မတ်မလီု၊ မေ ၉။
တွဵုရးမန် အပ္ဍဲပွိုၚ်ဍုၚ်လ္ၚဵုမ္ဂး စနူအတးလောန်တုဲ သ္ပပ္တံနူ ကၞောတ်ဂိတုအေဗရာတေံ ဟိုတ်နူဇြဟတ်ဂမ္တဴ ဂၠိုၚ်တိုန်ဂှ်ရ စပ္တံနူ ဍာ်သုၚ်ဍာ်ရပ်စပ် ဝါတ်ကျာတ်ကၠုၚ်ယျရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပြဟ်ဟ်ဏံ အပ္ဍဲတွဵုရး မပ္တံကဵု ပွိုၚ်ဍုၚ်ပံၚ်၊ ၜါသွာၚ်၊ မုဟ်ဍုၚ် ကေုာံ ပွိုၚ်ဍုၚ်တၞဟ်တံလေဝ် ပ္ဍဲအရာပ်ကဵု ကွာန်လ္ၚဵုတံဂှ် ဟိုတ်နူပရာန် အသိၚ်ဂမ္တဴသၠုၚ်တုဲ ဍာ်ပလိုၚ်ဍာ်ကၟာတံ ကှ်ဇတ်အာတုဲ ဒးဆဵုဂဗမံၚ် ကဵု ပရေၚ်ဝါတ်ကျာတ်ဍာ်အိုတ်ရ။
ဟိုတ်နူ ဍာ်သုၚ်ဝါတ်မံၚ်သာ်ဏံတုဲ ညးဒေသတံ ဒးကဵုၚုဟ်မးဂၠိုၚ်ၚ် ရာန်သုၚ်စောဲမံၚ်ဍာ်ကီု၊ ဒးဗဓာန်စမံၚ် ဂကောံပရဟိတ ညးကဵုဒါန်ဍာ်တံတုဲ ဂွံသုၚ်စောဲမံၚ်ဍာ်ရောၚ် ဂွံတီကေတ်ရ။
ပြဟ်ဟ်ဏံ လပါ်ကွာန်ဝါဗ္ၚနွံတံဂှ် ဍာ်ကၟာစဇတ်ကှ်အာ ကျာတ်ဝါတ်တိုန်ဍာ်တုဲ ညးလ္ၚဵုတံဂှ် ကၠုၚ်ဇက်ကေတ်မံၚ်ဍာ် နကဵုကွဳစက်တံကီု၊ ဒးပလံၚ်ဗစိုပ်ကဵုမံၚ် ဒၞာဲလ္ၚဵုတံ နွံမံၚ်ရောၚ် ညးဒေသပွိုၚ်ဍုၚ်ပံၚ် မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လပါ်တိဗလးသၠာတ်ဝါဗ္ၚတံ ဗီုကွာန်အလှာပ်တံဂှ် ဍာ်ကျာတ်မံၚ်ညိညိ၊ တုဲတှ်ေ ဗီုကဵုကုန်ဗတဳတံဂှ် ကျာတ်မံၚ်၊ ညးတံဂှ် သုၚ်စောဲဍာ်ကၟာရလေဝ်၊ ဍာ်ကၟာၜိုတ်နွံရ ဂွံသုၚ်စောဲမံၚ်၊ ဟိုတ်နူဍာ်ကၟာ ကှ်အာတုဲ လၟုဟ်စကျာတ်ဝါတ်ကၠုၚ်ယျ၊ ပ္ဍဲညးတံလေဝ် ကွဳစက်နွံမံၚ်၊ နကဵုကွဳစက် ဖ္ဍိုက်ကေတ်ဏာဍာ်တံနွံ၊ နူဏံအာပလံၚ်ကဵုလေဝ်နွံ အာကဵုမံၚ် ဗီုဂှ်ရ” သာ်ဝွံ သ္ဂးရ။
