ပံၚ်၊ မေ ၁၀။
အပ္ဍဲကဵုတွဵုရးမန် ပွိုၚ်ဍုၚ်ပံၚ် သွက်ဂွံသိုၚ်ခၞံ ရုင်ညးစၞး အမာတ်စၠတ်ထဝ် ဂးတုဲ နူကဵုဗော်ညဳသၟဟ်မန် ဗက်အာတ်မံၚ်သြန် နူကဵုဝိုၚ်ဝေၚ်တံနွံမံၚ်ရောၚ် ဂွံတီကေတ် နူတၠခုၚ်ဝိုၚ်ဝေၚ်တံရ။
ပရေၚ်အာတ်သြန် နူဝိုၚ်ဝေၚ်ဗီုတံဏံဂှ်တှ်ေ သွက်ညးစၞးအမာတ်စၠတ်ထဝ် တိုန်ကၠုၚ်နူပေါဲရုဲမာဲတံ ဂွံဆဵုဂဗအာကဵု ညးဍုၚ်ကွာန်တံတိုက်ရိုက်မာန်ကီု သွက်ဂွံသိုၚ်ခၞံအာ ရုင်ညးစၞး အမာတ်စၠတ်ထဝ်ဂှ် အာတ်ဒၟံၚ်သြန်ဗီုဏံရောၚ် ဂွံတီရ။
နူကဵုဗော်ညဳသၟဟ်မန် ပ္ဍဲကဵု ဗက်အာတ်မံၚ်သြန်နူဝိုၚ်ဝေၚ်တံဂှ် လၟိဟ်သြန် ခုတ်စၟတ်လဝ်တၞဟ်ခြာဟၟဲကီုလေဝ် ဝိုၚ်ဝေၚ်မွဲခုၚ်မ္ဂး အောန်အိုတ် ၅ ကိုတ် စဵုကဵုစိုပ် ၁၀ ကိုတ် ဒးကဵုမံၚ်ရောၚ် သ္ဂးရ။
ဟိုတ်နူဗော်ညဳသၟဟ်မန် အာတ်မံၚ်သြန် သွက်ဂွံသိုၚ်ခၞံ ရုင်ညးစၞး အမာတ်စၠတ်ထဝ်ဂှ်ရ ဒးကဵုဟေၚ်ရောၚ်။ ယဝ်ရဟွံကဵုမ္ဂး ဖေက်ညးတံ ဂၠာဲကၠုၚ်ပြသၞာကဵုဝိုၚ်ဝေၚ်တံတုဲ ဒးကဵုဏာရောၚ် တၠခုၚ်ဝိုၚ်ဝေၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စပ်ကဵုပရေၚ်ဗော်ညဳသၟဟ်မန် အာတ်မံၚ်သြန်ဝိုၚ်ဝေၚ် သွက်ဂွံသိုၚ်ခၞံ ရုင်ညးစၞးအမာတ်စၠတ်ထဝ်ဏံ ဍာံဟာ ဟွံဍာံဟာဟီုဂှ် ဌာန်ပရိုၚ်သြၚ်လောန်တိုၚ်မ် ဆက်စၠောံသၟာန်လဝ် ညးအခေါင်ဟီုဂး ဗော် နာဲတာန်ယှိုဲ ကီုလေဝ် ဟွံဒုၚ်တဲသောၚ်ကလးပုဟ်။
မွဲလပါ်ပၠန် နူကဵုကဝ်မယှေန်ပၞာန် ကၠောန်လဝ်ပေါဲရုဲမာဲတုဲကၠုၚ်ဏံ ဗော်ညဳသၟဟ်မန် ဇၞးလဝ်မာဲ ပ္ဍဲကဵုပွိုၚ်ဍုၚ်ၜါသွာၚ်၊ မုဟ်ဍုၚ်၊ ဇြပ်ဗု၊ ရေဝ် ကေုာံ ပွိုၚ်ဍုၚ်ပံၚ်တံဂှ် ဗက်ပံက်မံၚ် ရုင်ညးစၞး အမာတ်စၠတ်ထဝ်တံ မဒှ်ရ။
ဗီုကဵုဗော်ညဳသၟဟ်မန် ဗက်ပံက်မံၚ်ရုင်ညးစၞး အမာတ်စၠတ်ထဝ်တံ ဟီုကီုလေဝ် ညးစၞးစၠတ်ထဝ်တံဂှ် နကဵုဇကုညးတံ ဟွံစှ်ေဆဵုဂဗကဵု ညးဍုၚ်ကွာန်တံ စဵုကဵုဗလးတိဂှ်ရ အကြာညးဒေသ ပရေၚ်ပါ်ပါဲ မံၚ်နွံရ။
အပ္ဍဲကဵုပေါဲရုဲမာဲဗော်ဇဳ ဒပ်ပၞာန်က္ဍိုက်ပ်ဂှ် ဗော်ညဳသၟဟ်မန် ဂွံလဝ် ညးစၞးစၠတ်ထဝ် ညးဍုၚ်ကွာန် ၅ ဒၞာဲ၊ ညးစၞးစၠတ်ထဝ် ကောန်ဂကူ ၅ ဒၞာဲ ကေုာံ ညးစၞးစၠတ်ထဝ်တွဵုရး ၇ ဒၞာဲ ဇၞးလဝ်မာဲတုဲ ဒှ်ဗော်ဖျေံသ္ဇိုၚ် အပ္ဍဲကဵုတွဵုရးမွဲ မဒှ်ရ။
ပရိုၚ် – သြၚ်လောန်တိုၚ်မ်
Photo – MUP