မတ်မလီု၊ မေ ၈။
အပ္ဍဲတွဵုရးမန် ဍုၚ်မတ်မလီု ကၠောန်မံၚ်ဝိုၚ်ဝေၚ် ညံၚ်ရဴဂွံလဝ်အခေါၚ် လုပ်သၞောဝ် နူကဵုဂကောံအလဵုအသဳတွဵုရးမန် အလဵုအသဳပၞာန်တံ သွက်ဂွံကဵု စရိတ်အမာတ်စၠတ်ထဝ်ဂးတုဲ ထပ်ထပဵုကံက်တိုန်သြန် နွံမံၚ်ရောၚ် ဂွံတီကေတ် နူတၠခုၚ်ဝိုင်ဝေၚ်တံရ။
ဝိုၚ်ဝေၚ်တံဂှ် နူစတမ်တေံ မွဲဗ္တံမ္ဂး သွက်မွဲခုၚ် ဒးကဵုမံၚ်အကံက် ၅ ကိုတ်ကီုလေဝ် ပ္ဍဲအခိၚ်လၟုဟ်ဂှ်တှ်ေ သွက်ဂွံကဵု အမာတ်စၠတ်ထဝ်တံ ဂးတုဲ ထပ်ထပဵုကံက်မံၚ်သြန် ၅ လက်ရောၚ်။
သြန်ဂွံနၚ်နူဝိုၚ်ဝေၚ်တံဂှ် ဗက်ကဵုကဆံၚ်တာလျိုၚ်တုဲ ပါ်ပရအ်ကေတ်မံၚ် ညးသ္ကံကီုလေဝ် ပ္ဍဲအခိၚ်လၟုဟ် ကြဴနူအမာတ်တံ မံက်တိုန် နူပေါဲရုဲမာဲတုဲ ထပ်ကံက်မံၚ်သြန် သွက်စရိတ်ညးစၞး အမာတ်တံ မဒှ်ရ။
အပ္ဍဲဝိုၚ်ဝေၚ်တံဂှ် နူအခိၚ်ကၠာတေံ ဆၜိုတ်သြန်အကံက် အတိုၚ်စၟတ်လဝ် ဒးကဵုမံၚ်ကီုလေဝ် အခိၚ်လၟုဟ်ဂှ်တှ်ေ အမာတ်စၠတ်ထဝ်တံ ညံၚ်ဟွံဂွံဟီုပရူဝိုၚ်ဝေၚ်ဂှ် သွက်ဂွံကၟာတ်လဝ်ပါၚ် အမာတ်တံဂးတုဲ ဒးကဵုမံၚ် သြန်စရိတ်ကီုရောၚ် တၠခုၚ်ဝိုၚ်ဝေၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
မွဲလပါ်ပၠန် ကြဴနူပေါဲရုဲမာဲပၞာန်တုဲ အပ္ဍဲကဵုတွဵုရးမန် အလဵုအသဳတၟိ မံက်တိုန်ကီုလေဝ် ဝိုၚ်ဝေၚ်တံဂှ် ဟွံဒေါအ်အာတုဲ ဆက်ကဵုမံၚ်အခေါၚ် ဇၞော်ကဵုဇြဟတ်ရောၚ်။
ဟိုတ်နူဝိုၚ်ဝေၚ်တံတုဲ ပ္ဍဲဒေသတံဏံ ပရေၚ်ကၠတ်စဂၠိုၚ်တိုန်မံၚ်တုဲ လတူပရေၚ်အရာဏံဂှ် ညးဒေသတံ ပါ်ပါဲဒၟံၚ်နွံကီုလေဝ် ညးစၞးအမာတ်စၠတ်ထဝ် ဒးဒုၚ်ရုဲစှ်လဝ်တံဂှ် ကၟာတ်လဝ်ပါၚ်တုဲ သ္ပလဝ်မတ်ဇျှဟ်အိုတ်ရ။
ပြဟ်ဟ်ဏံ ဝိုၚ်ဝေၚ်ဇျှၚ်လံၚ်သြန်လၟုဟ်တံမ္ဂး ပ္ဍဲပေါဲသဘၚ်ကျာ်၊ ပေါဲသဘၚ်အခိၚ်ဥတုရာသဳလၟေၚ်ဂိတု၊ ပေါဲလံၚ်ဗဗေၚ်ဇၞော်၊ ပေါဲလးကထိုန်တံသၟးဟွံက ပေါဲလဟိၚ်လှ်ေဒယှ်ေနာနာတံလေဝ် ညံၚ်ရဴလုပ်သၞောဝ် ကၠောန်မံၚ်ပေါဲဇၞော်ဇၞော်ကီုရောၚ်။
ဟိုတ်နူဝိုၚ်ဝေၚ်ဇျှၚ်တံတုဲ ပ္ဍဲဒေသဂှ်မ္ဂး ပရေၚ်ကၠတ်ကွဳစက်၊ ပရေၚ်ကၠတ်ဂၠံက်ပၠံၚ်ၜး၊ ပရေၚ်ဂစိုတ်မၞိဟ် ပၠံၚ်ကပေါတ်ပိုန်ဒြပ်တံ သၟးဟွံက ပြသၞာကၟိန်အိန်ထံၚ်တံလေဝ် က္တဵုဒှ်မံၚ် မွဲဏှမွဲဏှရောၚ် ညးဒေသတံ ဟီုရ။
ဝိုၚ်ဝေၚ် ပ္ဍဲဍုၚ်မတ်မလီုဂှ်တှ်ေ ပ္ဍဲလက်ထက်ခေတ်အလဵုအသဳ အဆက်ဆက် ဟၟဲကဵုအခေါၚ်လုပ်သၞောဝ်ကီုလေဝ် ကြဴနူပၞာန်သီအဝဵု တုဲ ပ္ဍဲခေတ်သ္ကိုပ်ဝန်ဇၞော်ပၞာန် ခါန်ကၞက်လဝ်အဆက်ဆက်တံဂှ် ကဵုကၠုၚ်အခေါၚ် ညံၚ်ရဴလုပ်သၞောဝ် မဒှ်ရ။
ပရိုၚ် – သြၚ်လောန်တိုၚ်မ်
Photo – CJ