ဗြဝတီ၊ မေ ၅
အပ္ဍဲတွဵုရးကရေၚ် လ္ပာ်သၠုၚ်ကျာဍုၚ်ဗြဝတီ ဒေသဖလူ၊ မေန်လက်ပါန် ပယျဵုသေံ-ဗၟာဂှ် အကြာဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံ ပေါဲဗတိုက်အကြာၜါလ္ပာ် ဆက်ကတဵုဒှ် မံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
သွက်ဂွံကလေၚ်သီကေတ် ဒေသမေန်လက်ပါန်ကဵု ဖလူဂှ် ဒပ်ကဝ်မယှေန်ပၞာန် နူကဵုဍုၚ်ဗြဝတီကဵု ဍုၚ်လေကေကဝ် ဇြဟတ်ဗွဲမဂၠိုၚ် ထပက်ကရောၚ်ပၞာန်တုဲ ပေါဲဗတိုက်တံ ကတဵုဒှ်မံၚ်ကဵု ဂကောံဇြဟတ်ပၠန်ဂတး KNLA မဟာဒပ် ၆ တံ ဇၟာပ်ပ်တ္ၚဲရောၚ် ညးဒေသဖလူမွဲတၠ သ္ဂးရ။
ဟိုတ်နူဂကောံဇြဟတ်ပၠန်ဂတးတံ ကလေၚ်ဒုၚ်ဒဝ်ဗတိုက်မံၚ်ဂှ်တုဲ ပ္ဍဲဒေသဖလူ၊ မေန်လက်ပါန်တံဂှ် နူကဵုဒပ်ကဝ်မယှေန်ပၞာန် ဆက်တိုန်အာဂတးဟွံမာန်ကီုလေဝ် သုၚ်စောဲၜၚ်ကျာတုဲ ကြဳဗုမ်ကီု ပန်လွဟ်ဇၞော်ကီု ထပက်ကရောၚ်ပၞာန် ဆက်တုဲကၠောန်မံၚ်ရောၚ် ညးဒေသဂှ် ဟီုရ။
အပ္ဍဲဂိတုမေ ၃ တေံ လပါ်ကုန်ဒဵုဖလူဂှ် အကြာဒပ်ကဝ်မယှေန်ပၞာန် ကဵုဂကောံဇြဟတ်ပၠန်ဂတးတံ ပေါဲဗတိုက်ဆက်ကတဵုဒှ်မံၚ်ရောၚ် ညးဒေသဖလူတံ ဟီုရ။
သွက်ဂွံထိၚ်ချုက်သီကေတ် တိဍာ်ဒေသ ဖလူ၊ မေန်လက်ပါန် မာန်ဂှ် အပ္ဍဲဂိတုအေဗရာ တုဲကၠုၚ်ဏံ နူကဵုဒပ်ကဝ်မယှေန်ပၞာန်တံ သုၚ်စောဲဒရုၚ် ကြဳဗုမ်ပၟတ် လ္တူကွာန်ဂှ်ရ သ္ၚိဌာန်ညးဒေသ ကွာန်မေန်လက်ပါန် ကဵု ကွာန်ဖလူ ဗွဲမဂၠိုၚ် ပၟတ်တဴ လီုလာ်အာရ။
ညးဂြိပ်ပါဲဘဲပၞာန်လ္ၚဵုတံဂှ် ကလေၚ်သှ်ေမံၚ် အပ္ဍဲကွာန်နွံကီုလေဝ် ဟိုတ်နူပေါဲဗတိုက်ဒှ်မံၚ်တုဲ ညးဂြိပ်ပါဲဘဲပၞာန်ဗွဲမဂၠိုၚ်တံဂှ်တှ်ေ ဆက်တုဲဒးဂြိပ်ပါဲမံၚ်အပ္ဍဲဒၞာဲဗၠးဘဲတံဂှ်ရ ဒးဆဵုဂဗမံၚ်ကဵု အခက်အခုဲဗွဲမဂၠိုၚ်ရောၚ် ညးဒးဂြိပ်ပါဲမံၚ်ဘဲပၞာန် နူကွာန်ဖလူမွဲတၠ သ္ဂးရ။
ဗဒိုပ်ဗျူဟာပၞာန်ဝဝ်လေ မၞုံကရပ်ပယျဵုသေံဂှ် နူကဵုဂကောံဇြဟတ်ပၠန်ဂတးတံ ဗိုၚ်ဂေတ်ကၟာတ်ဆိုအ်လဝ်တုဲ ညံၚ်ဗဒိုပ်ဟွံဂွံစှ်ေအာဂှ် နူကဵုဒပ်ပၞာန်ဗမာ သုၚ်စောဲအရီုဗၚ်ဗလးကျာ စွံလဝ်အဓိကတုဲ ကလေၚ်ဗတိုက်မံၚ်ဂှ်ရ ဂကောံဇြဟတ်ဒပ်ပံၚ်ကောံပၠန်ဂတးတံ စဵုကဵုတ္ၚဲဏံ သီကေတ်ဗဒိုပ်ဗျူဟာ ဟွံမာန်ဏီကီုလေဝ် ဆက်တုဲ တဝ်စၞေဟ်ဗတိုက်မံၚ် မဒှ်ရ။
အပ္ဍဲပေါဲဗတိုက်ဗျူဟာဝဝ်လေ ဟိုတ်နူကဵုဒပ်ပၞာန် ကြဳဖျေံဗုမ် ဒုၚ်ဗတိုက်မံၚ်နူကဵုဗလးကျာ ဗွဲမသ္ကာတ်မြဟ်ဂှ်တုဲ ကွာန်ထဳတေဝ်လေဝ် မၞုံကရပ်ဗျူဟာကဵု လ္တူဍုၚ်ဝဝ်လေ အရာပ်လ္ၚဵုတံဂှ် ဒးလဝ်ဘဲဗုမ်လွဟ်ဇၞော်တံတုဲ လီုလာ်အာဂှ်ကီု ညးဒေသတံလေဝ် ဆက်တုဲဒးဂြိပ်ပ်ပါဲမံၚ် ဘဲပၞာန်ဖိုဟ်ရ။
ပရိုၚ် – သြၚ်လောန်တိုၚ်မ်
Photo – CJ