တုဲပၠန် ပ္ဍဲကွာန်ကဵု အကြာအရာပ် ပြဟ်ဟ်ဏံ ကျာတ်မံၚ်ဍာ် ဗွဲမဂၠိုၚ်တံဂှ် အပ္ဍဲဇၟာပ်ပ်သၞာံ ဒးဒုၚ်အေၚ်မံၚ် ဘဲဍာ်ကျာတ်ဝါတ်ဍာ်ကီုလေဝ် နူကဵုဂကောံအလဵုအသဳဆေၚ်စပ်တံကီု၊ ညးစၞးစၠတ်ထဝ်တံ ကၠုၚ်ဘိုၚ်သောၚ်ကလးကဵုလဝ် ဟၟဲပုဟ် ညးဆက်ဟီုရ။
ဟိုတ်နူဇြဟတ်ဂမ္တဴ သၠုၚ်ကာတ်မံၚ်တုဲ ဍာ်ကၟာတံဇတ်ကှ်အာဂှ်ရ ပ္ဍဲကွာန်လ္ၚဵုတံမ္ဂး ဒးဆဵုဂဗမံၚ်ကဵု ပရေၚ်ဝါတ်ကျာတ်ဍာ်တုဲ နကဵုဇြဟတ်ဇကုကဵုဇကုသၟး ဒးသောၚ်ကလးကတ်မံၚ်ရောၚ် ညးဒေသပွိုၚ်ဍုၚ် မုဟ်ဍုၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လပါ်ဗလးဝါဗ္ၚတံ ဍာ်ကျာတ်ဝါတ်မံၚ်၊ ကာလဍာ်ကၟာဇတ်ကှ်အာတှ်ေ ကျာတ်ဍာ်ရ၊ ဗီုကဵုဂဒုၚ်ပဝ်၊ ဗလံက်ညံၚ်ဝိုင်တံ တုဲတှ်ေ လပါ်ကေန်ချံၚ်တံ၊ လပါ်ဂှ်တှ်ေ စိုပ်အခိၚ်ဗြဲဂူမ္ဂး ညးတံသုၚ်စောဲဍာ်ကၟာ၊ ခါဲပလိုၚ် ဍာ်သုၚ်ဟွံဂွံ၊ ဒၞာဲဟွံကေၚ်ကျာတ်ဝါတ်တံလေဝ် လၟုဟ်ဍာ်သှ်ေမံၚ်ၜိုတ်မွဲဟတ်ဓဝ်ရ၊ နကဵုဇြဟတ်ဇကုကဵုဇကုရ၊ ဒးကေတ်မံၚ်အဆက်ကဵု ဂကောံနူလတူဍုၚ်တံ၊ အာရီုဗၚ်ကဵုမံၚ်နွံ” သာ်ဝွံ သ္ဂးရ။
ယဝ်ရ ဇြဟတ်ဂမ္တဴ ဆက်တုဲသၠုၚ်အာမံၚ်အတိုၚ်ဏံမ္ဂး ဍာ်ပလိုၚ် ဍာ်ကၟာတံ ဆက်တုဲကှ်အိုတ်တုဲ ကွာန်၊ အရာပ် ကျာတ်ဝါတ်ဍာ်တံ ထပ်ပဵုတိုန်မာန်ရောၚ် ဂွံတီကေတ်ရ။
အခိၚ်လၟုဟ်ဏံ ဟိုတ်နူရာန်ကေတ်ကၠေၚ်စက် အတိုၚ်ပၟိက်စိုတ်ဟွံဂွံတုဲ ဒးရာန်ကေတ်မံၚ် နကဵုသၞောတ်ဗ္ၜတ်ဂှ်လေဝ် ၚုဟ်မးသၠုၚ်နူကဵုအခိၚ်ကၠာတေံတုဲ ညးကဵုဒါန်ဍာ်တံလေဝ်အောန်မံၚ်ဏီရောၚ် ညးဒေသတံ ဟီုရ။
အပ္ဍဲတွဵုရးမန် ပွိုၚ်ဍုၚ်လ္ၚဵုဂှ်မ္ဂး ဒးဒုၚ်ကျာတ်မံၚ်ဘဲဍာ် ဇၟာပ်ပ်သၞာံနွံတုဲ သွက်ဂွံဂွံဍာ်ဂှ် နူကဵုအလဵုအသဳဆေၚ်စပ်တံ ပရေၚ်ဘိုၚ်သောၚ်ကလးကဵုဟၟဲတုဲ ဒးဗဓာန်စမံၚ် ဂကောံပရဟိတ ကေုာံ ညးကဵုဒါန်ဍာ်တံ သၟးရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