မတ်မလီု၊ မေ ၁၂။
ဍုၚ်မတ်မလီု ဍုၚ်ဇၞော်တွဵုရးမန်ဂှ် ညံၚ်ဂွံဒှ် Smart City ကၠောန်အာရောၚ် အလဵုအသဳပၞာန်ခါန်ကၞက်လဝ် သ္ကိုပ်ဝန်ဇၞော် တွဵုရးမန် ဒုသ္ကိုပ်ပၞာန် အံၚ်ဝေန်တာန် ဟီုကြီုဏာရ။
အပ္ဍဲဂိတုမေ ၇ လောန်ကၠုၚ်ဏံ ပ္ဍဲရုၚ်အလဵုအသဳတွဵုရး ဍုၚ်မတ်မလီု ကၠောန်လဝ်ပေါဲဆဵုဂဗမိတ်ဆက် အကြာညးစၞးအမာတ်စၠတ်ထဝ် တွဵုရးမန်ကဵု ညးတာလျိုၚ် ဂကောံအလဵုအသဳတွဵုရးမန်တံဂှ် ဟီုကြီုစလဝ်ရောၚ်။
အပ္ဍဲအာယုက်လက်ထက် အလဵုအသဳတၟိဏံ ပရေၚ်ကမၠောန် ဒးကၠောန် နွံဂၠိုၚ်မံၚ်ဂှ် ဒးကၠောန်အာ တွဵုရးမန် ဂွံၜိုဟ်လလမ်တုဲ ဍုၚ်မတ်မလီု ညံၚ်ဂွံဒှ် Smart City ဒးကၠောန်အာရောၚ် ဒုသ္ကိုပ်ပၞာန် အံၚ်ဝေန်တာန် ဟီုလဝ် မဒှ်ရ။
ၜိုန်ရဟီုမံၚ် ကၠောန်အာ Smart City ကီုလေဝ် ဌာနဗဂဵုလဟဵုဂှ် ကွဳစက်သီဂိုၚ်ဟမိက်မှ ကၠုၚ်လၟေၚ်အခိၚ်ဍာံဍာံ ဟွံမာန်တုဲ ဒှ်မံၚ်ညံၚ်ရဴ အရေဝ်ဟရိုၚ်မွဲရောၚ် ညးဒေသလတူဍုၚ်မွဲတၠ ဟီုဂးပါ်ပါဲလဝ်ရ။
“ညးတေံဟီုကၠောန် Smart City ဂှ်တှ်ေ ဟီုမံၚ်ရလေဝ်။ ကွဳစက်ဌာနဗဂဵုလဟဵုလေဝ် ကၠုၚ်အခိၚ်လၟေၚ်ဍာံဟွံမာန်။ သၞောတ်ကဵုမံၚ်ဍာ် ၜဳကဍတ်ဂှ်ပၠန် ဍာ်ဟွံကၠုၚ်အခိၚ်ဍာံဍာံပုဟ်။ ပၟတ်ဓာတ်လေဝ် ကၠုၚ်ဟွံဍာံ။ ဗီုလဵုဂွံကၠောန်အာ Smart City ရော။ အရာဒးပဠေဝ်ပဠေတ်ဂှ် ဂၠိုၚ်မံၚ်ရလေဝ်။ ကာလဟီုကၠောန် Smart City မ္ဂး ဂလာန်ညးတံဂှ် ဒှ်မံၚ်ညံၚ်အရေဝ်ဟာသမွဲတုဲ ညးမွဲလေဝ် ဟွံဂံၚ်ပ္တေဟ်စပုဟ်” သာ်ဝွံ သ္ဂးရ။
တုဲပၠန် ၜိုန်ရဟီုမံၚ် ကၠောန်အာဍုၚ်မတ်မလီု ညံၚ်ဂွံဒှ် Smart City ကီုလေဝ် အတိုၚ်ပကတိဏံဂှ်တှ်ေ ဂၠံၚ်လီုမံၚ်လေဝ် ဟွံပဠေဝ်၊ ပၟတ်ဓာတ်လေဝ် ဂွံဆမွဲအခိၚ်ဍောတ်ဓဝ်တုဲ အလုံဍုၚ်မွဲ ဒးမံၚ်အာ အပ္ဍဲဒမၠု၊ ဗီုဍာ်ဂွံဇၞော် ဗရံၚ်အကြာဂၠံၚ်တံလေဝ် ဟွံပသောၚ်လဝ်ဏီတုဲ ဂွံဒှ် Smart City ဟီုဂှ် ဒှ်ဟွံမာန်ပုဟ် ညးဆက်ဟီုရ။
ကြဴနူပၞာန်သီအဝဵုတုဲ လ္တူဍုၚ်မတ်မလီုဂှ် နကဵုကိုန်အစဳဇန် Safe City ဂှ် သုၚ်စောဲလဝ် သြန်ဘဏ္ဍာညးဍုၚ်ကွာန် ကိုတ်လၟိဟ်ကဵုလ္ၚီတုဲ ဗက်စွံလဝ် CCTV အလုံမွဲဍုၚ်ပေၚ်ၚ်ရ။
ဗီုဏံ နကဵုကိုန်အစဳဇန် Safe City ၜိုန်ရစွံလဝ် CCTV အလုံမွဲဍုၚ်ကီုလေဝ် ပရေၚ်ကၠတ်ကွဳစက်၊ ပရေၚ်ကၠတ်ဂၠံက်ပၠံၚ်ၜး စဗ္တံနူတံကဵု ကမၠောန်ဒုစရိုက်တၞဟ်ဟ်တံ မွဲဏှမွဲဏှ က္တဵုဒှ်မံၚ်ကီုလေဝ် ရပ်ဂွံမၞိဟ် တၠတဲကၠောန်ဒုဟ်တံဂှ် ဟၟဲဏီပုဟ်။
ပရိုၚ် – သြၚ်လောန်တိုၚ်မ်
Photo – MOI/CJ