မတ်မလီု၊ မေ ၉။
ကြဴနူက္ဍိုပ်သ္ကိုပ်ပၞာန်သီအဝဵု ဒှ်ကၠုၚ်သမ္မတတုဲ နကဵုက္ဍိုပ်လိက် ပရေၚ်ဖောအ်ဗြဳဒေသဂှ် ကေတ်အခေါၚ်ခိုဟ် ကိုန်အစဳဇန် ၁၀၀ တ္ၚဲတုဲ ကောန်ကမၠောန်ယိုက်ဝန်အလဵုအသဳပၞာန်တံ ပ္ဍဲလတူဂၠံၚ် ကွဳစက် ဘာအၚ်-လ္ဂုၚ်ဂှ် ကပေါတ်ဟွံလုပ်သၞောဝ်ဂးတုဲ ရပ်ဓရတ်အာတ်သြန်ကြီုမံၚ်ရောၚ် ရဲဒဳကွဳစက် ဖ္ဍိုက်ကပေါတ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဒၞာဲစၟဳစၟတ်ကြေပ်အိုတ် ကေုာံ ဒၞာဲအာတ်မံၚ်သြန်ကြီုအိုတ်တံဂှ် ဒှ်မံၚ်ဒၞာဲ ဂိက်ဒဒန်သြၚ်လောန်-ဘာအၚ်၊ ဂိက်ဒဒန်သေတ်တိုၚ် ကေုာံ ဂိက်စၟဳစၟတ်ကြုၚ်ဗရာၚ်တံရောၚ် သ္ဂးလဝ်ရ။
အဓိက ရပ်ဒၟံၚ်ကပေါတ် နူဍုၚ်သေံတံကီုလေဝ် ကွဳစက်ဆက်စပ်မံၚ်ကဵု ဂကောံအလဵုအသဳပၞာန်တံဂှ် ကဵုသြန်တုဲ ဖ္ဍိုက်ဏာဂွံမံၚ် အတိုၚ်ပၟိက်စိုတ်ရောၚ် ရဲဒဳကွဳစက်အာတရဴ မြဝတဳ-ဗဂေါ မွဲတၠ ဟီုရ။
လဆောဝ်လဆောဝ် ရဲအာတရဴတံ ဖ္ဍိုက်နၚ်ကပေါတ်နူသေံ မပ္တံကဵု ဍာ်ဍာတ်တ်၊ ကပေါတ်စၞစတံကဵု ကပေါတ်ကျိုၚ်ကျဝ် သွက်ဂွံသုၚ်စောဲ ညးမွဲဓဝ်ကီုလေဝ် နူကဵုဍေံတံ တံၚ်ဓဇက်ဖျေံတုဲ သီကေတ်ထောံလဝ်နွံမံၚ်ရောၚ် သ္ဂးရ။
ယဝ်ရ မိက်ဂွံဖ္ဍိုက်ကပေါတ်နူသေံမ္ဂး ကွဳစက်ဍောတ် ပရဝ်ဗံက် (Probox) မွဲဖ္ဍိုက်မ္ဂး ဒးကဵု ၁၀ ကိုတ်၊ ကွဳစက်သၠာ ၆ မွဲဖ္ဍိုက်မ္ဂး ၃၀ ကိုတ်၊ ကွဳစက်တောဲ မွဲဖ္ဍိုက်မ္ဂး စဵုကဵု ၁၀၀ ကိုတ် ဒးကဵုမံၚ်ရောၚ် ရဲဒဳကွဳစက် ဖ္ဍိုက်ကပေါတ်တံ ဟီုရ။
ကွဳစက်ဟွံကဵုလဝ်သြန် ဟွံကဵုလဝ်သမ္တီတံ ယဝ်ရတတ်ကၠုၚ်မ္ဂး သီကေတ်ထောံ သီုကပေါတ် သီုကွဳစက်ရောၚ် ဂွံတီကေတ်ရ။
ပ္ဍဲကဵုဂိက်သၞေဟ်ကၚ်တံဏံ ကောန်ကမၠောန် ယိုက်ဝန်အလဵုအသဳ အာတ်သြန် ကြီုအိုတ်ဂှ် ရဲနူဌာနအကံက်အခေါန်ကဵု ဗၠာဲသၟိၚ်တံ ယုတ်အိုတ်တုဲ ယဝ်ရ ကဵုသြန်ဟွံမာန်မ္ဂး ဗက်ကညာၚ် လက်ဆဴကရေဲဟီု မံၚ်ရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – CJ