မတ်မလီု၊ မေ ၁၀။
အပ္ဍဲဒေသ ဗော်သွးကောန်ဂကူကရေၚ် KNU မဟာဒပ် (၁) ထိၚ်ချုက်လဝ်တံဂှ် ဂိတုအေဗရာလောန်ကၠုၚ်ဏံ ဒှ်လဝ်ပေါဲဗတိုက် ၂၅ ဝါတုဲ သီုကဵုၜါလပါ် ချိုတ်အာကီု ဒးဝပ်ကီုနွံမံၚ် ညးတာလျိုၚ် ခရိုၚ်သဓီု KNU တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စပ္တံနူဂိတုအေဗရာ ၂ စဵုကဵုစိုပ် ၃၀ ဂှ် ပ္ဍဲပွိုၚ်ဍုၚ်ကျိုက်ထဝ်၊ သဓီု၊ ၜဳကလေၚ် ကေုာံ ဘာအၚ်တံဂှ် အကြာဒပ်ပၞာန်ဗမာကဵု ဒပ် KNLA တံ ဒှ်ကၠုၚ်လဝ်ပေါဲဗတိုက်ရောၚ် သ္ဂးရ။
ပါဲနူပေါဲဗတိုက် သီဗ္ဒိုပ်လေဝ်ကေတုဲ ပရေၚ်ကြတ်ဗတိုက် ကရောၚ်ပၞာန်ကီု၊ ပရေၚ်ပန်လဝ် ကွဳစက်ပၞာန်ဂမၠိုၚ် ကေုာံ ပန်လဝ်တမ်ဒပ်တံ နကဵုလွဟ်ဇၞော်၊ ဒရုၚ်တံလေဝ်နွံကီုရောၚ် ညးအုပ်ကာခရိုၚ်သဓီု KNU ပဒိုသဝ်ဧနိုင် ဟီုရ။
အပ္ဍဲပေါဲဗတိုက်တံဏံ လပါ်ဒပ်ပၞာန်ဗမာ ချိုတ်အာ ၂၆ တၠ၊ ဒးဝပ် ၂၄ တၠနွံတုဲ ရပ်ဂွံဂျိုၚ်ၚ် ၁၄ တၠနွံရ၊ ဗီုဂှ်ကီု လပါ်ဂကောံပံၚ်တောဲ KNLA တံ ချိုတ်အာ ၅ တၠတုဲ ၁၂ တၠဂှ် ဒးလဝ်ဝပ်နွံကီုရောၚ် သ္ဂးရ။
အခိၚ်ဒှ်မံၚ်ပေါဲဗတိုက်ပၠန် နူလပါ်ဒပ်ပၞာန်ဗမာ ကြဳဗုမ်ဗလးကျာတုဲ ညးဍုၚ်ကွာန် ၂ တၠ ဒးချိုတ်အာ၊ ၉ တၠ ဒးဝပ်နွံတုဲ သ္ၚိဌာန် ၆၉ မ လီုလာ်အာလဝ်နွံ ဂွံတီရ။
တုဲပၠန် ဟိုတ်နူပေါဲဗတိုက်တံတုဲ ညးဒေသ ၁၀၀၀၀ ပြၚ် ထောံဌာန် ဒၞာဲဒးဂြိပ်ပါဲမံၚ်ဘဲပၞာန် စဵုကဵုလၟုဟ် ကလေၚ်စိုပ် သ္ၚိဌာန်ညးတံ ဟွံမာန်ဏီရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media