ထဝါဲ၊ မေ ၇။
အပ္ဍဲကဵုရးတနၚ်သဳ ပွိုၚ်ဍုၚ်ထဝါဲ ကောန်ဒပ် KTLA ၃၀ ပြၚ် ချဳဓရာၚ်မံၚ် ဗွိုၚ်ဒေသထဳခဳတံဂှ် သီုကဵုလွဟ်မကမ် လုပ်ကၠုၚ် ပံၚ်တောဲကု KNU မဟာဒပ် (၄) ယျရောၚ် ဂွံတီကေတ် နူညးတာလျိုၚ် ခရိုၚ်ဗိက်-ထဝါဲ KNU တံရ။
နူကဵုဒပ်ပၞာန်ကဝ်တူလေဝ် KTLA သ္ကိုပ်တမ်ဒပ် လၟိဟ် (၂) ဂှ် သ္ကိုပ်ဗိုလ် ဖိုဝ်အေလ် က္ဍိုက်ပ်တုဲ ညးတာလျိုၚ် ၇ တၠကီု သီုဖအိုတ် ကောန်ဒပ် ၃၀ ပြၚ်တံဂှ် သီုကဵုလွဟ်မကမ်ပေၚ်ၚ် လုပ်ကၠုၚ် ပံၚ်တောဲကဵု ဗော်သွးကောန်ဂကူကရေၚ် KNU မဟာဒပ် (၄) ရ။
ကောန်ဒပ် KTLA လုပ်ကၠုၚ်ပံၚ်တောဲလဝ်တံဏံဂှ် နူကဵု KNU မဟာဒပ် (၄) ပြဟ်ဟ်ဏံ စၟဳစၟတ်မံၚ်တုဲ ပရိုၚ်ဗွဲတြးဂှ် ခြာဟွံလံ ပတိတ်ကဵုရောၚ် ညးတာလျိုၚ်လလောၚ်ပရိုၚ် ခရိုၚ်ဗိက်-ထဝါဲ KNU ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲဒေသ KNU မဟာဒပ် ၄ မ္ဂး ကောန်ဒပ် KTLA ချဳဓရာၚ်မံၚ်တံဂှ် ဟိုတ်နူမွဲဏှမွဲဏှ အောပ်ကၠတ်ပန်သလိပ်လဝ် ဒပ် KNLA ကဵု PDF တံနွံတုဲ လ္တူဂကောံ KTLA ဂှ် နူကဵု KNU လလောၚ်တြးလဝ် နဒဒှ် ဂကောံပကီုပရာတ်ရ။
အပ္ဍဲဂိတုမာတ်ကဵု အေဗရာ လောန်ကၠုၚ်ဂှ်လေဝ် ဟိုတ်နူကောန်ဒပ် KTLA ကၠတ်ပန်လဝ်တုဲ ကောန်ဒပ် နူဒပ်ပၞာန်ဗထူ ၆ တၠ၊ ကောန်ဒပ် KNLA ၄ တၠ ကေုာံ ကောန်ၚာ်မွဲတၠ ချိုတ်အာလဝ်ကီုရ။
ဒပ်ပၞာန်ကဝ်တူလေဝ် KTLA ဂှ် နူကဵု ဒုသ္ကိုပ်ပၞာန် သဝ်နေဝ်တာမျ ဂဥုပ်သ္ကိုပ် ဒပ်စဵုဒၞာကောန်ဂကူကရေၚ် KNDO တြေံ နွံသၟဝ်တဲ KNU ဂှ် စဒက်ပ္တန်လဝ် ပ္ဍဲဂိတုဂျူလာၚ် ၁၆၊ သၞာံ ၂၀၂၂ လောန်ကၠုၚ်တေံ မဒှ်ရ။
ပရိုၚ် – သြၚ်လောန်တိုၚ်မ်
Photo – KNU