မတ်မလီု၊ မေ ၉။
အပ္ဍဲကဵုဒေသ လပါ်သၠုၚ်ကျာဍုၚ်ဗၟာ အပ္ဍဲဂိတုအေဗရာ လောန်ကၠုၚ်ဏံ လၟိဟ်အလန်ပၞာန်ကျာ ကြဳဗုမ်ပန်ဗတိုက်လဝ် နွံမံၚ်စဵုကဵု ၈၉ ဝါတုဲ ညးဍုၚ်ကွာန်ချိုတ်ဒးဝပ်ကီု သ္ၚိဌာန်တံလေဝ် ပရေၚ်လီုလာ် သၠုၚ်တိုန်မံၚ်ရောၚ် ဂွံတီနူ ဌာနလ္ၚတ်ပရေၚ်ဍုၚ်ကွာန် သ္ဇိုၚ်ညးဍုၚ်ကွာန် ရာမညအေန်သတဳကျ (RICE) ရ။
အတိုၚ်တၚ်နၚ် RICE မ္ဂး သ္ပပ္တံနူ အပ္ဍဲတွဵုရးမန် ၁၀ ပွိုၚ်ဍုၚ် ၊ ပ္ဍဲတွဵုရးကရေၚ် ပွိုၚ်ဍုၚ်ဘာအၚ်၊ ကအ်ကြိက် ကေုာံ ပွိုၚ်ဍုၚ်လှာဒကှ် ကေုာံ ရးတနၚ်သဳ ပွိုၚ်ဍုၚ်ဍာ်ဗုတံဂှ် ပရေၚ်ပန်လွဟ်ဇၞော်၊ ဒရုၚ်ကဵု ဗတိုက်လဝ်ကဵု ပၞာန်ကျာတံ က္တဵုဒှ်လဝ်ရောၚ်။
အပ္ဍဲပရေၚ်အရာတံဏံမ္ဂး ပရေၚ်ဗတိုက်လဝ်ကဵုပၞာန်ကျာဂှ် ဒှ်လၟိဟ် အလန်ဂၠိုၚ်အိုတ်တုဲ အပ္ဍဲပွိုၚ်ဍုၚ်ၜဳကလေၚ် မွဲပွိုၚ်ဍုၚ်ဓဝ်ဂှ် ဒးဒုၚ်ဗတိုက်လဝ် ၈၁ ဝါနွံရ။ တုဲပၠန် စပ္တံနူဒပ်ပၞာန်ဗမာ ကြဳဗုမ်လတူမါၚ်ဒကောဝ် မာကသ ဗဒါဲဍုၚ်ကျာ်ပိ၊ ပ္ဍဲပွိုၚ်ဍုၚ် လှာဒကှ်ဂှ် ၆ ဝါ ကေုာံ အပွိုၚ်ဍုၚ်ဘာအၚ် ၂ ဝါ နွံရ။
ပ္ဍဲအရာပန်လွဟ်ဇၞော် ကေုာံ ဗတိုက်ဒရုၚ်တံမ္ဂး အပ္ဍဲပွိုၚ်ဍုၚ်ရေဝ်၊ ဇြပ်ဗု၊ မုဟ်ဍုၚ်၊ ကအ်ကြိက် ကေုာံ ဘာအၚ်သီုဖအိုတ်ဂှ် နွံမံၚ် ၁၇ ဝါ တုဲ ပရေၚ်မာၚ်တပ်တိခတိုဟ်လဝ် ပ္ဍဲပွိုၚ်ဍုၚ်ဍာ်ဗု နွံ ၂ ဝါ မဒှ်ရ။
ဟိုတ်နူလၟေၚ်ပရူတံဏံတုဲ ညးဍုၚ်ကွာန် ၂၄ တၠ ဒးလဝ်ဝပ်၊ ၉ တၠ ချိုတ်အာတုဲ ဟိုတ်နူပရေၚ်ဂစိုတ်မၞိဟ် ပွိုၚ်ဍုၚ်ဍာ်ဗုဂှ် ကောန်ၚာ်မွဲတၠ ဒးချိုတ်လဝ်ကီုရောၚ် တၚ်နၚ် RICE ဗၟံက်ထ္ၜးချူလဝ်ရောၚ်။
မွဲလပါ်ပၠန် ဟိုတ်နူပၞာန်ကျာဗတိုက်လဝ်တုဲ ပ္ဍဲပွိုၚ်ဍုၚ်ၜဳကလေၚ်ဂှ် သ္ၚိ ၄၅ မ၊ ပွိုၚ်ဍုၚ်ဘာအၚ်ဂှ် သ္ၚိ ၄ မ ကေုာံ ပွိုၚ်ဍုၚ်ကအ်ကြိက် သ္ၚိ ၁ မ လီုလာ်အာလဝ်ကီုရ။
