ဍာ်ဗု၊ မေ ၇။
အပ္ဍဲကဵု ရးဒေသတနၚ်သဳ ပွိုၚ်ဍုၚ်ဍာ်ဗု ဟိုတ်နူဒပ်မယှေန်ပၞာန် ထပက်မံၚ်ကရောၚ်ပၞာန် ကွာန်နွံအကြာ ဍုၚ်ကလိၚ်အံၚ်ကဵု ဒဵုဟလဲတံဂှ် ညးဒေသ လၟိဟ်ကဵုလ္ၚီ ဒးဂြိပ်ပါဲဓလေတ်မံၚ်ရောၚ် ရိုဟ်ကၞက်ပရိုၚ်ဒေသတံ ဟီုကဵု သြၚ်လောန်တိုၚ်မ်ရ။
ဒပ်ကဝ်မယှေန်ပၞာန် ဇြဟတ် ၁၀၀ ပြၚ်တံ စပ္တံနူဂိတုမေ ၁ လောန်ကၠုၚ်ဂှ် နူကဵုဍုၚ်ကလိၚ်အံၚ် မွဲအဆံၚ် ကရောၚ်ပၞာန် ထပက်လုပ်ကၠုၚ် ပွဳဗွိုၚ်ကွာန်ရတ်တၟး၊ သာယာမန်၊ ၆၀ တိုၚ်၊ ကြုၚ်ဗရာၚ် ကေုာံ ကွာန်ဍာ်တဴတံရ။
ဟိုတ်နူဒပ်ကဝ်မယှေန် ထပက်ကရောၚ်ပၞာန်တုဲ ညးဒေသ နူကွာန်မသုန်ကွာန် လၟိဟ်လ္ၚီပြၚ်တံ ဒးဂြိပ်ပါဲဓလေတ်မံၚ် ဇရေၚ် ဒၞာဲဗၠးဘဲကဵု ပ္ဍဲကဵုဂြိုပ်ဒဵုကၠအ်ဝါ မနွံဗဒါဲတံဂှ်ရ။
အခိၚ် ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဂှ် ပန်မံၚ်လွဟ်ဇၞော်လွဟ်ဍောတ် အဆက်ဟွံပိုတ် အလုံမွဲဂၠံၚ်တုဲ ညးဒေသတံ စိုတ်ဒှ်ဒွိၚ်ဂွိၚ်ဖေက်မံၚ် သွက်ဘဲအန္တရာဲလမျီုရောၚ် သ္ဂးရ။
ကရောၚ်ပၞာန်ဏံဝွံ စဵုကဵုစိုပ်မေ ၆ ဂှ်ဖျေံလဝ်သဇိုၚ် ပွဳဗွိုၚ်ကွာန်ဍာ်တဴ ဖိုဟ် ဟွံကလေၚ်ဆုတ်တိတ်အာဏီတုဲ ညးဒေသတံ စိုတ်ဒှ်မံၚ်ဒွိၚ် ဖေက်ဒှ်ကၠုၚ်ပေါဲဗတိုက် အကြာၜါလပါ်တံရ။
အပ္ဍဲကဵု ရးဒေသတနၚ်သဳ ပေါဲဗတိုက်အကြာၜါလပါ် ဒှ်ဒၟံၚ် မွဲဏှမွဲဏှဂှ်ရ ညးဒေသကြပ်မွဲကိုတ်တံ ထောံဌာန်ဒၞာဲဝါဲတုဲ ဂြိပ်ပါဲဓလေတ်မံၚ်အိုတ်ရောၚ် ဂွံတီလဝ် နူကဵုဂကောံသုတေသနဒေသ FE5 Thanintharyi ရ။
ပရိုၚ် – သြၚ်လောန်တိုၚ်မ်
Photo – Social Media