မတ်မလီု၊ မေ ၅
အပ္ဍဲကဵုတွဵုရးမန် အရာမနွံမံၚ်ပၟိက် သွက်ဒေသတံကီု အခက်အခုဲ ပြသၞာ ဒးဇီုကပိုက်ဆဵုဂဗမံၚ်တံကီု သွက်ဂွံကၠုၚ်သဳကၠဳ ပတိုန်ထ္ၜးအာအိုတ်ညိဂှ် ညးစၞးစၠတ်ထဝ် (အမာတ်) နူဗော်ညီသၟဟ်မန်တံ ဘိက်ပၟိၚ်လဝ် ညးဍုၚ်ကွာန်တံ ရ။
သွက်ဂွံက္လၚ်အာ ပရူပရာအရာညးဒေသတံ နွံပၟိက်မံၚ်ဂှ်ကီု အခက်အခုဲပြသၞာညးဍုၚ်ကွာန်တံဂှ် ကြပ်ပ် ညံၚ်ဂွံသောၚ်ကလး ရေၚ်တၠုၚ်ကဵုအာ ဗွဲမဂတာပ်အခိၚ်ဂှ်ရ ပ္ဍဲရုၚ်ဗော်-ပွိုၚ်ဍုၚ်တံဂှ် ပံက်လဝ်ရုၚ် ညးစၞးစၠတ်ထဝ် (ရုၚ်အမာတ်) တံရောၚ် ကဵုလဝ်သမ္တီရ။
ဟိုတ်ဂှ်ရ အရာကိစ္စညးဍုၚ်ကွာန်တံ နွံပၟိက်မံၚ်တံကီု အခက်အခုဲကီု ဆက်စၠောံပတိုန်ထ္ၜးအာ တိုက်ရိုက်မာန်တုဲ နကဵုပရေၚ်ပံၚ်တောဲ သွက်ဂွံဇၞော်မောဝ် ပရေၚ်ဖောအ်ဗြဳဒေသဂှ် ဆက်တုဲကၠောန်အာ ရောၚ် အမာတ်ဗော်ညီသၟဟ်မန်တံ ဘိက်ပၟိၚ်လဝ်ရ။
ဆေၚ်စပ်ကဵု အခက်အခုဲညးဍုၚ်ကွာန်တံမ္ဂး စဵုကဵုဘိုအ်ဂွံဒးအာ ရုၚ်အမာတ်တံဟွံသေၚ် ညးစၞးစၠတ်ထဝ်တံဟေၚ် ဒးစှ်ေကၠောန် ရေၚ်တၠုၚ်ကဵု ပ္ဍဲဗလးတိဍာ်ဂှ် နွံမံၚ်ပၟိက်ရောၚ် ညးဒေသမုဟ်ဍုၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အခိၚ်ကၠာတေံ ခေတ်ပရေၚ်ဍုၚ်ကွာန် ခိုဟ်မံၚ်တေံမ္ဂးတှ်ေ ညးစၞးအမာတ်တံ စှ်ေကၠောန်ပ္ဍဲဒေသအိုတ်ရ။ ဟွံဒးအာ ပ္ဍဲရုၚ်ညးတံပုဟ်။ ဒၞာဲပိုဲတံ ဒှ်မံၚ်အခက်အခုဲ ပ္ဍဲအခိၚ်လၟုဟ် နကဵုညးတံ ယဝ်ရစှ်ေကၠုၚ်လ္ၚတ်တှ်ေ ဍေံပဵုတုဲပြေပြံၚ်ရ” သာ်ဝွံ သ္ဂးရ။
အပ္ဍဲပေါဲရုဲမာဲ တုဲကၠုၚ်တေံ ဒၞာဲဗော်ညးတံ ဇၞးလဝ်မာဲဂှ် ပြဟ်ဟ်ဏံ ဗော်ညီသၟဟ်မန် ပံက်လဝ်ရုၚ်ညးစၞးစၠတ်ထဝ် (ရုၚ်အမာတ်) အပ္ဍဲပွိုၚ်ဍုၚ်ပံၚ်၊ ၜါသွာင်၊ မုဟ်ဍုၚ်၊ ဇြပ်ဗု ကေုာံ ရေဝ် တံရ။
