လံၚ်လုၚ်၊ မေ ၈။
အပ္ဍဲကဵုရးတနၚ်သဳ ပွိုၚ်ဍုၚ်လံၚ်လုၚ် ကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ် ကွာန်ဝေဒဳဂှ် စံၚ်ပလီုထောံ ကွဳစက်ၜါမ နွံမံၚ်အပ္ဍဲကွာန်ဂှ်ရောၚ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုမေ ၆ လောန်ကၠုၚ်ဏံ အခိၚ်ဂယးပြဟ်ဂှ် ကရောၚ်ပၞာန် ကဝ်မယှေန်ပၞာန် ဇြဟတ်ၜိုတ် ၁၀၀ တံ နူကဵုဍုၚ်လံၚ်လုၚ်မွဲအဆံၚ် ပန်သေနာတ်တုဲ လုပ်ကၠုၚ်ကွာန်ဝေဒဳရ။
ဟိုတ်နူကဝ်မယှေန်ပၞာန် ပန်ဖံက်သေနာတ်တုဲ ကရောၚ်ပၞာန် ထပက်လုပ်ကၠုၚ်ဂှ်ရ ညးဒေသဗွဲမဂၠိုၚ် ကၟာတ်ဆိုအ်ဒၟံၚ် အပ္ဍဲကွာန်ဂှ် ကီု၊ ဆဵုညာတ်ညးဍုၚ်ကွာန် လတူဂၠံၚ်တံမ္ဂး ရပ်ကော်ဏာလဝ်ရောၚ် သ္ဂးရ။
တုဲပၠန် ပ္ဍဲအခိၚ်တ္ၚဲစေၚ်ဂှ် ကွဳစက်ၜါမ ဒေါအ်လဝ်ဇိုၚ်သြၚ်ကြုၚ် ထဝါဲဂှ်လေဝ် ဟိုတ်ဟၟဲမွဲသာ် နူကဵုကဝ်မယှေန်ပၞာန် စံၚ်ပလီုထောံ ရောၚ် ရိုဟ်ကၞက်ပရိုၚ်သွာၚ်ပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ကဝ်မယှေန်ပၞာန်ဏံပၠန် ပ္ဍဲဂိတုမေ ၇ အခိၚ်ဂယး ၅ နာရဳ ဂှ် နူကွာန်ဝေဒဳ ကလေၚ်ဆုတ်တိတ်အာ ဍုၚ်လံၚ်လုၚ်တုဲ ကော်ရပ်လဝ် ညးဍုၚ်ကွာန်တံဂှ်လေဝ် ကလေၚ်ဗလးဖျဴလဝ်ရောၚ် သ္ဂးရ။
အပ္ဍဲဂိတုမေ ၅ လောန်ကၠုၚ်တေံလေဝ် နူကဵုကဝ်မယှေန်ပၞာန် ဖျေံလဝ်သ္ဇိုၚ်ဒပ် လတူဍုၚ်လံၚ်လုၚ်ဂှ် ပန်ခြော်လဝ်လွဟ်ဇၞော် လပါ်ကွာန်ဝေဒဳတံနွံရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media