ပါရဳ၊ မေ ၈။
ဂကောံၜၚ်ဗတိုက်ဖ္ဍိုက်ၜၚ်ကျာ ပြင်သေတ်ဂှ် တတ်ကၠောံအာ ဗရံၚ်သူအိတ်တုဲ ပတဝ်အာမံၚ်ဇရေၚ် ၜဳဍာဲ ကေုာံ ပ္ၚံက်ၜဳဧဒေန်ရောၚ် ဒပ်ပၞာန်ပြင်သေတ် ဟီုရ။
ပရေၚ်ဖျေံလဝ်သ္ဇိုၚ်ဒပ်ဂှ် ဆေၚ်စပ်မံၚ်ကဵု အကာဲအရာဂၠးကဝ် မပြံၚ်လှာဲမံၚ် ဗွိုၚ်ပ္ၚံက်ၜဳဟဝ်မုဇ်ရောၚ် ဒပ်ပၞာန်ပြင်သေတ် သ္ဂးလဝ်ရ။
ဂကောံၜၚ်ဗတိုက် ချာလ်စ်ဒဳဂူလဳ ဂှ် နူကဵုၜဳမေဒဳတာရေနဳယေန် လပါ်ဗၟံက်ဂှ် ပြံၚ်လှာဲဖျေံလဝ်သ္ဇိုၚ် ဇရေၚ်ၜဳဍာဲ ကေုာံ ပ္ၚံက်ၜဳဧဒေန်ရောၚ် ပ္ဍဲတင်လလောၚ်တြး ဒပ်ပၞာန်ပြင်သေတ်ဂှ် ဗၟံက်ထ္ၜးလဝ်ရ။
အရာမကၠောန်သ္ပဏံဝွံ ဒှ်ကမၠောန်သွက်ဂွံစဵုဒၞာရောၚ်၊ အတိုၚ်ဥပဒေဂၠးကဝ်ပေၚ်ၚ်ဂှ် ရှ်ေသှ်ေကၠောန်သ္ပအာ အလဵုအသဳပြင်သေတ် ဟီုရ။
သွက်ဂွံရီုဗၚ်ကဵု မိတ်သဟာဲပံၚ်တောဲပ္ဍဲဒေသတံ ကေုာံ သွက်ဂွံဒှ်ပရေၚ်ဂီုကၠီု အာကၠုၚ်ပရေၚ်ဂၠံၚ်ၜဳဂှ်တုဲ ပြံၚ်လှာဲဖျေံလဝ်သ္ဇိုၚ် ဂကောံၜၚ်ဖ္ဍိုက်ၜၚ်ကျာပၞာန်ဗီုတံဏံရောၚ် ပ္ဍဲလိက်လလောၚ်တြးဂှ် ဗၟံက်ထ္ၜးလဝ်ရ။
ဟိုတ်နူပရေၚ်အကာဲအရာ ပ္ၚံက်ၜဳဟဝ်မုဇ်တုဲ တင်ယုတ်ဒေက်ဒှ်ကၠုၚ် လတူအလုံမွဲဂၠးကဝ်ရောၚ် ပ္ဍဲလိက်လလောၚ်တြးဂှ် ဗၟံက်ထ္ၜးလဝ်ရ။
နူပြင်သေတ် ၜိုန်ရဟွံပါလုပ်အပ္ဍဲပေါဲပၞာန်ကီုလေဝ် ညံၚ်ဂွံရှ်ေသှ်ေအာ ဥပဒေဂၠးကဝ်တံဂှ် ကဵုလဝ်ကတိဖိုဟ်တုဲ ရှ်ေသှ်ေအာ အဝဵုစၟတ်ပိုၚ်ခြာအလုံနိဂီုဍုၚ်သီုဖအိုတ်တံရောၚ်လေဝ် ပ္ဍဲလိက်လလောၚ်တြးဂှ် ပါလုပ်ရ။
စပ္တံနူပေါဲပၞာန်က္တဵုဒှ် ပ္ဍဲဂိတုဖေဖဝ်ဝါရဳ ၂၈ တေံဂှ် နူကဵုဒပ်ပၞာန်ပြင်သေတ် ကေတ်လဝ်ဒၞာဲသွက်ဂွံစဵုဒၞာတုဲ ပံၚ်တောဲကၠောန်ကၠုၚ် ကေုာံ ကရောံဍုၚ်မိတ်သဟာဲတံ မပ္တံကဵု အဂႅလိက်တံရောၚ် သ္ဂးရ။
သွက်ဂွံကလေၚ်ပံက်ကဵု ပ္ၚံက်ၜဳဟဝ်မုဇ်ဂှ် ဍုၚ်နိဂီု ၄၀ ပြၚ်တံ အာတ်မိက်လဝ်နွံရောၚ် အလဵုအသဳပါရဳ ဟီုရ။
ဂကောံၜၚ်ပြင်သေတ်ဖ္ဍိုက်ၜၚ်ကျာ ကေုာံ ၜၚ်မၚ်မွဲတံ ပ္ဍဲဂိတုမေ ၆ ဂှ် တတ်ကၠောံအာ ဗရံၚ်သူအိတ်တုဲ သွက်ဂွံလုပ်အာ ဂၠံၚ်တရဴၜဳဍာဲ လပါ်သၠုၚ်ကျာရောၚ် ဒပ်ပၞာန်ပြင်သေတ် ဟီုရ။
နိဿဲ – NavalNews