ပုၚ်သလုက်၊ မေ ၅
ပ္ဍဲရးဒေသဗဂေါ ပွိုၚ်ဍုၚ်ကျံက်ကျဳ အကြာဍုၚ်ပုၚ်သလုက် ကဵု ကွာန်ကုန်သေဌဳ လ္တူဒဒန် ဂၠံၚ်ကွဳပၟတ် ၁၄၇ ဂိက်သၞေဟ်ကင် ဒပ်ပၞာန်ဗမာ ဖျေံလဝ်ဗ္ဒိုပ်ဂှ် ဗတိုက်သီကေတ် ပလီုထောံလဝ်ရောၚ် နူဗဟဵုဗော်သွးကောန်ဂကူကရေၚ် KNU လလောၚ်ပတိတ်လဝ် ပရိုၚ်ရ။
ပ္ဍဲဂိတုမေ ၂ အခိၚ်ဗ္တံ ၉ နာဍဳကဝက်ပြင်ပြင်ဂှ် ရဲဒပ်တၟေၚ် တမ်ဒပ် (၉) ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်ဗတိုက်လဝ် ဗဒိုပ်သၞေဟ်ကင်ဂိက်ပၞာန်ဏံ မဒှ်ရ။
အပ္ဍဲပေါဲဗတိုက်အကြာၜါလ္ပာ်ဏံဂှ် လပါ်ဒပ်ပၞာန်ဗၟာ ညးတာလျိုၚ် ၂ တၠ ကေုာံ ကောန်ပၞာန် ၃ တၠ ချိုတ်အာတုဲ သီဂွံလဝ်လွဟ် ၅ ဇကိုအ် ကဵု ကပေါတ်ဆက်စပ်တံကီုရ။
အပ္ဍဲပေါဲဗတိုက်ဏံ စုတ်ပၟတ်စံၚ်ပလီုထောံလဝ်တာဲဗဒိုပ် ၃ မတုဲ လ္ပာ် ရဲဒပ် KNLA တံ ပရေၚ်ဒးဝပ်ချိုတ်ဟၟဲ ဗွဲမအံၚ်ဇၞး ကလေၚ်ဆုတ်တိတ်ကၠုၚ်မာန်ရောၚ် ကဵုသမ္တီပတိတ်လဝ်ပရိုၚ်ရ။
လ္တူဒပ်ပၞာန်သီအဝဵုမ္ဂး နကဵုနဲကဲပရေၚ်ဍုၚ်ကွာန်၊ ပရေၚ်ပၞာန် KNU ဆက်တဝ်စၞေဟ်မံၚ်တုဲ၊ အရာညးဍုၚ်ကွာန်တံ နွံမံၚ်ပၟိက် ကၟိန်ဍုၚ်ပံၚ်ကောံ ဖိတ်ဒရေဝ်ဒဳမဝ်ကရေဇြဳဍာံစၟတ် သွက်ဂွံမံက်ဂတဝ်ကၠုၚ်ဂှ်လေဝ် ဂစာန်ပတိတ်မံၚ်ဇြဟတ် လၟိုန်ရောၚ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – KNU