ရေဝ်၊ မေ ၁၀။
အပ္ဍဲတွဵုရးမန် ပွိုၚ်ဍုၚ်ရေဝ် အကြာကွာန်နှေဟ်ခြေၚ်ကဵု ကွာန်ကၠအ်လဳမဴ ဂိတုမေ ၈ လောန်ကၠုၚ်ဂှ် ဒှ်လဝ်ပေါဲဗတိုက်ကဵု ဒပ်ပၞာန်ဗမာတုဲ သီုၜါလပါ် ချိုတ်ဒးဘဲဝပ်ကီုနွံရောၚ် ရဲဂကောံပၠန်ဂတး ဖျေံသ္ဇိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲတ္ၚဲဒှ်ပေါဲဗတိုက် အခိၚ်နူဂယး ၁၁ နာရဳဂှ် နူကဵုဒပ်ပံၚ်တောဲ KNLA တံ ကြတ်ဗတိုက်လဝ် တမ်ဒပ် ခလရ ၁၀၆ ကဵု ဂကောံပံၚ်တောဲဒပ်ပၞာန်ဗမာ ဇြဟတ် ၃၀၀ ပြၚ်တံတုဲ ဒှ်လဝ် ပေါဲဗတိုက်ရောၚ် သ္ဂးရ။
အတိုၚ်ဂွံလဝ်ပရိုၚ် ကရောၚ်ပၞာန်ကၠုၚ်မံၚ်ဂှ်ရ နူကဵုဂကောံပၠန်ဂတးတံ အာကြတ်ဗတိုက်တုဲ အကြာၜါလပါ် ပွိုၚ် ၃၀ မိနေတ် ပြၚ်င် ပေါဲဗတိုက်ဒှ်လဝ်ဂှ် သီုၜါလပါ် ပရေၚ်ဒးဝပ်တံနွံမံၚ် ရဲဂကောံပၠန်ဂတးဖျေံသ္ဇိုၚ်ဒေသမွဲတၠ ဟီုရ။
ပ္ဍဲပေါဲဗတိုက် လပါ်ဒပ်ပၞာန်ဗမာ ၃ တၠ ချိုတ်တုဲ ၅ တၠဂှ်ဒးဝပ်၊ ဗီုဂှ်ကီု နူကဵုဒပ်ပၞာန်ညးဍုၚ်ကွာန် သ္ဂံၚ်ကိုထိုက် နူဒပ်တပေန်ယှိုဲထဳ ကိုကျိုက်ဂှ်လေဝ် ချိုတ်အာပ္ဍဲပေါဲဗတိုက်ဂှ် ကီုရ။
ပရေၚ်ပေါဲဗတိုက်ဏံဂှ် နူကဵု KNLA မဟာဒပ် (၆) တမ်ဒပ် (၂၇) ဒပ်ပါ် (၁) ကေုာံ ဒပ်တပေန်ယှိုဲထဳကိုကျိုက် တံ ပံၚ်တောဲ ဗတိုက်လဝ်ရောၚ် သ္ဂးရ။
ဂိတုအေဗရာ ၂၇ လောန်ကၠုၚ်တေံလေဝ် အပ္ဍဲကၠအ်ရာဘာ လပါ်သၠုၚ်ကျာ ကွာန်အံၚ်သာယာ ပွိုၚ်ဍုၚ်ရေဝ်ဂှ် ဒပ်ပၞာန်ဗမာ ထပက်ကၠုၚ်ကရောၚ်ပၞာန်တံ ဒးမါၚ်တုဲ ချိုတ်အာလဝ် ၄ တၠကီုရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media