ဗေကျေန်၊ မေ ၇။
ကၠာသမ္မတအမေရိကာန် ဒဝ်နယ်ထရ ဟွံဂွံအာဆဵုဂဗကဵု သမ္မတကြုက် ယှဳကျေန်ဖျေန်ဏီဂှ် ဝန်ဇၞော်ပရေၚ်ဍုၚ်သအာၚ် အဳရာန် အဗတ်သ် အာရက်ချဳ ဆဵုဂဗလဝ်ကဵု ဝန်ဇၞော်ဍုၚ်သအာၚ်ကြုက် ဝမ်ယဳ ပ္ဍဲဂိတုမေ ၆ တ္ၚဲဏံရ။
အတိုၚ်ဌာန်ပရိုၚ်သေၚ်ဟွာ ဗၟံက်ထ္ၜးမ္ဂး လၟေၚ်တရဴဝန်ဇၞော် အာရက်ချဳဏံဝွံ ကြဴနူအမေရိကာန် ကေုာံ အေတ်သရေတံ ဗတိုက်လဝ် အဳရာန်တုဲ ဒှ်လၟေၚ်တရဴအာကြုက် ပထမအလန် မဒှ်ရ။
ပ္ဍဲအခိၚ် အဳရာန်ဒးဒုၚ်ဗတိုက်မံၚ်ဂှ် ဟိုတ်နူအဳရာန် ကၟာတ်ဆိုအ်လဝ် ပ္ၚံက်ၜဳဟဝ်မုဇ် မဒှ်ဒၞာဲကိစ္စဇၞော် သွက်ကၠေၚ်ဍေၚ်ဂၠးကဝ်တုဲ ပရေၚ်ဇြဟတ်ဓါတ်ကြုက်ဂွံရုံဂပ်အာဂှ် ယုတ်ဒေက်မံၚ်ရ။
ဍုၚ်ကြုက်ဝွံ ပ္ဍဲဂၠးတိဏံမ္ဂး ဒှ်ဍုၚ်မရာန်ပၠုပ် ကၠေၚ်ဍေၚ် ဂၠိုၚ်အိုတ်မွဲဍုၚ် မဒှ်ရ။
ကိုပ်ကၠာပေါဲပၞာန်ဟွံဒှ်ဏီ ဍုၚ်ကြုက် ရာန်ကေတ်လဝ် ကၠေၚ်ဍေၚ်အဳရာန် ပလံၚ်ပတိတ်ဍုၚ်မ္ၚး စဵုကဵု ၈၀ က္ဍိုပ်ကၠံ မဒှ်ရ။
ပ္ဍဲအခိၚ်ဆဵုဂဗလဝ်ကဵု ဝန်ဇၞော် ဝမ်ယဳဂှ် အာရက်ချဳ ဟီုလဝ် ကြုက်ဝွံ ဒှ်ဍုၚ်မိတ်သဟာဲ မကြပ်ညောန်ကဵု အဳရာန်တုဲ ပ္ဍဲအကာဲအရာလၟုဟ်ဏံလေဝ် ပရေၚ်ပံၚ်တောဲၜါဍုၚ် ဇြဟတ်ဂွံခိုဟ်တိုန်ရောၚ် သ္ဂးရ။
ပ္ဍဲအရာပ္ညဳပ္ညပ်တံဂှ် သွက်ဂွံစဵုဒၞာဖိုလ် ကေုာံ အခေါၚ်အရာ မလုပ်သၞောဝ်ပိုဲဂှ် ရေၚ်တၠုၚ်ကၠောန်ၜိုတ်အာဗွဲမခိုဟ်အိုတ်ရောၚ်၊ နူကဵုပိုဲလေဝ် ဆၜိုတ်တၚ်တုပ်စိုတ် မနွံကဵုဓဝ်ဍာံ ကေုာံ မပေၚ်စိုပ်တံဟေၚ် ဒုၚ်တဲရောၚ် ဝန်ဇၞော်ဍုၚ်သအာၚ် အဳရာန် ဟီုရ။
သွက်ဂွံကလေၚ်ပံက်ကဵု ပ္ၚံက်ၜဳဟဝ်မုဇ် မဒှ်ဂၠံၚ်တရဴၜၚ်ဂၠးကဝ်ကိစ္စဇၞော်ဂှ် ညံၚ်ဂွံကဵု ဇြဟတ်ဟရိုဟ်ကလုတ်တမာန် လတူအဳရာန်ဂှ် အမေရိကာန် ဗ္တိုက်ဖ္အောဝ်လဝ် ကြုက်ရ။
ကြဴနူကေတ်လဝ် တၚ်တုပ်စိုတ်ကူသာန်ဗၞိက် အကြာၜါဍုၚ် ပ္ဍဲဂိတုအံက်တဝ်ဗါတုဲ သွက်ပရေၚ်ဆက်ဆောံၜါဍုၚ် ဂွံတောတက်အာဂှ် ကၠောန်အာရောၚ် ဌာနဝန်ဇၞော်ဘဏ္ဍာ အမေရိကာန် ဟီုရ။
အကြာအမေရိကာန် ကေုာံ အဳရာန် ဒေါအ်ပန်ပှ်ောလဝ် နွံကီုလေဝ် ပရေၚ်ပေါဲဗတိုက်တံ ဆက်နွံမံၚ်တုဲ သၞေဟ်ၜၚ်အဳရာန်တံဂှ် ဝါယှေန်တန် ဆက်တုဲ ကၟာတ်ဆိုအ်လဝ်ဖိုဟ် မဒှ်ရ။
နူကဵုအဳရာန်လေဝ် ၜၚ်တတ်ပါဲတိတ်အာမ္ၚးဂၠံၚ်တရဴ ပ္ၚံက်ၜဳဟဝ်မုဇ် မစၟတ်လဝ်တံဂှ် သွက်ဂွံကလေၚ်ပလန်အာ ဇၞော်ကဵုဇြဟတ်ရောၚ် ကဵုလဝ်သတိနွံရ။
Ref:Reuters