လံၚ်လုၚ်၊ မေ ၉။
အပ္ဍဲကဵုရးတနၚ်သဳ ပွိုၚ်ဍုၚ်လံၚ်လုၚ် ကရပ်ကွာန် သာန်လှာန်ဂှ် ကရောၚ်ပၞာန်ဒပ်ပၞာန်ဗမာ ဒးဒုၚ်တတ်ဗတိုက်တုဲ ချိုတ်အာ ၂ တၠ၊ ဒးဝပ် ၁ တၠဂှ် နူကရောၚ်ပၞာန်ဒူရက လလောၚ်တြးလဝ်ပရိုၚ် ပ္ဍဲဂိတုမေ ၇ ရ။
အပ္ဍဲဂိတုမေ ၆ အခိၚ်ဂယး ၜိုတ် ၈ နာဍဳဂှ် ဒပ်ပၞာန်ဗမာ ဇြဟတ် ၂၀ ပြၚ် ဖျေံလဝ်ဒပ်ဗဒါဲကွာန် လတူဒဵုလက်ဟတ်ဂှ် လုပ်ကၠုၚ်ကွာန်တုဲ ဒးဒုၚ်တတ်ဗတိုက်လဝ်ရောၚ် သ္ဂးရ။
အတိုၚ်ဂွံလဝ်ပရိုၚ် အခိၚ်ဍေံတံစှ်ေရာန် စၞစဇွောံမသွက်ဒပ်ပၞာန်ဂှ် မၚ်တတ်ဗတိုက်လဝ်တုဲ ပေါဲဗတိုက်လအ်အာ ပွိုၚ်ၜိုတ်အခိၚ် ၃၀ မိနေတ်နွံရောၚ် ညးတာလျိုၚ် ကရောၚ်ပၞာန်ဒူရက ကိုဖာ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲပေါဲဗတိုက်ဏံ ကောန်ပၞာန်ဗမာ ၂ တၠ ချိုတ်အာအပ္ဍဲဒၞာဲဂှ်တုဲ ၁ တၠ ဒးဘဲဝပ်၊ သီဂွံလဝ် လွဟ် MA 3 (၁) ဇကိုအ်၊ ဖျေဲမကမ် MA ၄ မ ကေုာံ မကမ်လွဟ် ၁၀၀ မရောၚ် ဂွံတီကေတ်ရ။
ကြဴနူဒှ်ပေါဲဗတိုက်တုဲ ဇွဒပ်ပၞာန်ဗမာသီအဝဵု ချိုတ်အာလဝ်တံဂှ် ဟွံဂံၚ်ကၠုၚ်ကပှ်ကေတ်တုဲ ကလေၚ်ဆုတ်တိတ်အာလဝ် သ္ဂးရ။
ပေါဲဗတိုက်ဏံဂှ် နူကရောၚ်ပၞာန်ဒူရက ဒပ်ပၞာန်ဗၠးၜးကောန်ဂကူ ထဝါဲ (DNLA) တံ တတ်ဗတိုက်ပန်လဝ်ဒှ်တုဲ အပ္ဍဲအခိၚ်သၠုၚ်ပတိုန်မံၚ်ဇြဟတ်ပၞာန် အလုံမွဲဍုၚ်ဏံမ္ဂး မိမညးဍုၚ်ကွာန်တံ နကဵုဓဝ်သတိပရေၚ်ပၞာန်နွံနွံ ညံၚ်ဂွံမံၚ်စံၚ်အာကၠုၚ်အိုတ်ညိဂှ် ကဵုလဝ်သမ္တီကီုရ။
အပ္ဍဲဂိတုမာတ် ၁ လောန်ကၠုၚ်တေံလေဝ် အပ္ဍဲကွာန်မံၚ်မေဝ်ယှံၚ် ဂတမုက်တက္ကသိုလ်နဲကဲပညာထဝါဲဂှ် ဂကောံဒပ်ပၞာန်ဗမာသီအဝဵု ကံက်မံၚ်သြန်နူရဲအာတရဴတံ အတေၚ်အဓမ္မဂှ် ဒးဒုၚ်တတ်ဗတိုက်တုဲ လပါ်ဒပ်ပၞာန် ချိုတ်အာ ၃ တၠ သီုကဵုသီဂွံလဝ် လွဟ်မကမ်လ္ၚဵုနွံရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
ဗီုရုပ် – ကရောၚ်ပၞာန်ဒူရက