တုဲပၠန် ပ္ဍဲၜဳကလေၚ် ဘာလကျာ် ၁ မ၊ သီ ၁ မ၊ ရုၚ်သွံကၠေၚ်စက် ၁ မ၊ ကွဳစက် ၃ ဖ္ဍိုက် ကေုာံ ပ္ဍဲဘာအၚ် ကွဳလိုန်ဓါတ် ၁ မ လီုလာ်အာ ကီုရောၚ်။
အတိုၚ်တၚ်နၚ် နူဂကောံသုတေသနဗၠးၜးတံမ္ဂး ပ္ဍဲအရာဒပ်ပၞာန်ဗမာ ဒးဒုၚ်တဝ်စၞေဟ်မံၚ် ပေါဲဗတိုက်ရပ်လွဟ် တံဂှ် ဒးပ္တေဟ်စမံၚ်ကဵု အရီုအဗၚ်ပၞာန်ကျာတံတုဲ စွံပွန် ပန်ဗတိုက်မံၚ်ညးဍုၚ်ကွာန်ကေုာံ စမြိုၚ်ဒၞာဲညးဂမၠိုၚ်တံ မဒှ်ရ။
အတိုၚ်လိက်လလောၚ်တြး နူဂကောံကုတ်ထပိုတ် သြန်ထၞဟ်ဆီမ္ဂး သၞာံလောန်ကၠုၚ်ဏံ သ္ပပ္တံနူဂိတုဂျူလာၚ် ၁၆ စဵုကဵု အဝ်ဂေတ် ၁၅ ပ္ဍဲကဵုပရေၚ်လဝေၚ်ပၞာန်ကျာ အိုဿီုတံဂှ် ၜၚ်ကျာကေုာံ ၜၚ်ကျာသၞေၚ်ကဝဲတံ ပဝ်ဒၟံၚ် ၂၄၀၀ ဝါပြၚ်တုဲ သွက်ဏံ ကၠေၚ်စက် ၜၚ်ကျာ အိုတ်အာ ၁၂ ကိုတ်ဂါလန်ပြၚ်တုဲ ဒးအိုတ်လဝ်သြန် ဒဝ်လာ အမေရိကာန် ၃ ပြကောတိကိုတ်ပြၚ်နွံရောၚ် ဗၟံက်ထ္ၜးချူလဝ်ရောၚ်။
ပ္ဍဲဒေသသၠုၚ်ကျာတံဂှ် လၟိဟ်အလန် ပၞာန်ကျာဗတိုက်လဝ် ဂၠိုၚ်တိုန်ကၠုၚ်တုဲ ဟိုတ်နူပေါဲဗတိုက်ကေုာံ အကာဲအရာပရေၚ်ဂီုကၠီု အပ္ဍဲဂိတုအေဗရာ လောန်ကၠုၚ်ဂှ်တုဲ လၟိဟ်ရဲဂြိပ်ပါဲဘဲပၞာန် ဇရေၚ်ဒၞာဲဗၠးဘဲတံ ဒးဂြိပ်ပါဲဒၟံၚ် နွံကၠုၚ် ၁၉၃၀၀ တၠပြၚ်အာရ။
ပ္ဍဲအရာဏံ အပ္ဍဲပွိုၚ်ဍုၚ်ၜဳကလေၚ်ဂှ် ရဲဂြိပ်ပါဲဘဲပၞာန် ၁၃၀၀၀ ပြၚ် ကေုာံ ပွိုၚ်ဍုၚ်ဘာအၚ်ဂှ် ၆၂၈၀ ပြၚ် နွံမံၚ်တုဲ ဟိုတ်နူ ပရေၚ်သၠေဟ်ပၟာ ဟွံသင်ကာ ကေုာံ ပွမဒးယိုက်ဝန်ပၞာန်တုဲ ညးဍုၚ်ကွာန် ၅၀ တၠပြၚ်လေဝ် ဒးဒုၚ်ရပ်လဝ်ရောၚ် RICE လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – KNU