ပရေၚ်ပံက်လဝ်ရုၚ်အမာတ်တံဏံဂှ် သွက်ဂွံကလၚ်ရမျှာၚ် ညးဍုၚ်ကွာန်တံ ဟွံသေၚ်၊ အမာတ်ညးစၞးတံဂှ် ကၠုၚ်ဆဵု ညးဍုၚ်ကွာန်တံဟွံမာန်တုဲ ညံၚ်ကဵုဒှ်မံၚ် ဒၞာဲဆၜိုတ်ဒုၚ်တဲ တၞးလိက်တံသၟးဂှ်ရ သ္ၚောဲမံၚ်ကဵု ပရေၚ်ဓရ်ဍာံဏီရောၚ် ညးဒေသရေဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ဗော်ညီသၟဟ်မန် ပံက်ရုၚ်ညးစၞးဂှ် အဓိကတှ်ေ သွက်ဂွံဒုၚ်တဲလိက်တေၚ်စိုပ်တံရ။ ညးတံကလေၚ်ရမျှာၚ် ညးဍုၚ်ကွာန်တံဟွံသေၚ် ဆၜိုတ်ဒၞာဲဒုၚ်တဲတၞးလိက် နူကဵုညးဍုၚ်ကွာန်တံ။ ပ္ဍဲဍုၚ်ပိုဲဏံ ညးစၞးဒးဒုၚ်ရုဲစှ်လဝ်တံဂှ် စဵုကဵုလၟုဟ် မွဲတၠလေဝ် ဟွံကၠုၚ်ဆဵုဂဗကဵုညးဍုၚ်ကွာန်တံပုဟ်။ ဟိုတ်ဂှ်ရ အရာကိစ္စလ္ၚဵုတံဂှ်တှ်ေ သ္ၚောဲမံၚ်ကဵုပရေၚ်ဓဝ်ဍာံဖိုဟ်ဏောၚ်” သာ်ဝွံ သ္ဂးရ။
တုဲပၠန် အပ္ဍဲကဵုဒေသ အခက်အခုဲပရေၚ်ပိုန်ဒြပ် ကတဵုဒှ်မံၚ်ဂှ်ကီု၊ ပြသၞာပရေၚ်မံၚ်စံၚ်စသုၚ်၊ သၟတ်တံဒးဒုၚ်ရပ်မံၚ် ဟိုတ်နူ ပရေၚ်ယိုက်ဝန်ပၞာန်ကီု၊ နကဵု အမိၚ်ဒေသန္တရ ညးတြုံၜါတၠ ဍိုက်လိုန်ဓါတ်ဟွံဂွံတံဂှ်လေဝ် သောၚ်ကလးကဵုဟွံမာန်တုဲ ဂဇအ်မံၚ် ပ္ဍဲရုၚ်တုဲ ကဵုကၠုၚ်ပတိုန်ထ္ၜး အခက်အခုဲဟီုဂှ်တှ်ေ ဒှ်မံၚ်ညံၚ်ရဴ အရေဝ်ဟရိုၚ်မွဲရောၚ် ညးဆက်ဟီုရ။
စပ်ကဵု ဗော်ညီသၟဟ်မန် ပံက်လဝ်ရုၚ်ညးစၞးစၠတ်ထဝ် သွက်ဂွံသောၚ်ကလးအာ အခက်အခုဲညးဍုၚ်ကွာန်တံဂှ်တုဲ နူကဵုဌာန်ပရိုၚ်သြၚ်လောန်တိုၚ်မ် ဆက်စၠောံသၟာန်လဝ် ညးအခေါၚ်ဟီုဂးဗော် နာဲတာန်ယှိုဲ ကီုလေဝ် ဒုၚ်တဲသောၚ်ကလးကဵု ဟၟဲပုဟ်။
ဗော်ညီသၟဟ်မန် ဖျေံသ္ဇိုၚ်အပ္ဍဲတွဵုရး ဒပ်ပၞာန်သ္ကိုပ်သ္ကကၠောန်လဝ် အပ္ဍဲပေါဲရုဲမာဲတုဲကၠုၚ်ဂှ်တှ်ေ ဂွံလဝ်ဒၞာဲဆန္ဒမာဲ ညးစၞးစၠတ်ထဝ်ဂှ် ညးဍုၚ်ကွာန် ၅ ဒၞာဲ၊ ညးစၞးစၠတ်ထဝ်ကောန်ဂကူ ၅ ဒၞာဲ ကေုာံ ညးစၞးစၠတ်ထဝ်တွဵုရး ၇ ဒၞာဲ မဒှ်ရ။
ပရိုၚ် – သြၚ်လောန်တိုၚ်မ်
Photo – MUP