ၜဳကလေၚ်၊ မေ ၇။
အပ္ဍဲကဵုပေါဲဗတိုက်သီဗ္ဒိုပ် ဝေင်တာပါန် ပွိုၚ်ဍုၚ်ၜဳကလေၚ် တွဵုရးမန်ဂှ် ဒပ်ကဝ်မယှေန်ပၞာန် စကာသုၚ်စောဲကၠုၚ် က္ဍိုၚ်ကျာစက် ပါရာမဝ်တာတုဲ ကြဳမံၚ်ဗုမ် ဇၟာပ်တ္ၚဲရောၚ် ညးအုပ်ကာခရိုၚ်သဓီု KNU ပဒိုသဝ်ဧနိုင် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒပ်ပၞာန်ဗၠးၜးကောန်ဂကူကရေၚ် KNLA က္ဍိုက်ပ် ဂကောံဒပ်ပၠန်ဂတး တံ စပ္တံနူဂိတုအေဗရာ ၁၄ လောန်ကၠုၚ်ဂှ်တုဲ ကၠောန်မံၚ် ပေါဲဗတိုက်သီဗ္ဒိုပ် ဝေင်တာပါန်ရ။
အပ္ဍဲပေါဲဗတိုက်သီဗ္ဒိုပ်ဏံ ညံၚ်ဗ္ဒိုပ်ဟွံဂွံစှ်ေအာဂှ် ဒပ်ကဝ်မယှေန်ပၞာန်တံ နူကဵုပၞာန်ကျာ ပန်ဗိုၚ်မံၚ်ဇၞော်ကဵုဇြဟတ်တုဲ အခိၚ်ကြဴဏံတှ်ေ နကဵုက္ဍိုၚ်ကျာစက် ပါရာမဝ်တာ အိုတ်သြန် ၚုဟ်သက်သာတံဂှ် သုင်စောဲတုဲ ကြဳမံၚ်ဗုမ် ဇၟာပ်ပ်တ္ၚဲ မဒှ်ရ။
စပ္တံနူဂိတုအေဗရာ ၂၅ စဵုကဵုစိုပ်ဂိတုမေ ၄ ဒပ်ကဝ်မယှေန်ပၞာန် ပ္ဍဲပွဳဗွိုၚ်ကွာန်ဝေင်တာပါန်ဂှ် စကာသုၚ်စောဲ က္ဍိုၚ်ကျာစက် ပါရာမဝ်တာတုဲ ကၠုၚ်ကြဳမံၚ်ဗုမ် မွဲတ္ၚဲမ္ဂး အောန်အိုတ်ၜါဝါပြၚ်နွံရ။
ဟိုတ်နူပရေၚ်ကြဳဗုမ် နကဵုက္ဍိုၚ်ကျာစက် ပါရာမဝ်တာဂှ်တုဲ ကၠအ်ဝါညးဍုၚ်ကွာန် ကေုာံ သ္ၚိဌာန်မနွံဗဒါဲကွာန်တံ ပၟတ်တဴ လီုလာ်အာနွံကီုလေဝ် လၟိဟ်ၜိုတ်လဵုရောဂှ် ဟွံဂွံသ္ပလဝ်ဒတန်ဏီပုဟ် သ္ဂးလဝ်ရ။
အပ္ဍဲဂိတုအေဗရာ ၂၆ ဂှ်လေဝ် က္ဍိုၚ်ကျာစက် ပါရာမဝ်တာ ကၠုၚ်ကြဳဗုမ်မွဲမ ဒးဒုၚ်ပန်တုဲ ဒတုံစှ်ေအာ ပ္ဍဲဒၞာဲကြပ်ကဵု တမ်ဒပ် ခမရ ၃ ၜိုတ်ပိတိုၚ်နွံရောၚ် နူဌာနပၞာန်ရးတၟေၚ် ဒပ်ပၞာန်စဵုဒၞာညးဍုၚ်ကွာန် PDF လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – PDF