဂိတုမေ ၂၁ ဂှ် ဒးကလေၚ်ဌာန်တုဲ ပေါဲပြိုၚ်သွက်ဂွံဂွံဒၞာဲအဆံၚ်ပိဂှ်ဟၟဲပုဟ် ဌာနဝန်ဇၞော်ပရေၚ်ကလေၚ်ပံၚ်ကောံ ကိုဝ်ရဳယျာသၠုၚ်ကျာ ဟီုရ။
ဂကောံဗဝ်ကိုဝ်ရဳယျာသၟဝ်ကျာဝွံ ဒှ်ဂကောံအုပ်ဓလီုလဝ် ပေါဲပြိုၚ်ဗဝ်ညးဗြဴအာယှတုဲ ပ္ဍဲသၞာံတံဏံမ္ဂးတှ်ေ ကလိဂွံလဝ်လာပ်တဆိပ်ဂၠးကဝ်ဗွဲမဂၠိုၚ်ရ။
Ref:AFP